1 Mose Kukũ Nɔnle20
Kakpɛ Ɔkyɛ Sɛlaa
1Nse biɛtaka kakpɛ di balo lee suoto, biɛnya bapɔnkɔ ku bakeke ba di bapɔnkɔ nnanfi ni ku bakpɛtɛ ba nimpɔ balenke ni bale ye yi, bitanyɛkɛ ma, diekye SAATE Yaa lee wɔ niakpaa ye aadieko ni di Egipte kamasiɛko ye.2Nse nfɛ bibasifi kakpɛ yi, oletatɛ adie awa sitũ aabakakatɛ ata bakpɛtɛ nwu.3Aabuɛ alɛ, “Oo Israel, binu, miɛ nfɛ biofe kakpɛ di balo lee suoto. Bitanta difu lapɛ ye ee biayɛkɛ; bitanta ditũkũ lapɛ ye ee ɔfɔɔ lasifi ye di anu lɛma.4Diekye SAATE Yaa lee ninle nnwɔ nikɔkpaa ye anaakpɛko ni balo lee, anta ye ni lelenkee nɛ.”5Ni kakpɛ banɔɔfotii kamakaalɛ bakpɛtɛ nwu alɛ: “Otii owo nsi di kamɛ lee eetofo ni leyo fɔle anadidiki nini kayi? Bitɔɔ atɔɔkyɛ leyo, nse diele nkpo abafuo okpi di kakpɛ kamɛ, ni otii bamba nimadiki leyo nwu kayi.6Otii owo lɛkpɛ awosobi kofe fɔle anadikyako nya ni ole? Bitɔɔ atɔɔkyɛ leyo, nse diele nkpo abafuo okpi di kakpɛ kamɛ, ni otii bamba nimale nya.7Bɛɛkaalɛ ɔsanko bɛɛta otii owo, anadiyɔ nwɔ ni? Bitɔɔ atɔɔkyɛ leyo, nse diele nkpo abafuo okpi di kakpɛ kamɛ, ni otii bamba nimayɔ ɔsanko nwu.”8Ni kakpɛ banɔɔfotii nwu makple mankaalɛ alɛ, “Osuɔtɔ owo kɔyɛkɛ ee difu kɔpɛ nwɔ? Bitɔɔ atɔɔkyɛ leyo ta mmle di otu dilɔbakpa ni babilɛma kafɔɔ.”9Nse kakpɛ banɔɔfotii nwu ntooloo ɔkakatɛ ɔta bakpɛtɛ nwu yi, baadiki kanyabayilatɛ bata ma.10Nse biɛkata biɛkyɛ bilɛ biɔlaadieko okpoo kplɛ yi, biɛta batii nwu osuku baata disi.11Nse beenu kasɔ bɛɛsɛkɛtɛ n-yoko lɛma bɛɛta ye yi, ni binyinka batii nwu bamuu di okpoo nwu baatɔɔbla sɛkpɛ siene batɔɔta ye.12Nse beesĩ disi ɔta, beedieko ye kakpɛ yi, ni bimana okpoo kplɛ nwu bikyi.13Nse SAATE Yaa lee lɛyɔ nwu eekpee ye ninnɛɛ yi, bilo basuɔtɔ bamuu di okpoo nwu ku kapamii.14Kafɔɔ basanko, babisɔ, babɔkɛɛ sele ku lɛsaa biala di okpoo nwu kamɛ nnya yi, biyɔ nya fɛ kakpɛ kamɛ asaa bita suoto lee. Nioso bibafuo kakpɛ kamɛ asaa nwu di SAATE Yaa lee lɛta ye ni, eekye ni balo lee nfũ ɔkpɛ ɔblako.15Nle mmle biɛbla sekpoo kplɛ se simuu niekyo ye ni, sinanle ni nnle be ninkaakɔ ye ni sele nɛ.16Kafɔɔ, di sekpoo kplɛ se kamɛ di nnle be di SAATE Yaa lee kɔyɔ anta ye ni fɛ atesaa yi, bitandiɛ lɛsalɛsaa nikonwuna ni lasiɛ nkpa.17Biwɔɔsa bamuu klekle- Hiti batii, Amori batii, Kanaan batii, Perisi batii, Hiwi batii ku Yebusi batii- fɛ mmle di SAATE Yaa lee lɛtɔkɔ ye nii.18Nse diele nkpo, babatuo ye mmle biatikanko ni ayududusaa lɛma nwu amuu mambla ni di bayaa lɛma kasumu kamɛ, mimabla okpile di SAATE Yaa lee suoto.19Nse biedieko okpoo kplɛ owo, biɔkpɛko nwu bilɛ biofũ nwu ditɔɔklɛ yi, bitan-yɔ kafɛ biabudi alewoso biawɔɔsa nya, diekye biafuo awosobi nwu ɔtɛsɛ ole. Bitambudi nya biatɛ kaasɔ. Awoso nwu di afe, batii bale, fiɛ biodieko nya kakpɛ?20Kafɔɔ, biafuo awoso ya biye bilɛ aale ni alewoso obudi, min-yɔ nya mintofo oyoyiɛ minkyisa okpoo kplɛ nwu biɔkpɛko ni ninaase di obe wɔ biefũ nwu nii.The Seed Company