1 Mose Kukũ Nɔnle1
Odie Di Horeb Osifi
1Nnya sɛlaa se di Mose lakakatɛ aata ni Israel batii bamuu di ɔfaafuu di Yordan kufĩ katunkɔ- nfa ninkpe di Araba- diɛkyɔɔ ni Suf anu, kusi ni di Paran ku Tofel, Laban, Haserot ku Disahab obo.2(Lefosi dii ninwii man-yɔ mankyɛ diedie ni di Horeb diesifi ni Kades Barnea, nse feefe di Seir Kobokote osuku nɛ.)3Di dii kasale di lefosi kɔwɛntɛ kasale kamɛ, di alɛɛ afosi-ana kamɛ yi, Mose labuɛ aatɔkɔ Israel batii sɛlaa se simuu di SAATE nwu latɔkɔ nwɔ ni diekye ni suoto lɛma.4Nle mmle lawa di obe wɔ aalenkee ni Amori batii ɔka Sihon wɔ niatoole ni sɛka di Hesbon, di Edrei lalenkee ni Basan ɔka Og wɔ niatoole ni sɛka di Astarot sɛmaa.5Mose lakye kasɔ aatoodiki kufiofa ko mmle kasɔ aatɔɔta batii nwu di Yordan kufĩ katunkɔ di Moab kasɔ, aatoobuɛ alɛ:6SAATE Yaa loo nwu latɔkɔ wo di Horeb alɛ, “Bitoosiɛ biɛklɛ di kobokote ko mmle.7Bidie di kasiɛkɔ nwu bisifi Amori batii kale lekpenkpe; biesifi batii ba bamuu ninsi ni di Araba, di abokote osi di akpenkpe nkpaa di kufĩ kamɛɛkɔ, di Nkpaalɔ kasɔ ku lekpo kotoko diesifi ni Kanaan batii kasɔ ku Lebanon, diɛlaadu ni Eufrate okle kplɛ nwu.8Nyu lo, ntɔɔyɔ kasɔ ka mmle lɛta ye. Bitɔɔkyɛ biɛlaayɔ kasɔ ka di SAATE nwu laka ntam alɛ abata ni bate lee- Abraham, Isak ku Yakob- ku banaantii lɛma ba di sɛmaa lɛma.”Mose Ladiki Batunletɛ
9Di obe nwu kamɛ latɔkɔ ye nlɛ, “Bitoosii atoo nutũle ole ɔtɛɛ alɛ katuka ye lete nii.10SAATE Yaa lee ntɔɔta ye biɛkpɛ, alɛ miɛ bitɔɔpɔ fɛ awɛntrɛbi di kolo.11SAATE nwu, bawa lee Yaa ata ye bikpɛ fɛ akyuu kakpe bikyakaa, aata ye lɛtɔtrɔ fɛ mmle aabuɛ aatɛ ni!12Kafɔɔ lɛ kamafuo sɛlaa lee ku atoo lee ku dibuɛkpee lee amuu otuka letenii?13Nioso bidiki basuɔtɔ banumbentɛ bawo, mannu ni sɛlaa kasɔ, mambu ma ni kafɔɔ di ana lee biala kamɛ, nin-yɔ ma mbla batunletɛ di suoto lee.”14Ni biabuɛ bilɛ, “Kɔkpaa ko feediki ni nlɛ.”15Nioso lafũ basuɔtɔ batunletɛ di ana lee ya niabe ni anu, mambu ma nii, ni lata ma nlɛ bawɛ osie di suoto lee- fɛ kanyabayilatɛ di batii nkpe, alafa, afosi-anɔɔ ku afosi kanya, fɛ ana nwu banɔɔfotii.16Ni latɔkɔ bakantɛ lee di obe nwu kamɛ nlɛ: Binu kɔlɛɛfuii ko ninsi ni di babilee ntɛɛ, biɛka lɛka di onukwale kanya, kuntɛ ɔlaa nwu nsi di Israel batii bamu ntɛɛ ee onwii lɛma ku ɔfɔɔ ntɛɛ.17Bitannyu otii kuonwii di anu biakanko; binu akyuu nwu anyɔ, banɔɔfo ee babisɔ kyɛkyɛ. Bitanyɛkɛ otii kuonwii, diekye Yaa lele ninle lɛkanko. Biyɔ ɔlaa lele ninkpe osie kulenke ye biwakoe, ni ami kamanu nwu nta ye.18Di obe nwu kamɛ latɔkɔ ye lɛsaa biala dikpeni biɛbla nii.Baakpee Batii Baakyɛ Kades Barnea Alɛ Baalaala Kasɔ
19Nioso, fɛ mmle di SAATE Yaa loo latɔkɔ wo nii, buadie di Horeb Kobokote buakyɔɔ anu Amori batii kale lekpenkpe buafe di difu ɔfaafuu foo nwu omuu bitɔɔnya nii, nioso bualaadu Kades Barnea.20Ninfɛ latɔkɔ ye nlɛ, “Bitoodu Amori batii kale lekpenkpe le di SAATE Yaa loo kɔyɔ anta wo nii.21Nyu, SAATE Yaa lee ntɔɔyɔ kasɔ nwu ɛɛta ye. Bikata biɛlaayɔ ka, fɛ mmle di SAATE, bawa lee Yaa latɔkɔ ye ni. Bitanyɛkɛ; bitanta nnɛɛ lafee ye.”22Ninfɛ di bamuu lee biawa biabatɔkɔ mi bilɛ, “Bita bukpee basuɔtɔ bawo baale katũ baalaala kasɔ nwu bata wo, baakple babatɔkɔ wo osuku wɔ bubafe ni ku sekpoo se bubadu ni.”23Ɔlaa nwu lalɛ mi onu; nioso ladiki lefosi banyɔ lee, osuɔtɔ onwii, onwii lakye kɔna biala kamɛ.24Ni baasifi baalaakata baabuo lekpenkpe kale nwu, baalaadu Eskol Ɔtaata nwu, baafenfe baanyu kasɔ nwu.25Baayɔ kasɔ nwu awosobi awo baawako wo, ni baabatɔkɔ wo alɛ, “Kasɔ biene kale di, SAATE Yaa loo kɔyɔ anta wo.”Ɔtaka Oyila Di SAATE Nwu Suoto
26Kafɔɔ bitatootuna bilɛ biɔlaayɔ kasɔ nwu; biataka biayila di SAATE Yaa lee ɔlaa nwu suoto.27Bianwununuu di akpaayo lee kamɛ bilɛ, “SAATE nwu lekyidi wo; nioso ɛɛkpaa wo eedieko di Egipte kasɔ alɛ ɔɔbayɔ wo ankpee di Amori batii nnɛɛ manwɔɔsa wo nɛ.28Ɔfɛ nfɛ bubakyɛ? Babiloo ba nialala ni kasɔ nwu ntɔɔta otu loo lɛkpa. Beebuɛ alɛ, ‘Batii nwu nkpe osie, bɛɛkaana kafɔɔ balenke wo; sekpoo kplɛ lɛma lemuɔ ku seyoyiɛ takale siedu ni kolo. Bia buanya Anak batii ninfa.’”29Ninfɛ latɔkɔ ye nlɛ, “Bitanta difu lapɛ ye; ni bitanyɛkɛ ma.30SAATE Yaa lee wɔ ninleko ye ni katũ kamakpɛ anta ye, fɛ mmle aabla aata ye ni di Egipte, bianya ni ku anu lee amu,31di ɔfaafuu kamɛ. Nfa bianya mmle di SAATE Yaa lee lakunu ye ni, fɛ mmle di kote nkunu ni obi nɔɔ, di osuku wɔ omuu biakyɛ ni, diabase ni di obe wɔ biabadu ni lɛba le mmle.”32Bia di nle mmle lete oso, bitafũ SAATE Yaa lee bianu,33nnwɔ nialeko ye ni katũ di osuku lee ɔkyɛ, di ɔtɔ ku kakyɛ, kakũ kafɔɔ di lelokonkyɛ kamɛ, aatoomiɛ ni aba ya bibasiɛ ni, antuo ye ni kafɔɔ osuku wɔ biafe nii.34Di SAATE nwu lanu ni ɔlaa wɔ biabuɛ nii, ɔblɔ lafiɛ nwɔ ni aaka ntam osie kanya alɛ:35“Otii kuonwii di lɛkyɛ kpile le mmle kamɛ dilɔbanya kasɔ biene ka laka ntam nlɛ kamata ni bawa lee,36diediki Yefune obisuɔtɔbi Kaleb lete. Nnwɔɔ abanya ka, kamayɔ kafɔɔ kasɔ nwu abase ni kɔkpaa ntɔɔ manko banaantii nɔɔ, diekye aatikanko SAATE nwu ku otu nɔɔ omuu.”37Ta aye oso SAATE nwu lanya ɔblɔ kafɔɔ akpeeko mi aabuɛ alɛ, “Afɔ kafɔɔ flɔbabuo kasɔ nwu.38Kafɔɔ kyakaakotɛ lɛfɔ Nun obisuɔtɔbi, Yosua kamabuo kasɔ nwu. Kpee nwɔ osie, diekye nnwɔɔ nimaleko Israel batii katũ manaale kasɔ nwu asaa nɛ.39Babisɔ lee nwu kafɔɔ biobuɛ bilɛ babamufũ mansifiko ni sɛlanle kamɛ, babi lee nwu ninaditofo ni dibiene ku dikpile- mma nimabuo kasɔ nwu nɛ. Kamayɔ ka nta ma, mma kafɔɔ babayɔ ka, kambla kale ma.40Kafɔɔ aye yi, bimunikĩi biɛkyɔɔ ɔfaafuu anu diofe ni Lekpo Sɛɛle lɛkyɛ.”41Ninfɛ biabuɛ bilɛ, “Buɔbla okpile di SAATE nwu suoto. Bubakata munkyɛ munaakpɛ kakpɛ di kasɔ nwu suoto, fɛ mmle di SAATE Yaa loo lediki wo ni kanya.” Nioso otii biala layɔ akpɛsaa nɔɔ aakpakũ, baanyu alɛ diɛyɔɔ babakata mankyɛ ni lekpenkpe kale nwu.42Kafɔɔ SAATE nwu latɔkɔ mi alɛ, “Tɔkɔ ma falɛ, ‘Bitankata biakyɛ osi nwu bialaakpɛ, diekye namayilaye kamaa. Balo lee kamalenkee ye.’”43Nioso latɔkɔ ye, kafɔɔ bitanu. Biataka biayila di SAATE nwu kanya didiki suoto, ni di lɛkanta lee kanya biakata biasifi lekpenkpe kale nwu nɛ.44Ni di Amori batii ba niasiɛ ni di akpenkpe nwu ladie babadieko ye nɛ; baatikanko ye fɛle banwakɛ ɔlambu baalenkee ye diayɔ ni di Seir baalaadu Horma.45Ni biakple biawa biabawi di SAATE nwu anu nɛ, kafɔɔ aakpaa atoko aafuusa, atakyɔɔ kaku diwi lee nwu atoko.46Nioso biasiɛ di Kades ayi kpinwu- biasiɛ ninfa obe nwu omuu.The Seed Company