2 SAMUEL6
Baayɔ Kanya Ninii Lɛlakaa Nwu Baawako Yerusalem
1Dawid lakple aasiisa Israel bakpɛtɛ ba bamuu aadiki nii, bamuu labla nkpe afosi-atiɛ.2Nnwɔɔ ku bakpɛtɛ nɔɔ bamuu ladie di Baala Yuda alɛ bɔɔlaayɔ Yaa lɛlakaa nwu ninfa manwako. Nni Leyooto manlɛɛ alɛ, SAATE wɔ Ninlenke ni leyooto, oole ni sɛka di kerubim wɔ nintika ni di alakaa nwu osi obo.3Ni baayɔ Yaa lɛlakaa nwu baatika di keke fɔle suoto, baakyeko Abinadab leyo le niatika ni di lekpenkpe osi baawako nɛ. Abinadab babisuɔtɔbi Usa ku Ahio niatɔɔkpa keke fɔle nwu4di Yaa lɛlakaa nwu latika ni di osi. Ahio lale ni katũ.5Dawid ku Israel leyo nimuu latɔɔnya suoto lɛyɔɔ ku osie lɛma omuu di SAATE nwu anu ku sinu ku bakyitaa, basanku, akasa, abi ku abombo.6Baabadu ni Nakon kakpaa, ni di Usa lamufũ Yaa lɛlakaa nwu nɛ, diekye banankyue nwu latuntula.7Ni di SAATE nwu ɔblɔ lasoo di Usa suoto, ta lɛsaatambu nɔɔ oso; nioso Yaa lapɛ nwɔ aayu, ni akpi aate ninfa di Yaa lɛlakaa nwu ɔlɔɔkɔ nɛ.8Ninfɛ di Dawid lanya ɔblɔ ta SAATE nwu ɔblɔ wɔ aanya ni di Usa suoto oso. Nioso diɛbadu miɛ wɔ mmle bɔɔlɛɛ lɛba nwu alɛ Peres Usa. 9Dii nwu nkpo Dawid layɛkɛ SAATE nwu, ni aabuɛ alɛ, “Lɛ nfɛ di SAATE nwu lɛlakaa kamawa ɔkyɛ nii?”10Atatootuna alɛ ɔɔyɔ SAATE nwu lɛlakaa ansifiko Dawid Okpoo Kplɛ nwu. Nioso aafenko ni di ɔlɔɔkɔ aalaase di Obed-Edom, Git otii nwu leyo.11SAATE nwu lɛlakaa laka di Obed-Edom, Git otii nwu leyo awɛntɛ atiɛ, ni di SAATE nwu latɔɔ lɛtɔtrɔ nnwɔɔ ku leyo nɔɔ batii bamuu nɛ.12Ninfɛ baatɔkɔ Ɔka Dawid alɛ, “SAATE nwu ntɔɔta lɛtɔtrɔ Obed-Edom leyo batii ku lɛsaa biala le ninkpe nwɔ nii, ta Yaa lɛlakaa nwu oso.” Nioso Dawid lasoo aakyɛ aalaayɔ Yaa lɛlakaa nwu di Obed-Edom leyo aakatako aawako Dawid Okpoo Kplɛ nwu ku suoto lɛyɔɔ.13Obe wɔ di mba niatuka ni SAATE nwu lɛlakaa ladiki ni akpakyɛlɛ akuɔ, ni di Dawid layɔ nankyue-suɔtɔ ku lɛnankyuebi le ninsi ni lɛla aata oleɔta nɛ.14Dawid lakpee simu akpeele fɛnɛnɛɛ aatootũ di SAATE nwu lɛlakaa anu ku osie nɔɔ omuu,15di obe wɔ di nnwɔɔ ku Israel leyo nimuu lawako ni SAATE nwu lɛlakaa ku kudú ku akyukyoo sɛlɔ.16Di SAATE nwu lɛlakaa latoobuo ni Dawid Okpoo Kplɛ nwu, Saul obisankobi Mikal latoonyu di sɛfle. Ni aanya mmle di Ɔka Dawid kotũ, anyeyefe ni di SAATE nwu anu yi, Mikal lanyu nwɔ nyakatãa di otu nɔɔ kamɛ.17Ni baayɔ SAATE nwu lɛlakaa baawako baabase di kayilakɔ nini di lɛkpaayo le di Dawid lapɛ aata nini kamɛ nɛ. Ninfɛ di Dawid lata ofiɛ asaaɔta ku atoko ɔkyɛ ole asaaɔta oleɔta di SAATE nwu anu nɛ.18Obe wɔ aaloo ni ofiɛ asaaɔta ku atoko ɔkyɛ ole asaaɔta, ni aawii batii nwu lɛtɔtrɔ di SAATE wɔ Ninlenke ni leyooto kamɛ nɛ.19Ninfɛ aata otii biala di Israel batii dikudi nimuu kamɛ, basuɔtɔ ku basanko akyuu lɛma anyɔ, obiala bloblo dikudi, sina dikudi ku nta lewosobi kosole nɛ. Ni di batii nwu bamuu lasifi ayo lɛma nɛ.20Obe wɔ di Dawid lasifi ni leyo alɛ ɔɔlaawii ni leyo nɔɔ batii lɛtɔtrɔ yi, Saul obisankobi Mikal ladie aabakyakako nwɔ aatɔkɔ nwɔ alɛ, “Lɛ di Israel ɔka lekpee suoto ɔmɛnɛfɛ miɛ nkpo, eediki lɛkyɔtɔ di bakpɛmblatɛ nɔɔ balanle-sankobi anu fɛ mmle di ditiipɛ mbla ni!”21Ni di Dawid latɔkɔ Mikal alɛ, “SAATE nwu anu diale, nnwɔ niadiki mi ni, atadiki ni teefɔ ee otii lele di leyo nɔɔ kamɛ, di obe wɔ aase mi ni sɛka di SAATE nwu Israel batii suoto-kamanya suoto lɛyɔɔ di SAATE nwu anu.22Kamabla bia atiipɛsaa nlenkee nle mmle, mankpee mi sinunsɔ di anu nii amu. Kafɔɔ di balanle-sankobi ba mmle ɔlaa feebuɛ nii, babatɛɛ dibu.”23Nioso Saul obisankobi Mikal ditawɛ babi dialaadu dii le aakpi nii.The Seed Company