2 SAMUEL22
Dawid Lelenkee Onu
1Dawid lasa onu wɔ mmle sɛlaa aata SAATE nwu, di obe wɔ di SAATE nwu ladiki nwɔ aakyeko ni balo nɔɔ bamuu ku Saul nnɛɛ.2Ni aabuɛ alɛ:“SAATE nwu ninle mi difuɔnkpaa, kɔba nii ku dikitɛ nii;3Yaa nii ninle mi difuɔnkpaa, nnwɔɔ kamɛ nintaniko nɛ.kubidifunsaa nii ku didiki nii lɛkya.Nnwɔɔ ninle sientɛ nii, katanikokɔ nii ku dikitɛ nii-feefũ mi di amumu batii nnɛɛ.4Lɛlɛɛ SAATE nwu, nnwɔ di katansa lesiɛko nii,ni eediki mi di balo nii nnɛɛ nɛ.5“Kukpi afɛɛfɔ ɔfɛ lamana mi;ntu siene ninlalasa ni asaa lakpee mi difu.6Ɔkya sikũ lamimini mi siakyi;kukpi akyĩ ladieko mi.7Di nimiina nii kamɛ lalɛɛ SAATE nwu;lafaa lalɛɛ Yaa nii.Aanu mi sɛlɔ di olekatakɔ nɔɔ kamɛ;lɛfaa nii labuo di atoko nɔɔ.8“Kasɔ lakpanko suoto, kaatũkũ,osi n-yilakɔ latũkũ;aakpanko suoto diekye ɔblɔ lafiɛ nwɔ.9Kɔyɔ ladie di anwunfie nɔɔ;ɔtɔ wɔ ninfiɛ ni asaa ladie di kanya nɔɔ,atɔkɔnii bembe ladie aakye ka kamɛ.10Aabɛ osi, aasoo aawa kasɔ;ditunu alokonkyɛ lawɛ di nkpaasɔ nɔɔ.11Aasiɛ di Kerubim suoto aaflɛlɛtɛ;aaflɛlɛtɛ di kɔfɛɛfɔ afoko suoto.12Aayɔ ditunu aabla akpanta nɔɔ aakyisa suoto-fɛle kanto ditunu alokonkyɛ koolo.13Lɛkpa nwu di anu nɔɔ,di atɔkɔnii ya nikomunaa ni ladie aakye.14SAATE nwu lakpududuu aakyeko osi;ni di Nnwɔ Niɛtaka Katoo Alenke ni sɛlɔ ladie nɛ.15Aataa kɔtaa aasamiisa balo nwu,aata ɔtɔ lamumuna kuakpɔkpɔtɔsa ma.16Lekpo kalɔ sisuku ladie siate,kasɔ asɔse kafɔɔ late temple,di SAATE nwu ɔlaa osĩ ɔta kanya,di anwunfie nɔɔ ninwuna hɛɛhɛɛ kamɛ.17“Aakyɔɔ kɔnɛɛ kuakye katoo kuabamufũ mi;aananfi mi aadiki di ntu kyofole kamɛ.18Aadiki mi aakyeko balo nii siene nnɛɛ,di bakyiditɛ nii ba niawɛ osie baalenkee mi ni nnɛɛ.19Baadieko mi di dii le di ɔlaa latũ mi nii,kafɔɔ SAATE nwu niale mi kamaayilatɛ.20Aakpaa mi aawako lɛba le niɛblɛfɛ nii,aadiki mi, diekye labuo nwɔ anu.21“SAATE nwu lɛbla ɛɛtɛɛ di ɔsaabla tinini nii kanya;nnɛɛ nii leklekle kanya oso, ɛɛtɛɛ letota.22Diekye lelolaa nkyɛ di SAATE nwu sisuku;nimbla okpile nkyi di Yaa nii kamaa.23Afiofa nɔɔ amuu nte di anu nii;nindiɛ ɔkyɛ di sisuku nɔɔ suoto.24Aanyako mi ɔlaa kuonwii di anu nɔɔ,lɛblasa suoto nii di sikpile ɔbla suoto.25SAATE nwu lɛtɛɛ letota di ɔsaabla tinini nii kanya,ta mmle di nnɛɛ ni leklekle ni di anu nɔɔ oso.26“Mba ninle ni onukwale fandiki onukwale lɛfɔ fantuo,mba suoto di ole nnaa nii, faatuo falɛ banaa ole kuonwii,27suoto lɛfɔ lɛkpa kɔmɛ di mba suoto niɛkpa ni kɔmɛ suoto,kafɔɔ bakpileblatɛ, fannya ma nyaami.28Afɔ nindiki batii ba niɛwakosa ni suoto kasɔkafɔɔ fanwakosa mba nintakatɛsa ni suoto katoo kasɔ.29Oo SAATE, afɔ ninle kandiɛ nii;SAATE nwu mmunikĩisa ditunu nii ambla lɛkpa.30Ku lɛkyakaako lɛfɔ kamafuo bakpɛtɛ dikudi olenkee;ku Yaa nii lɛkyakaako kamafuo oyoyiɛ oyefe.31“Yaa nnwɔɔ, osuku nɔɔ lewo nimu;SAATE nwu ɔlaa lɛkpa kɔmɛ.Kubidifunsaa aleata batii ba bamuu niɛtaniko nwɔ nii.32Diekye owe ninle Yaa di SAATE nwu kamaa?Owe kafɔɔ ninle Difuɔnkpaa nwu alenkee Yaa loo?33Yaa ninle nnwɔ ninkpee mi ni osie,anta osuku nii kafɔɔ nnwo nimu.34Ɛɛbla nkpaa nii fɛle kafɛ̀ nle;antɛɛ n-yila di ntakalekɔ.35Eetuo nnɛɛ nii kakpɛ ɔkpɛ;alɛ nnɛɛ nii kafuo abɔɔsaa kɔtaa obonsa.36Fɛɛtɛɛ lelenkee kubidifunsaa lɛfɔ;afɔ niɛwakasɔ, fɛɛtakatɛ mi katoo.37Fɛɛblɛfɛsa osuku fɛɛta nkpaa nii kasekɔ,mmle ninaakpɔnɔɔsa ni lɛnankpo.38“Lati balo nii lalaalenkee ma;ntakple nkpaamaa dialaase di obe wɔ lawɔɔsa ma nii.39Labibiɛ ma wɔkyɔwɔkyɔ, batasinfuo ɔtaka kafɔɔ;baanɔɔ di nkpaa nii kalɔ.40Faayɔ osie faaminisa mi faata kakpɛ;faata mba nin-yɛ ni di suoto nii lakpee asi kaasɔ di nkpaatũ nii.41Faata balo nii lamunikĩisa mmaa lɛma baatoso,ni lawɔɔsa bakyiditɛ nii nɛ.42Baawi alɛ bakyakaako ma, kafɔɔ kuonwii ditawɛ abafũ ma nii-baalɛɛ SAATE nwu, kafɔɔ atakpee ma kanya.43Labibiɛ ma nwaa fɛ kudu kaasɔ;lawuwuo, lananafu ma fɛle apatampata di akpaka.44“Fatoodiki mi feekyeko batii nii ba nindieko mi nii;fɛɛyɔ mi fɛɛbla fɛ nnle nwu disi.batii ba ninan-ye ni nfɛ ninsi kaalɔ nii,45bafɔɔ n-wa mamawakasɔ mantɛɛ;nse beenu mi onu ɔlaa, mankyɔɔ mi atoko.46Bamuu lɛma situ kobiɛ;mankye di nwofakɔ lɛma manwa ku ditũtũkũ.47“SAATE nwu nkpe nkpa! Baatansa Difuɔnkpaa nii nwu!Baatakatɛsa Yaa, Difuɔnkpaa nwu ku Dikitɛ nii nwu katoo!48Ale Yaa wɔ nimbla ankyisa antɛɛ nii,nnwɔ nin-yɔ nnle nwu ankpee ni di kalɔ nii,49nnwɔ nindiki mi ankyeko ni balo nii nnɛɛ.Fantakatɛsa mi katoo fanlenkee bakyiditɛ nii;fanfũ mi fankyeko amumu batii nnɛɛ.50Oo SAATE, nioso kamatansa fɔ di nnle nwu kamɛ;kamasa sinu ntansa leyooto lɛfɔ.51Anta ɔka nɔɔ lelenkee kplɛ;ambla sifutulɛ nɔɔ se ninaa ni kaloo anta nnwɔ ɛɛpɛ ni ɔfɔɔ,ambla anta Dawid ku banantii nɔɔ dinaa ni kaloo.”The Seed Company