2 SAMUEL2
Baase Dawid Sɛka Baata Yuda Leyo
1Di Saul ku Yonatan kukpi kamaa, Dawid lakaalɛ SAATE nwu alɛ, “Nkata nkyɛ Yuda sekpoo nwu owo kamɛ?”SAATE nwu labuɛ alɛ, “Kata fakyɛ.”
Ni di Dawid lakaalɛ alɛ, “Ɔfɛ ninkyɛ?”
Ni di SAATE nwu ladiki kanya alɛ, “Hebron.”2Nioso Dawid lakata aasifi nfa ku basɔfɔ nɔɔ nwu banyɔ, Ahinoam wɔ niakye ni Yesreel ku Abigail wɔ niale ni Nabal wɔ niakye ni Karmel kpisɔfɔ.3Dawid lakpaa kafɔɔ basuɔtɔ ba niawɛ ni ku nnwɔɔ, obiala ku leyo nɔɔ batii, ni baalaasiɛ di Hebron ku sekpoo nisĩ nɛ.4Ninfɛ di Yuda batii lawa Hebron, ni baapɛ Dawid ɔfɔɔ ninfa fɛ ɔka di Yuda leyo suoto nɛ.
Obe wɔ baatɔkɔ ni Dawid alɛ Yabes Gilead batii niakookaa ni Saul,5ni aakpee batɔkyɛntɛ Yabes Gilead batii baalaatɔkɔ ma alɛ, “SAATE nwu awii ye lɛtɔtrɔ ku mmle biabla ni saate lee Saul sifutulɛ se mmle okle, biakookaa nwɔ ni.6SAATE nwu abla sifutulɛ ku onukwale ole aata ye nunua, ami kafɔɔ kamale ye sebualɛ nwu okle ta biɛbla ni nle mmle oso.7Kanunua, biwɛ osie ku sɛkambi, diekye saate lee Saul ntookpi, Yuda leyo kafɔɔ ntɔɔpɛ mi ɔfɔɔ fɛ ɔka di suoto lɛma.”
Baase Is-Boset Ɔka Baata Israel
8Di obe nwu kamɛ, Saul kakpɛ kanyayilatɛ, Ner obisuɔtɔbi Abner lakpaa Saul obisuɔtɔbi Is-Boset aawako Mahanaim.9Ni aase nwɔ ɔka di Gilead, Asuri, Yesreel ku Efraim, Benyamin ku katoo kasɔ ka bɔɔlɛɛ ni Israel suoto nɛ.10Saul obisuɔtɔbi Is-Boset lafũ alɛɛ afosi-ana fiɛ aabale ɔka di Israel suoto, aale kafɔɔ sɛka alɛɛ anyɔ. Yuda leyo kafɔɔ latikanko Dawid.11Obe wɔ di Dawid lale ni ɔka di Hebron di Yuda leyo suoto labla alɛɛ akuɛnsĩ ku awɛntɛ akuɔ.12Ner obisuɔtɔbi Abner ku Saul obisuɔtɔbi Is-Boset batii ladie di Mahanaim baasifi Gibeon.13Yoab wɔ di ɔya niale ni Seruia ku Dawid bakpɛtɛ ladie baalaakyaka ku mma di Gibeon lɛpanta katũ. Dikudi ninwii lasiɛ di lɛpanta nwu lɛkyɛ ninwii, dikudi ninwii kafɔɔ di lɛkyɛ nyɔɔfa.14Ninfɛ di Abner latɔkɔ Yoab alɛ, “Ta buta bakosopo nwu bawo bataka baakpɛko bawo di anu loo.”Ni di Yoab labuɛ alɛ, “Dilɛ, ta ma babla nkpo.”15Nioso baataka baayila baaka Benyamin ku Saul obisuɔtɔbi Is-Boset bakpɛtɛ lefosi-banyɔ baadiki, Dawid kafɔɔ baaka lefosi-banyɔ baatɔɔ.16Ninfɛ di osuɔtɔ biala laminiko owo nɔɔ diisi aatofo nwɔ kapamii di difutukyɛ ni baasi baanɔɔ nɛ. Nioso bɔɔlɛɛ lɛba nwu di Gibeon alɛ Helkat Hasurim nɛ.17Dii nwu kakpɛ latɛ kaawɛ osie, ni di Dawid batii lalenkee Abner ku Israel batii nɛ.18Seruia babisuɔtɔbi batiɛ nwu lawɛ ninfa: Yoab, Abisai ku Asael. Ni di Asael nkpaa lapɛsɛwa fɛ kafɛ nle nɛ.19Ni aatikanko Abner, atamunikĩi afe oletanɛɛkyɛ ee ɔmɛntukyɛ di obe wɔ atikanko nwɔ nii.20Abner lanyu sɛmaa nɔɔ ni aakaalɛ alɛ, “Asael, afɔ dile?”
Ni aatuna alɛ, “Ami dile.”21Ninfɛ di Abner latɔkɔ nwɔ alɛ, “Munikĩi di oletanɛɛkyɛ ee ɔmɛntukyɛ; faakpɛko okosopo onwii faafũ akpɛsaa nɔɔ.” Kafɔɔ Asael ditadiɛ nwɔ otikanko.22Abner lakple aafunaa Asael alɛ, “Diɛ mi otikanko! Be oso kalo fɔ ntɛ? Lɛ kafuo obilee Yoab onyu di anu?”23Kafɔɔ Asael lasĩ, atadiɛ nwɔ otikanko; nioso Abner layɔ lɛkplɔ nɔɔ leto aatofo Asael kaafutu, ni di lɛkplɔ nwu labɔkɔtɛ di kamaa nɔɔ nɛ. Ni aanɔɔ ninfa, aakpi ninfa, ninfa nɛ. Nioso osuɔtɔ biala n-yila, nse eedu lɛba le di Asael lanɔɔ aakpi nii.24Kafɔɔ Yoab ku Abisai latikanko Abner, di kufĩ nfɛ latɔɔmɛɛ nii, baabadu Amma lekpenkpe, ninkaako ni Gia di Gibeon ɔfaafuu osuku.25Ninfɛ di Benyamin bakpɛtɛ layila Abner kamaa nɛ. Baabla dikudi ninwii baalaayila di lekpenkpe ninwii osi.26Ni di Abner lafaa aalɛɛ Yoab alɛ, “Dikpeni kapamii kalalaasa asaa dinaa ni kaloo? Bieye bilɛ nle mmle kamawako kalonkpɛɛ di kayɛntɛkɔ? Ɔmɛmbe fiɛ fabatɔkɔ batii lɛfɔ falɛ badiɛ babilɛma otikanko?”27Ni di Yoab ladiki kanya alɛ, “Nwaako di Yaa lɛnya akpe ni nkpa, nse fatankakatɛ, se basuɔtɔ nwu ntabanwini mantikanko babilɛma ninaadu kɔsɛɛ ku olesɛ.”28Nioso Yoab lafɛ kakyukyoe, ni di basuɔtɔ nwu bamuu layila nɛ; batasintikanko Israel ee bakple bakpɛ.29Di kakyɛ nwu kamuu Abner ku bakpɛtɛ nɔɔ lakyɛ baafe di Araba. Baawaalɛ Yordan, baafe baasifi Bitron omuu baawa Mahanaim.30Ninfɛ di Yoab ladiɛ Abner otikanko, ni aasiisa bakpɛtɛ nɔɔ bamuu nɛ. Di Asael diesi ni kaamɛ, Dawid bakpɛtɛ lefosi-banaasĩ layu.31Kafɔɔ Dawid bakpɛtɛ lalo Benyamin bakpɛtɛ alafa-atiɛ, afosi-akuɔ ba niawɛ ni ku Abner.32Ni baayɔ Asael baalaakookaa di ote ɔkya kamɛ di Betlehem nɛ. Ninfɛ di Yoab ku batii nɔɔ lakyɛ kakyɛ nwu kamuu, baalaabuo Hebron ku kolesɛtũ nɛ.
The Seed Company