2 SAMUEL10
Dawid Lalenkee Amon Batii Ku Siria Batii
1Di obe owo kamaa, Amon batii ɔka lakpi, ni di obisuɔtɔbi nɔɔ Hanun layila nwɔ kaanya fɛ ɔka nɛ.2Ni di Dawid labuɛ alɛ, “Kamabla sifutulɛ nta Nahas obisuɔtɔbi Hanun, fɛ mmle di ote labla sifutulɛ aatɛɛ nii.” Nioso Dawid lakpee batii alɛ balaata Hanun yɔɔsa batɔɔ ta ote kukpi nwu oso.Di Dawid batii nwu lawa ni Amon batii kasɔ,3ni di Amon batii banɔɔfotii labuɛ baatɔkɔ saate lɛma Hanun alɛ, “Feenyu falɛ dibu di Dawid kɔta ni teefɔ oso eekpee batii alɛ babata fɔ yɔɔsa? Diele okpee di Dawid lekpee fɔ batii alɛ babanyunyu okpoo nwu, baala nwu, baabafũ nwu?”4Nioso Hanun lata baamufũ batii nwu, baakpaasu osuɔtɔ biala okusu kakyɛ, baabubudi akpeele lɛma di akyeke ntɛɛntɛɛ, ni baadiɛ ma baasifi nɛ.5Obe wɔ baatɔkɔ ni Dawid ɔlaa wɔ mmle, ni aakpee batii alɛ balaakyakako basuɔtɔ nwu, diekye baakpee ma sinunsɔ osie kanya. Baatɔkɔ ma alɛ, ɔka alɛ, “Bisiɛ di Yeriko dilaase di obe wɔ di sikusu lee ntooyie ni fiɛ biekple biwa.”6Di Amon batii latofo alɛ nfɛ bookpete ni di Dawid anwunfie kamɛ yi, baalaayɔ Siria batii bakpɛtɛ ba ninkyɛ ni ninkpaa nkpe afosi-anyɔ di Bet Rehob ku Soba ku Maaka ɔka batii kakpe, ku bakpɛtɛ lefosi nkpe nnyɔ ba niakye ni Tob.7Di Dawid lanu ni ɔlaa wɔ mmle, ni aakpee Yoab ku bakpɛtɛ bamuu nɛ.8Ni di Amon batii ladie baabayila di kakpɛ kanya di okpoo kplɛ lɛma kasukunya, Siria batii ba kafɔɔ niakye ni Soba ku Rehob ku bakpɛtɛ ba niakye ni Tob ku Maaka lasiɛ di lepoo kamɛ lete lɛma.9Yoab lanya alɛ kakpɛ nwu nkpe di sitũ nɔɔ ku sɛmaa nɔɔ; nioso aadiki bakpɛtɛ nwaa bawo di Israel aatɔɔ ma aakpee Siria batii.10Aayɔ bakpɛtɛ bule aakpee di obilɛma Abisai kanyu kalɔ, ni aatɔɔ ma aakpee di Amon batii suoto nɛ.11Ni di Yoab labuɛ alɛ, “Nse Siria batii lesii mi osie yi, ni faawa fabafũ mi; kafɔɔ nse Amon batii lesii fɔ osie yi, ni ami kamawa mma fũ fɔ.12Wɛ osie, faata bukpɛ ku sɛkambi buta batii loo ku Yaa loo sekpoo kplɛ nwu. SAATE nwu kamabla nle ninlɛ ni di anu nɔɔ.”13Ninfɛ di Yoab ku bakpɛtɛ ba niawɛ ni ku nnwɔɔ lataka alɛ bɔɔkpɛko Siria batii, ni baatoso di Yoab anu nɛ.14Di Amon batii lanya alɛ Siria batii kotoso nii, mma kafɔɔ baatoso di Abisai anu, ni baasifi okpoo kplɛ kamɛ nɛ. Nioso Yoab lakple di Amon batii nwu ɔkpɛko, aakple aawa Yerusalem.15Di Siria batii lanya alɛ Israel lalenkee ma ni sɛmaa, baakple baasi dikudi.16Ni di Hadadeser lata baakpaa Siria batii baakyeko Efrate Okle kamaa baawako; ni baasifi Helam, di Hadadeser bakpɛtɛ kanyayilatɛ Sobak laleko ma ni katũ nɛ.17Obe wɔ baatɔkɔ ni Dawid ɔlaa wɔ mmle, ni aasiisa Israel omuu, baawaalɛ Yordan baasifi Helam. Ni di Siria batii lataka kakpɛ alɛ bɔɔkyakako Dawid mankpɛko nwɔ nɛ.18Kafɔɔ baatoso di Israel anu, ni di Dawid lalo bakeke lɛma bawantɛ alafa akuɛnsĩ ku bakpɛtɛ ba ninkyɛ ni ninkpaa nkpe afosi-ana nɛ. Aasafɔ kakpɛ lɛma kanyayilatɛ Sobak kafɔɔ aatɛ, ni aakpi ninfa nɛ.19Obe wɔ di baka ba bamuu niasiɛ ni di Hadadeser kalɔ lanya alɛ Israel ntoolenkee ma nii, baabla atoko ɔkyɛ ole kanya ninii ku Israel batii, ni baasiɛ ma kaalɔ nɛ.
Nioso Siria batii layɛkɛ alɛ blɔbasinkyakaako Amon batii diidii.
The Seed Company