BAKA 219
Ɔka Hesekia Lakaalɛ Yesaya Disibu Nɔɔ
1Obe wɔ di Ɔka Hesekia lanu ni ɔlaa wɔ mmle, aabɛbɛɛ akpeele nɔɔ, ni aanyukũ leboko, aasifi SAATE nwu olekatakɔ kamɛ nɛ.2Ni aakpee Eliakim wɔ niale ni lɛkayo asaa nyuntɛ, kukũ kpanatɛ Sebna ku olebatatɛ batunletɛ, baanyukũ aboko baakyɛ ɔlaabuɛtɛtɛ Yesaya wɔ niale ni Amos obisuɔtɔbi nfũ nɛ.3Ni baalaatɔkɔ nwɔ alɛ, “Nnya ɔlaa wɔ di Hesekia kobuɛ ni alɛ: Miɛ dii le mmle nle nimiina ku ɔlaa osĩ ɔta ku sinunsɔ dii, fɛ mmle nse boolofo obisɔ di ɔnyɛɛ nsinnaa baakɔɔsĩ nwɔ mandiki nii.4Loobia SAATE, Yaa lɛfɔ nwu manu sɛlaa se di bakpɛtɛ kanyayilatɛ nwu, nnwɔ di saate nɔɔ Asiria ɔka nwu lekpee, ɛɛbakpee ni Yaa wɔ ninkpe ni nkpa oyududu. Mmle aasĩ ɔlaa antɔɔ ni ta sɛlaa se di SAATE, Yaa lɛfɔ nwu ntoonu ni oso. Nioso pɛ ɔlaa fata mba niebu basi ni nkpa.”5Obe wɔ di Ɔka Hesekia banɔɔfotii lakyɛ ni Yesaya nfũ,6Yesaya latɔkɔ ma alɛ, “Bitɔkɔ saate lee bilɛ, ‘Nnya ɔlaa wɔ di SAATE nwu kobuɛ ni alɛ: Bitanyɛkɛ sɛlaa se di Asiria ɔka batɔkyɛntɛ lɛbabuɛ beekpee mi ni oyududu bienu nii.7Binu! Kamayɔ ninwuna ninwii nkpee nwɔ kaamɛ, alɛ nse eenu ɔlaa owo abakple ansifi kale nɔɔ kamu, nfa nfɛ kamata manlo nwɔ ku kapamii nɛ.’ ”8Obe wɔ di bakpɛtɛ kanyayilatɛ lanu alɛ Asiria ɔka ntoosifi ni Lakis yi, aakple nkpaamaa, ni aanya alɛ ɔka nwu kɔkpɛko Libna nɛ.9Ninfɛ di ɔka Senakerib lafũ kanya alɛ Tirhaka, Kus otii nwu niale ni Egipte ɔka ladie oofe alɛ ɔɔlaakpɛko nwɔ nɛ. Nioso aakple aakpee batɔkyɛntɛ di Hesekia nfũ ku ɔlaa wɔ mmle alɛ:10“Tɔkɔ Yuda ɔka Hesekia falɛ: Tanta yaa nwu feetika ni disi lakyɔnkyɔ fɔ di obe wɔ aabuɛ ni alɛ, ‘Blɔbayɔ Yerusalem bakpee ni di Asiria ɔka nnɛɛ.’11Nwaako fatoonu mmle di Asiria baka labla ni nnle nwu mmuu, baawɔɔsa mi ni fɛɛ. Ni babadiki fɔ?12Nnle be di bawa nii lawɔɔsa ni bayaa ladiki ma: Gosan, Haran, Resef ku Eden batii ba niawɛ ni di Tel Asar?13Ɔfɛ di Hamat ɔka, Arpad ɔka, Sefarwaim okpoo kplɛ ɔka ee Hena ɔka ee Iwa ɔka nkpe?”Hesekia Ɔlaa Ɔpɛ
14Hesekia lafũ kukũ nwu aakyeko batɔkyɛntɛ nwu nfũ, ni aaka kũ nɛ. Ninfɛ aakata aasifi SAATE nwu olekatakɔ, aalaafukuti kũ aatɛ di SAATE nwu anu nɛ.15Ni di Hesekia lapɛ ɔlaa aata SAATE nwu alɛ: “Oo SAATE, Israel Yaa, foole ni sɛka di bakarubim obo, lete lɛfɔ ninle Yaa di sɛka nlekɔ mmuu di kasɔ suoto.16Kyɔɔ kotoko, faanu, Oo SAATE; tikiti anu, faanya, Oo SAATE; nu sɛlaa se di Senakerib lekyesee, ootufa ni Yaa wɔ ninkpe ni nkpa.17“Oo SAATE, nwaako Asiria batii baka lɛwɔɔsa nnle be mmle ku nsɔ lɛma.18Beefuki bayaa lɛma nwu beekpee di ɔtɔ kamɛ, bɛɛwɔɔsa ma. Diekye batale bayaa, kafɔɔ awosoku ku afuɔ aale, ablasaa aale ku batii nnɛɛ.19Oo SAATE, Yaa loo, kanunua diki wo di nnɛɛ nɔɔ, di mmle di sɛka nlekɔ nwu mmuu di kasɔ suoto kamatofo ni alɛ lete lɛfɔ, Oo SAATE, ninle ni Yaa.”Yesaya Lafũ Ɔlaa Aakyeko Yaa Nfũ Aakyɛnko Ɔka Hesekia
20Ninfɛ di Amos obisuɔtɔbi, Yesaya lata kanya baakyɛnko Hesekia alɛ: “Nnya ɔlaa wɔ di SAATE nwu, Israel Yaa kobuɛ ni alɛ: Ntoonu ɔlaa lɛfɔ wɔ fɛɛpɛ ni di Asiria ɔka Senakerib suoto.21Nnya ɔlaa wɔ di SAATE nwu lebuɛ eeyila nwɔ ni di suoto:“ ‘Sion Obisankobi Kakpeelebitɛlenyu fɔ nyakatãa, ɔɔma fɔ kafɔɔ.Yerusalem Obisankobikotukunsa disi nɔɔ, footoso nii.22Owe feetufa, feekpee sinunsɔ kafɔɔ?Owe fɛɛtakatɛsa sɛlɔ feemuɛfɛɛtakatɛsa anu kafɔɔ feenyu ku lɛkanta?Di Israel Klekletɛ nwu suoto fɛɛtaka fayɛ!23Feefe di batɔkyɛntɛ lɛfɔ suotofeetufa SAATE nwu.Ni faabuɛ falɛ,“Ku bakeke nii ba di bapɔnkɔ nnanfi nilɛkata lɛkyɛ abokote nsintɛɛ,Lebanon katakalekɔ yɛntɛle.Lebudi sedar awoso nɔɔ takale lɛtɛ kaasɔ,ku awoso siene biene nɔɔ.Lɛlaadu katakalekɔ kyonle nɔɔ,ku apoo biene nɔɔ kamɛ.24Lakutu ntu abiɔ di bafɔɔ nsɔlanyi ntu nwu ninfa.Layɔ nkpaasɔ niilata Egipte koklenyii simuu lasɔɔ.”25“ ‘Fadinu?Bia saa latɛ ni.Di saa obe labla disibu nwu;mianwu ntɔɔta diɛwa kaanya nɛ,alɛ faabiɛ sekpoo kplɛ sienesinkple siyiɛkuu.26Batii lɛma dilabawɛ ɔnyɛɛ,dibabla ma ɔkpɛ, manfũ sinunsɔ kafɔɔ.Bate fɛle alesaa koofe,niɛkɔntɔ ni sɛfɔle, sɛfɔle,fɛle sɛfa ninkɔkɔntɔ ni di leyo osi,sin-yɔɔ ni fiɛ simamuɔ nii.27“ ‘Kafɔɔ n-ye nfũ fasi niiku obe wɔ fanwa fansifi niiku mmle fɛɛtaka fayɛ mi ni di suoto.28Ta fɛɛtaka fayɛ mi ni di suotodi suoto katoo lɛfɔ ɔtakatɛsa ntoodu ni atoko nii kafɔɔ oso yi,kamayɔ lɛkɔnii nii nkpee fɔ di onwun-yɔ ofutuwɛ nii kafɔɔ ntũ fɔ kaanya,nta fɔ fankple fansifidi osuku wɔ feefe fɛɛwa nii.’29“Oo Hesekia: Nle mmle nimale fɔ nsũ lɛtɛsaa:“Lɛlɛɛ le mmle bibale asaa ya di nnya amu niɛkɔntɔ nii,lɛlɛɛ nyɔɔfa kafɔɔ diputu kamɛ ale bibale.Kafɔɔ lɛlɛɛ tiɛfa bibapɛ asaa minfee,bibakpɛ nta awosobi afe, minle nya abi.30Diɛkyakaa nii, mba niebu ni di Yuda leyo kamɛkamase sidu kaasɔ mantika kafɔɔ abi di osi.31Diekye batii bule kamadie mankye Yerusalem,mba niawɛ ni nkpa dikudi madie mankye Sion Kobokote.SAATE wɔ Ninlenke ni okyiininimabla nle mmle.32“Nkpo oso nnya ɔlaa wɔ di SAATE nwu kobuɛ ni di Asiria ɔka suoto:“Ɔlɔbabuo okpoo kplɛ wɔ mmleee ataa kɔtaa kukunwii ninfũ.Ɔlɔbawa nwu ɔlɔɔkɔ ku kubidifunsaaee amana nwu akyi.33Osuku wɔ suoto eefe ɛɛwa nii, nnwu nwu suoto abakple ansifi nɛ;ɔlɔbabuo okpoo kplɛ wɔ mmle,”SAATE nwu niebuɛ.34“Kamayila okpoo kplɛ wɔ mmle kamaa ndiki nwu,ta leyooto nii ku kpɛmblatɛ nii Dawid leyooto oso.”35Ninfɛ di SAATE nwu tɔkyɛntɛ lakyɛ aalaalo batii nkpe kɔlafa-afosi-anɛ-banɔɔ di Asiria batii kasikɔ nɛ. Obe wɔ di mba niabu ni lasɛnkɛ ni ku olesɛ- mba niate ni bamuu ntookple bakpi!36Nioso Asiria ɔka, Senakerib layɔ asaa aakple nkpaamaa. Ni aakple aasifi Ninewe aalaasiɛ ninfa nɛ.37Dii ninwii, obe wɔ aatoosumu ni di Nisrok yaa olekatakɔ yi, babisuɔtɔbi nɔɔ Adramelek ku Sareser, lalo nwɔ ku kapamii baatɛ, ni baatoso baasifi Ararat kasɔ nɛ. Ni di obisuɔtɔbi nɔɔ Esarhadon layila nwɔ kaanya fɛ ɔka nɛ.The Seed Company