BAKA 212
Yuda Ɔka Yoas Lalolaa Olekatakɔ
1Di Yehu sɛka ole lɛlɛɛ kuɛsinle kamɛ, Yoas labale ɔka, aale sɛka di Yerusalem alɛɛ afosi-ana. Ɔya leyooto niale Sibia; aakye ni Beerseba.2Yoas labla nle niabuo ni SAATE nwu anu di alɛɛ nwu amuu di oletatɛ Yehoiada latuo nwɔ ni asaa.3Kafɔɔ batabibiɛ ntakalekɔ nwu; ni di batii lakple baalaatɔɔta sele, baatɔɔfiɛ olufui ninfa nɛ.4Ni di Yoas latɔkɔ olebatatɛ nwu alɛ, “Bifũ koto ko kumuu bɛɛwako ni fɛ asaa ɔta klekle nwu biwako SAATE nwu olekatakɔ- koto ko beefũ ni di batii ɔka kamɛ, koto ko beefũ ni di otii onwii, onwii ntam ɔka kamɛ ku koto ko bɛɛta diekye ni di otu lɛma kamɛ biwako olekatakɔ nwu.5Ta oletatɛ biala afũ koto di koto batɛtɛ onwii ɔkyɛ, aata bayɔ kũ balolaa lɛba lele bɛɛnya alɛ diɛlalaa di olekatakɔ nwu suoto.”6Kafɔɔ diabadu ni Ɔka Yoas alɛɛ afosi-anyɔ-ditiɛfa kamɛ, olebatatɛ diilolaa olekatakɔ nwu.7Nioso Ɔka Yoas lalɛɛ oletatɛ Yehoiada ku olebatatɛ bamba aakaalɛ ma alɛ, “Obe oso minoololaa olekatakɔ nwu niɛlalaa ni? Bitansinfũ koto kukunwii di kotobatɛtɛ lee nfũ, kafɔɔ biyɔ kũ bita baalolaa olekatakɔ nwu.”8Nioso olebatatɛ nwu lafũ baakpee alɛ blɔbasinfũ koto kukunwii di batii nwu ɔkyɛ, kafɔɔ blɔbalolaa olekatakɔ nwu mma bamu.9Ninfɛ di oletatɛ Yehoiada layɔ lɛlakaa ninwii, ni aadufu dituɛ di katĩita nini nɛ. Ni aayɔ ni aase di oleɔta akyikye ɔlɔɔkɔ, di koletanɛɛkyɛ, nse otii kobuo SAATE nwu olekatakɔ kamɛ. Olebatatɛ ba ninnyu ni kayoko n-yɔ koto ko kumuu bɛɛwako ni SAATE nwu olekatakɔ mankpee di lɛlakaa nwu kamɛ.10Obe lele bɛɛnya alɛ koto kplɛ nfɛ nsi di lɛlakaa nwu kamɛ yi, ɔka kukũ kpanatɛ ku oletatɛ-nɔɔfo nwa mamaka koto ko bɛɛwako ni di SAATE nwu olekatakɔ, man-yɔ mankpee di atofo kamɛ.11Nse batootofo koto ko kule nii, man-yɔ koto nwu manta otii wɔ beediki alɛ atoonyu ni olekatakɔ nwu ɔkpɛ ɔbla. Baayɔ kũ baata mba niabla ni ɔkpɛ di SAATE nwu olekatakɔ- asaa bawolatɛ ku ayo batofotɛ,12ayo bakpɛntɛ ku afuɔ babiɛtɛ. Baaya sewoso ku afuɔ ya baabibiɛ baata ni SAATE nwu olekatakɔ ololaa, baata kafɔɔ ato bamba amuu ya baakpee ni di olekatakɔ nwu ololaa kamɛ.13Batayɔ koto ko baawako ni SAATE nwu olekatakɔ baabla koto fututu babɛɛsi, kandiɛ sikũ, babɛɛsi, akyukyoo ee koto sɛɛle ee koto fututu asaa bamba awo baata SAATE nwu;14baayɔ kũ baata bakpɛntɛ ba niayɔ kũ baalolaa ni olekatakɔ nwu.15Batakaalɛ nkuntaa baakyeko mba baata ni koto nwu alɛ bata ni ɔkpɛ bablatɛ nwu, diekye baabla nwu ku nwaako ole nwaa kamɛ.16Batayɔ koto ko niakye ni lɛpɔɔ okpi asaaɔta ku okpile asaaɔta kamɛ baawako SAATE nwu olekatakɔ kamɛ; nkũ olebatatɛ kole kuale.17Di obe nwu kamɛ Siria ɔka Hasael lakata aakyɛ aalaadieko Gat okpoo kplɛ aalenkee nwu. Ni aamunikĩi alɛ oodieko Yerusalem nɛ.18Kafɔɔ Yuda ɔka Yoas layɔ akleklesaa ya di bate nɔɔ lakleklesa ni- Yosafat, Yoram ku Ahasia Yuda baka nwu- ku akyɛsaa ya di nnwɔɔ omu nɔɔ aakleklesa ni ku koto sɛɛle ko kumuu aanya ni di SAATE nwu olekatakɔ asaantɛkɔ ku lɛkayo, aayɔ nya aakyɛnko Siria ɔka Hasael, ni di nnwɔɔ kafɔɔ aadiɛ Yerusalem ɔkpɛko nɛ.19Ablasaa bamba di Yoas sɛka ole kamɛ ku n-ya amuu aabla nii, bɛɛkpana nya beekpee di Yuda baka sekofolaa kukũ kamɛ.20Yoas banɔɔfotii nɔɔ lakũ kawumbe di suoto nɔɔ ni baalo nwɔ di Bet Milo di osuku diosoo ninfe ni Sila.21Banɔɔfotii ba nialo nwɔ ni niale Simeat obisuɔtɔbi, Yosakar ku Somer obisuɔtɔbi, Yosabad. Aakpi, ni baakookaa nwɔ ku bate nɔɔ di Dawid Okpoo Kplɛ kamɛ nɛ. Ni di obisuɔtɔbi nɔɔ Amasia layila nwɔ kaanya fɛ ɔka nɛ.The Seed Company