BAKA 210
Baalo Ahab Banantii
1Ahab lawɛ babisuɔtɔbi afosi-akuɛnsĩ di Samaria. Nioso Yehu lakpana akũ aakyesee Samaria: aata banɔɔfotii, okpoo banɔɔfo ku Ahab babi disi banyuntɛ di Yesreel. Aabuɛ alɛ,2“Di saate lee babisuɔtɔbi nkpe ni di ɔkyɛ lee, di bapɔnkɔ ku bakeke ba di bapɔnkɔ nnanfi ni ku okpoo kplɛ wɔ beetofo oyoyiɛ beekyisa ni ku akpɛsaa nkpe ye nioso yi, nse kukũ ko mmle ledu ye odu,3biediki saate lee obisuɔtɔbi wɔ niɛtɛ alɛ ni, akpe ni kɔnɛɛ nwaa, biɛyɔ nwɔ bisiɛsa di ote lɛkakpomii suoto. Biɛkpɛ kakpɛ bita saate lee leyo nfɛ.”4Kafɔɔ baayɛkɛ, ni baabuɛ alɛ, “Nse baka banyɔ ditafuo oyila di anu nɔɔ, ni lɛ nfɛ di awo buafuo?”5Nioso lɛkayo asaa nyuntɛ, okpoo kplɛ nwu kanyayilatɛ, okpoo banɔɔfo ku babi asi banyuntɛ nwu lata Yehu kanya ka mmle alɛ, “Bakpɛmblatɛ lɛfɔ bule, bubabla lɛsaa lele fɛɛtɔkɔ wo. Bulɔbadiki kuonwii fɛ ɔka; afɔ bla lele feenyu falɛ dilɛ.”6Ninfɛ di Yehu lakpana kukũ nyɔɔfa aata ma aabuɛ alɛ, “Nse biyɛ mi kamaa, bibanu mi ɔlaa yi, ni biebudi saate lee babisuɔtɔbi asi, biɛyɔ biwakoe di Yesreel kɔsɛɛ nua akpa okle.”Obe nwu ɔka babisuɔtɔbi afosi-akuɛnsĩ nwu lawɛ ku okpoo kplɛ nwu banɔɔfotii ba niatoonyu ma ni asi nfũ.7Di kukũ nwu lababuo nii, basuɔtɔ ba mmle lakpaa ɔka babisuɔtɔbi ba mmle afosi-akuɛnsĩ bamuu baalaalo ma. Ni baayɔ asi lɛma nwu baakpee di nkyikyɛ kamɛ baayɔ baakyɛnko Yehu di Yesreel nɛ.8Obe wɔ di tɔkyɛntɛ nwu lalaabuo nii, aatɔkɔ Yehu alɛ, “Batɔɔwako ɔka babisuɔtɔbi asi nwu.”
Ninfɛ di Yehu latɔkɔ ma alɛ, “Bisiisa nya di akudi anyɔ, di okpoo kplɛ kayoko nwu kanya di kale kasɛ.”9Kaleesɛ ku oyita Yehu ladie. Ni aalaayila di batii nwu bamuu anu aabuɛ alɛ, “Biele lɛbɛ. Ami niataka di saate nii suoto, lalo nwɔ, kafɔɔ owe nielo mba mmle bamuu?10Ni bitofo bilɛ, ɔlaa kuonwii nnaa di SAATE nwu labuɛ ni di Ahab leyo suoto dilɔbasĩ ku ɔwa kaanya. SAATE nwu ntɔɔbla di nle aabuɛ aafenko ni di kpɛmblatɛ nɔɔ Elia suoto.”11Nioso Yehu lalo obiala niabu ni di Ahab leyo di Yesreel. Aalo banɔɔfotii nɔɔ bamuu, basiɛwo nɔɔ tintĩ ku olebatatɛ nɔɔ, atabu kuonwii lɛma aasiɛ nkpa.
Baalo Ɔka Ahasia Banantii
12Ninfɛ di Yehu ladie aasifi aakyɔɔ anu Samaria nɛ. Di Bet Eked, di lɛba le bɔɔlɛɛ ni Bafoso Bakpatɛ,13ni aakyakako Yuda ɔka Ahasia banantii bawo nɛ, ni aakaalɛ ma alɛ, “Bawe bile?”Ni baabuɛ alɛ, “Ahasia banantii bule, buosoo buɔwa bulɛ buɔbasɛɛsa ɔka leyo batii ku ɔkasanko Yesebel bale.”14Ni di Yehu labuɛ alɛ, “Bimufũ ma ku nkpa!” Nioso baamufũ ma ku nkpa baalo di Bet Eked ditubiɔ ɔlɔɔkɔ- batii afosi-ana-banyɔ baale. Atabu kuonwii asiɛ nkpa.
Baalo Ahab Banantii Ba Niabu Nii
15Aadie ni ninfa sɛmaa, aabakyakako Rekab obisuɔtɔbi, Yehonadab wɔ niatoofe nwɔ ni ɔkyakako. Ni di Yehu lasɛɛsɔɔ aakaalɛ nwɔ alɛ, “Fɛɛbla onwii ku ami, fe mmle lɛbla ni ku afɔ?”Ni di Yehonadab ladiki kanya alɛ, “Lɛbla.”
Ni di Yehu labuɛ alɛ, “Nse nkpo kute, ni kpee mi kɔnɛɛ.” Nkpo oso Yehu lakyakaako nwɔ aabuo di keke nɔɔ kamɛ.16Ninfɛ di Yehu labuɛ alɛ, “Tikankoe fabanyu mmle lɛyɔ nwu ni ole lɛta ni SAATE nwu.” Ninfɛ aatɔɔ aasiɛ di keke nɔɔ kamɛ baafenfe nɛ.17Obe wɔ di Yehu lawa ni Samaria, aalo mba bamuu niabu nii, baale ni Ahab leyo batii. Aawɔɔsa ma, di ɔlaa wɔ di SAATE nwu latɔkɔ ni Elia kanya.
Baalo Baal Basumutɛ
18Ninfɛ di Yehu lasiisa batii nwu bamuu aatɔkɔ ma alɛ, “Ahab lasumu Baal kɛɛkɛ; Yehu kamasumu nya ampɔɔsa.19Nunua bilɛɛ Baal ɔlaababuɛtɛtɛ bamuu, banɔɔfotii nɔɔ bamuu ku olebatatɛ nɔɔ bamuu. Binyu bilɛ kuonwii diedie kaamɛ, diekye kɔwa oleɔta kplɛ ɔbata ɔta Baal. Olele niesĩ ɔwa dilɔbasinsiɛ nkpa.” Kafɔɔ Yehu latɔɔbla nle mmle di kakyɔnkyɔ kanya di mmle aawɔɔsa ni Baal banɔɔfotii nwu.20Ni di Yehu labuɛ alɛ, “Bilɛɛ bawo bisiisa baata Baal dibu.” Nioso baayie nwu lɛkya.21Ninfɛ di Yehu lata kanya di Israel aafenko nɛ. Ni di Baal banɔɔfotii bamuu lawa nɛ, kuonwii ditabu. Baakya kpa di Baal kafiofa nwu dialaase di obe wɔ di leyo nwu layii ni di disi le dialaase ni di disi le.22Ni di Yehu latɔkɔ akpeele kleetɛ alɛ, “Yɔ Baal banɔɔfotii nwu akpeele amuu fawako.” Nioso aayɔ akpeele nwu aawako ma.23Ninfɛ di Yehu ku Rekab obisuɔtɔbi, Yehonadab lakyɛ Baal kafiofa nwu nɛ. Ni di Yehu latɔkɔ Baal banɔɔfotii nwu alɛ, “Binyu bifenko, bienyu bilɛ SAATE nwu bakpɛmblatɛ kuonwii nnaa ninfũ ku aye- Baal banɔɔfotii lete.”24Nioso baabuo kamɛ alɛ bɔɔta oleɔta ku ɔfiɛ asaaɔta. Ninfɛ di Yehu lakyesee basuɔtɔ afosi-anɛ kaayi ku ɔlaa wɔ mmle alɛ, “Nse onwii lee lɛta onwii lɛma ba kɔyɔ nkpee ye ni ninnɛɛ letoso, ni dibale nkpa lɛfɔ di nkpa nɔɔ disi.”25Di Yehu laloo ni oloo ofiɛ asaaɔta ɔta, ni aadiki banyuntɛ ku banɔɔfotii nɔɔ kanya alɛ: “Bikyɛ biɛlaalo ma, bitanta kuonwii latoso.” Nioso baasasafɔ ma baatɛ ku kapamii. Banyuntɛ ku banɔɔfotii nwu lafuki bakpi nwu baayu kaayi, ni baabuo di kafiofa nwu kaamɛ di Baal difiɔyo nwu nɛ.26Baadiki difuɔ klekle nwu di Baal difiɔyo baawako kayi babafiɛ ni.27Baakpa Baal difuɔ klekle nwu, baabibiɛ Baal difiɔyo baatɛ kaasɔ. Ni di batii nwu layɔ nfa baatika okpo diabase di dii le baakpana ni ɔlaa wɔ mmle nɛ.28Nioso Yehu lawɔɔsa Baal kasumu di Israel.29Kafɔɔ, Yehu ditadiɛ sikpile se di Nebat obisuɔtɔbi, Yeroboam labla nii, nse aata ni Israel labla nii- koto sɛɛle lɛnankyuebi osumu nwu di Betel ku Dan.30Ni di SAATE nwu latɔkɔ Yehu alɛ, “Ta feelolaa fɛɛbla, feeloo ni nle ninlɛ ni di anu nii, fɛɛbla ni Ahab leyo batii nle nimuu labla ni disibu nlɛ kɔbla ni oso yi, banantii lɛfɔ kamasiɛ di Israel lɛkakpomii ninaadu kɔna naafa suoto.”31Kafɔɔ Yehu ditatɛ suoto aale SAATE, Israel Yaa nwu kufiofa ku otu nɔɔ omuu. Atakyi di Yeroboam sikpile kamaa, nse aata Israel labla nii.Yehu Kukpi
32Di ayi nwu nkpo kamɛ, SAATE nwu lakye kasɔ aatɔɔkɔkɔlɛ Israel kasɔ. Ni di Hasael lalenkee Israel batii diafe ni di kasɔ lɛma suoto33di Yordan kufĩ katunkɔ di Gilead kasɔ kamuu (Gad, Ruben ku Manase kasɔ), diayɔ ni di Aroer di Arnon kɔwɛ ɔlɔɔkɔ diafe ni di Gilead dialaadu ni Basan.34Yehu sɛka ole sɛsaabla bule, n-ya amuu aabla nii ku n-ya aafũ ni leyooto nnya, bɛɛkpana nya beekpee di Israel baka sekofolaa kukũ kamɛ.35Yehu latɛ ɔnyɛɛ ku bate nɔɔ, ni baakookaa nwɔ di Samaria nɛ. Ninfɛ di obisuɔtɔbi nɔɔ Yehoahas layila nwɔ kaanya fɛ ɔka nɛ.36Obe wɔ di Yehu lale ni sɛka di Israel di Samaria labla alɛɛ afosi-anyɔ-anɛ.The Seed Company