2 KRONIKA9
Seba Ɔkasanko Lawa Solomon Ɔkyɛ
1Di Seba ɔkasanko lanu ni Solomon leyooto yi, ni aawa Yerusalem aabasɔ nwɔ aanyu ku sɛlaa kaalɛle se ninkpe ni osie nɛ. Aawa aababuo Yerusalem ku atoo kpinwu- ku kapubapɔnkɔ ba niatuka ni akɔnɔkɔnɔsaa, koto sɛɛlɛ kpinwu, ku afuɔ ya niefũ ni kɔya- ɔsanko nwu lawa Solomon nfũ aabakakatɛko nwɔ ku sɛlaa se simuu niasiɛ nwɔ ni di disi kamɛ.2Ni di Solomon ladiki sɛlaa kaalɛle nɔɔ simuu kanya nɛ; lɛsalɛsaa kuninwii ditawɛ nwɔ osie ku kasɔ odiki ɔta ɔkasanko nwu.3Di Seba ɔkasanko nwu lanya ni Solomon ninumbe, ku lɛkayo le aatofo nii,4alesaa ya di opunu nɔɔ suoto, banɔɔfotii nɔɔ nsiɛkɔ, akpeele ya di bakpɛmblatɛ nɔɔ lakpee nii, akpeele ya di nta banyɛɛnɛtɛ nɔɔ lakpee nii, ku ofiɛ asaaɔta ya anta ni di SAATE nwu olekatakɔ yi, diabla ɔkasanko nwu ɔkpɛ.5Ni aatɔkɔ ɔka Solomon alɛ, “Ɔlaa wɔ lanu ni di kale nii kamu lakyeko ni asaa ya fatɔɔbla ni ku ninumbe lɛfɔ nte nkpo.6Kafɔɔ ntafũ ɔlaa wɔ baabuɛ ni lanu diediki ntɔɔwa lɛbanya ku anu nii amu. Nwaako, batatɔkɔ mi bia ninumbe lɛfɔ kplɛ nwu kakyɛ nini; fatɔɔwaalɛ sɛlaa se lanu ni fanfa.7Nyu mmle di disi nlɛ ni batii lɛfɔ! Nyu mmle di suoto kɔyɔɔ ni banɔɔfotii lɛfɔ ba ninyila ni di anu lɛfɔ obe lele. man-nu ni kafɔɔ ninumbe lɛfɔ nwu!8Baatansa SAATE Yaa lɛfɔ nwu, nnwɔ feebuo ni anu ɛɛyɔ fɔ eesiɛsa ni di SAATE nwu lɛkakpomii suoto fɛ ɔka, alɛ faale sɛka fanta ni SAATE Yaa lɛfɔ nwu. Ta Yaa lɛfɔ lɛbɔmbɔ le akpe ɛɛta ni Israel ku mmle dile nwɔ ni dibiesaa alɛ ɔɔtakatɛsa ma ni katoo dinaa ni kaloo, oso eese fɔ ɔka di suoto lɛma, alɛ faaka lɛka tinini ku sɛsaabla tinini nɛ.”9Ninfɛ di ɔkasanko nwu lata ɔka koto sɛɛle onutũ fɛ bakilo nkpe-nna, akɔnɔkɔnɔsaa kpinwu, ku afuɔ ya niefũ ni kɔya nɛ. Diidii kuonwii ditasinwako akɔnɔkɔnɔsaa kpinwu ya mmle okle fɛ n-ya di Seba ɔkasanko nwu lata ni Ɔka Solomon.10(Huram batii ku Solomon batii lakyeko koto sɛɛle Ofir baawako; baayɔ kafɔɔ sewoso se niafũ ni kɔya ku afuɔ ya niafũ ni kɔya kpinwu baawako.11Ni di Ɔka Solomon layɔ sewoso nwu niafũ ni kɔya aabla nkatakɔ aata SAATE nwu olekatakɔ ku lɛkayo nwu nɛ, baabla kafɔɔ bakyitaa ku basanku baata sinu basantɛ. Badisin-nya lɛsalɛsaa fɛ nnya nkpo okle diidii di Yuda.)12Ɔka Solomon lata Seba ɔkasanko nwu asaa ya amuu oomiɛ ni, aakaalɛ nwɔ nii; aata ɔkasanko nwu asaa aalenkesa n-ya aawako nwɔ nii. Ninfɛ di ɔsanko nwu ku banɔɔfotii nɔɔ lakple baasifi kale lɛma kamu nɛ.Ɔka Solomon Lɛsaawɛ
13Koto sɛɛle ko di Solomon nfũ ni lɛlɛɛ biala onutũ labla bakilo nkpe afosi-anyɔ-nnyɔ,14di akpooto ya di asaa-bayatɛ ku asaa basunsũtɛ nkyeko manwako ni diesi ni kaamɛ. Arabia baka bamuu ku kasɔ nwu abaa kanyabayilatɛ kafɔɔ nkyeko koto sɛɛle ku koto fututu manwako Solomon.15Ɔka Solomon labla koto sɛɛle bɛɛbɛntɛ ni kubiafunsaa kplɛ alafa-anyɔ; kubidifunsaa biala lafũ fɛ koto sɛɛle bɛɛbɛntɛ ni bakilo bakuɔ.16Aabla kafɔɔ koto sɛɛle bɛɛbɛntɛ ni kubiafunsaa biibii alafa-atiɛ, di kubidifunsaa biala lafũ ni fɛle koto sɛɛle bakilo banyɔ. Ni di ɔka layɔ nya aalaatɛ di lɛba le bɔɔlɛɛ ni Lebanon Lepoo Lɛkayo kamɛ nɛ.17Ninfɛ di ɔka labla lɛkakpomii kplɛ ku bato anyɛɛ, aayɔ koto sɛɛle nwaa aakakaasa nɛ.18Lɛkakpomii nwu lawɛ nkatakɔ nkuɔ, baabla kafɔɔ nkpaa ditikasaa baakaasa ninni. Di lekpomii nwu sɛlɔɔkɔ nwu nnyɔ yi, nnɛɛ ntikakɔ lawɛ, di kyata layila ni di kabiala ɔlɔɔkɔ.19Bakyata lefosi-banyɔ layila di nkatakɔ nkuɔ nwu suoto, di onwii, onwii layila ni di kakatakɔ nwu biala kayɛntɛlekɔ. Badibla nninkpo okle di sɛka kalekɔ bamba kukanwii diidii.20Koto sɛɛle baayɔ baabla Ɔka Solomon sipũ simuu, leyo kamɛ awansaa amuu di Lebanon Lepoo Lɛkayo nwu kamɛ kafɔɔ lale koto sɛɛle nwaa. Batayɔ koto fututu baabla lɛsalɛsaa, diekye baanyu alɛ koto fututu diedie lɛsalɛsaa di Solomon obe kamɛ.21Ɔka lawɛ seklo se niatɔɔkyɛ ni lekpo osi manaaya ni asaa, Huram batii niatɔɔwa seklo nwu. Di alɛɛ atiɛ biala kamɛ yi, seklo nwu nkple sinwa ninwii, batuka ni koto sɛɛle, koto fututu, bato anyɛɛ, bakuo ku basɛ̀.22Ɔka Solomon lawɛ lɛsaawɛ kplɛ ku ninumbe aalenkee kasɔ ka mmle baka bule bamuu.23Kasɔ ka mmle baka bamuu nkyɛ Solomon ɔkyɛ manaanu ninumbe le di Yaa lɛyɔ eekpee ni di otu nɔɔ kamɛ.24Lɛlɛɛ biala yi, otii biala niɛkyɛ ɔkyɛ nɔɔ nkyɛnko nwɔ lɛkyɛsaa- fɛ koto fututu ku koto sɛɛle awansaa, ku akpeele, akpɛsaa ku akɔnɔkɔnɔsaa, bapɔnkɔ ku babɔkɛɛ ba ninte ni fɛ pɔnkɔ.25Solomon lawɛ bapɔnkɔ ayo nkpe nna aata bapɔnkɔ ku bakeke ba di bapɔnkɔ nnanfi ni, ku bapɔnkɔ basiɛtɛ nkpe lefosi-nnyɔ, mma aayɔ aase di bakeke sekpoo kplɛ nwu ku ɔkyɛ nɔɔ di Yerusalem nɛ.26Solomon lale sɛka di baka bamuu suoto diayɔ ni di Eufrate Okle dialaase di Filisti batii kasɔ, dialaadu bia Egipte kasɔ kɔmɛ.27Ɔka lata koto fututu labawɛ di Yerusalem fɛ afuɔ, sedar kafɔɔ labapɔ fɛ kowoso ko manlɛɛ ni sikamɔ-abue awoso di akpenkpe nkpaa.28Ɔklaa baaklaa Solomon bapɔnkɔ nwu baakyeko Egipte ku nnle bamba mmuu baawako.Solomon Sɛka Ole Sɛlaa Kakui
29Asaa bule ya di Solomon labla ni di sɛka olebee nɔɔ kamɛ, diayɔ ni di kasɔ kakyekɔ dialaase ni di kayɛntɛlekɔ nnya yi, bɛɛkpana nya beekpee di ɔlaabuɛtɛtɛ Nathan sekofolaa kukũ kamɛ, di Silo otii nwu Ahiya ɔlaa obuɛ ɔtɛ kamɛ, ku odiki otuo wɔ di asaanyatɛ Ido lanya aakyeko ni Nebat obisuɔtɔbi Yeroboam suoto.30Solomon lale sɛka di Israel omuu suoto di Yerusalem alɛɛ afosi-ana.31Ninfɛ aatɛ ɔnyɛɛ ku bate nɔɔ, ni baakookaa nwɔ di ote Dawid okpoo kplɛ nwu nɛ. Ni di obisuɔtɔbi nɔɔ Rehoboam layila nwɔ kaanya fɛ ɔka nɛ.The Seed Company