2 KRONIKA3
Solomon Latofo Olekatakɔ Nwu
1Ninfɛ di Solomon lakyekasɔ aatootofo SAATE nwu olekatakɔ di Yerusalem di Moria Kobokote osi nɛ, di nfũ di SAATE nwu ladiki suoto aatuo ni ote Dawid. Yebus otii nwu Ornan kakpaa kaale, lɛba le di Dawid ladiki aata nii.2Solomon lakye katofosɔ di Israel batii kɔwɛntɛ nyɔɔfa dii nyɔɔfa suoto di sɛka nɔɔ ole lɛlɛɛ naafa kamɛ.3Lɛsɔse le di Solomon lase aata ni Yaa olekatakɔ nwu otofo lɛkaana labla nkpaa afosi-anaasĩ, lɛblɛfɛ kafɔɔ labla nkpaa afosi-atiɛ (di lɛklapoosaa kofole kanya nɛ).4Lɛkpata nwu di olekatakɔ anu lɛkaana labla nkpaa afosi-atiɛ diasana diafe olekatakɔ nwu lɛblɛfɛ kanya, lɛtaka kafɔɔ labla nkpaa kɔlafa afosi-anɛ.Aayɔ koto sɛɛle nwaa aakakaasa kaamɛ.5Aayɔ odum ntaaboo aapɛ aakyisa lɛkpata nwu nimu, ni aatĩtĩi mi ku koto sɛɛle nwaa, ni aabla awɔsɔ ku kɔnyɛnɛ atembi aatika di suoto ninya nɛ.6Aakpee olekatakɔ nwu sɛlɛ ku afuɔ ya niefũ ni kɔya. Koto sɛɛle ko aablako ni ɔkpɛ kafɔɔ lale Parwaim koto sɛɛle.7Aayɔ koto sɛɛle aafifia di sɛkyan-woso, kayokontũ sewoso, seyoyiɛ ku olekatakɔ nwu akloo suoto, ni aawola kerubim atembi aatitika di seyoyiɛ nwu suoto nɛ.8Aatofo Kakleklekɔ Kaamɛ Kakleklekɔ, di lɛkaana nini lakyɛkyɛ ni ku olekatakɔ nwu lɛblɛfɛ- lɛkaana labla nkpaa afosi-atiɛ, lɛblɛfɛ kafɔɔ labla nkpaa afosi-atiɛ. Aayɔ koto sɛɛle nwaa onutũ bakilo afosi-anyɔ nkpe ntiɛ aatĩtĩi kamɛ.9Koto sɛɛle sibuɛ onutũ labla fɛ kilo ɔfã okle. Aatĩtĩi kafɔɔ osi lɛkyɛ ku koto sɛɛle.10Aabla bakerubim banyɔ aase di Kakleklekɔ Kaamɛ Kakleklekɔ nwu ni aatĩtĩi nya ku koto sɛɛle nɛ.11Bakerubim nwu afoko amuu lɛkaana labla fɛle nkpaa afosi-atiɛ. Kerubim nwu kasale kofoko kunwii lɛkaana labla nkpaa nkuɛnsĩ-anɛɛkpa-akuɔ dialakaa di olekatakɔ nwu oyoyiɛ, di kofoko nyɔɔfa nini kafɔɔ labla ni fɛle nkpaa nkuɛnsĩ-anɛɛkpa-akuɔ, diakaa ni di kerubim nwu nyɔɔfa kofoko.12Nkpo okle di kerubim nyɔɔfa nwu kofoko kunwii labla fɛle nkpaa nkuɛnsĩ-anɛɛkpa-akuɔ dialakaa di olekatakɔ nwu oyoyiɛ nyɔɔfa, kofoko nyɔɔfa nini kafɔɔ lɛkaana labla fɛle nkpaa nkuɛnsĩ-anɛɛkpa-akuɔ, dialakaa di kerubim kofoko kasale nwu suoto nɛ.13Bakerubim ba mmle afoko lɛblɛfɛ lawo nkpaa afosi-atiɛ. Baayila di nkpaa ninya suoto, baakyɔɔ lɛkpata kplɛ nwu anu.14Solomon lata baabla dibula le mansaka ni di leyo ku sikũ bluu ku n-se niɛbla ni fɛ ɔsɛɛ ku okũ sɛɛle bɔmbɔ ku dibula biene fɛnɛnɛɛ, ku kerubim letembi baakpee ni kaamɛ.
Solomon Labla Abɔɔsaa Sɛɛle Nkyɛ Nnyɔ
15Baabla akpaka anyɔ di olekatakɔ nwu anu, di amuu lɛkaana labla ni nkpaa afosi-anɔɔ-nnyɔ, dibiala lawɛ ditikasaa di osi di lɛkaana labla ni nkpaa nkuɛnsĩ-anɛɛkpa-akuɔ.16Aaloso anyɛnɛ aayɔ aatika di akpaka nwu osi. Aabla kafɔɔ awosobi ya ninte ni fɛle goowa kɔlafa, aayɔ nya aakyasa di anyɛnɛ nwu suoto.17Aatakatɛ akpaka nwu aase di olekatakɔ nwu anu, ninwii layila di kala kasɔ lɛkyɛ ninwii kafɔɔ layila di katookasɔ lɛkyɛ. Aata nle niayila ni di kalakasɔ leyooto alɛ Yakin, katookasɔ lele kafɔɔ alɛ Boas.The Seed Company