2 KRONIKA23
Ɔtaka Oyila Di Ɔkasanko Atalia Suoto
1Yehoiada ladiki osie nɔɔ aatuo di lɛlɛɛ kuɛnsinle kamɛ. Aabla kanya ninii ku bakpɛtɛ kɔlafa akudi kanyabayilatɛ: Yeroham obisuɔtɔbi Asaria, Yehohanan obisuɔtɔbi Ismael, Obed obisuɔtɔbi Asaria, Adaia obisuɔtɔbi Maaseia ku Sikri obisuɔtɔbi Elisafat.2Baakyɛ baakyi Yuda omuu baasiisa Lewi batii ku Israel ayo kamɛ banɔɔfo baakyeko sekpoo nwu simuu. Baabadu ni Yerusalem yi,3kasiisakɔ nwu kamuu labla kanya ninii ku ɔka di Yaa olekatakɔ.Yehoiada latɔkɔ ma alɛ, “Ɔka obisuɔtɔbi nwu kamale sɛka, fɛ mmle di SAATE nwu labuɛ aatɛ aata ni Dawid banantii.4Kanunua yi, nya lɛsaa le biɛbla ni: Aye olebatatɛ ku Lewi batii dikyuu tiɛfa ninwii le ninkyɛ ni ɔkpɛ kamɛ di Lɛnyɛɛtɛyi suoto batoonyu n-yoko,5dikyuu tiɛfa lee ninwii bawɛ di lɛkayo, di dikyuu tiɛfa ninwii kafɔɔ bawɛ di Lɛsɔse Kayoko. Batii bule bamuu kafɔɔ bawɛ di SAATE nwu olekatakɔ nflɔnkɔ.6Kuonwii atambuo SAATE nwu olekatakɔ diediki olebatatɛ ku Lewi batii ba ninkpe ni di ɔkpɛ kamɛ; baafuo obuo diekye beekleklesa ma suoto, kafɔɔ batii bule bamuu batoonyu ɔkpɛ wɔ di SAATE nwu lɛta ma ni.7Lewi batii bamana ɔka bakyi, otii biala lɛma aklee lɛkpɛsaa nɔɔ di kɔnɛɛ nɔɔ. Dikpe ni beelo otii lele niebuo olekatakɔ nwu kamɛ. Bikaako ɔka di kakɔ lele oofe.”8Lewi batii ku Yuda batii nwu bamuu labla fɛ mmle okle di oletatɛ Yehoiada labuɛ ni kanya. Obiala lakpaa batii nɔɔ- mba ninkyɛ ni ɔkpɛ kamɛ di Lɛnyɛɛtɛyi suoto ku mba nikokple ni di ɔkpɛ kamɛ- diekye oletatɛ Yehoiada ditadiɛ bakpɛmblatɛ dikudi kuninwii alɛ asifi leyo.9Ninfɛ di oletatɛ Yehoiada layɔ akplɔ ku kubiafunsaa akplɛ ku abibii ya niale ni Ɔka Dawid ale ya niate ni di Yaa olekatakɔ kamɛ aata akudi kɔlafa kanyabayilatɛ nwu nɛ.10Aayɔ batii nwu bamuu aasesee, obiala laklee lɛkpɛsaa nɔɔ di kɔnɛɛ nɔɔ, baamana ɔka baakyi- diakaako ni oleɔta akyikye ku olekatakɔ nwu, diayɔ ni di kalakasɔ lɛkyɛ dialaadu ni olekatakɔ nwu katookasɔ lɛkyɛ.11Ni di Yehoiada ku babisuɔtɔbi nɔɔ ladiki ɔka obisuɔtɔbi nwu baawako, ni baayɔ lɛkakoto baatukũsa nwɔ di disi; ni baayɔ kanya ninii kukũ nwu baakpee nwɔ ninnɛɛ, ni baase nwɔ sɛka nɛ. Baapɛ nwɔ ɔfɔɔ, baataa siwidi baabuɛ alɛ, “Yiiyiiduu, Ɔka asiɛ nkpa aklɛ!”12Obe wɔ di Atalia lanu ni batii nwu kotoso, mantaa ni siwidi, mantansa ni kafɔɔ ɔka yi, ni aakyɛ ɔkyɛ lɛma di SAATE nwu olekatakɔ nɛ.13Aanyu nii, ni aanya ɔka n-yɛ di lɛkpaka nɔɔ ɔlɔɔkɔ di kayoko nɛ. Bakpɛtɛ banɔɔfotii ku akyukyoo bafɛtɛ layila di ɔka ɔlɔɔkɔ, kasɔ nwu suoto batii bamuu kafɔɔ latɔɔnya suoto lɛyɔɔ, baatɔɔfɛ kafɔɔ akyukyoo, sinubasantɛ kafɔɔ laklee sinu asansaa baatɔɔsa katansa sinu. Ninfɛ di Atalia labɛbɛɛ akpeele wua nɔɔ, aafaa aabuɛ alɛ, “Kale abiɛsaa nɛ! Kale abiɛsaa nɛ!14Ni di oletatɛ Yehoiada lalɛɛ akudi kɔlafa kanyabayilatɛ nwu aasifiko kayi, mba niayila ni di bakpɛtɛ akudi kanya, ni aatɔkɔ ma alɛ: “Bidieko ɔsanko nwu di banyuntɛ nwɔ obo biwako kayi, bielo kafɔɔ otii lele nintikanko nwɔ ni ku kapamii.” Diekye oletatɛ nwu labuɛ alɛ, “Bitanlo nwɔ di SAATE nwu olekatakɔ kamɛ.”15Nioso baamufũ nwɔ di obe wɔ aadu ni Pɔnkɔ Kayoko kanya di lɛkayo kaflɔnkɔ, ni baalo nwɔ ninfa nɛ.
Yehoiada Lawako Kakyi
16Ninfɛ di Yehoiada labla kanya ninii alɛ nnwɔɔ ku batii nwu ku ɔka kamale SAATE nwu batii nɛ.17Ni di batii nwu bamuu ladie baakyɛ Baal olekatakɔ baalaabiɛ ka baatɛ kaasɔ nɛ. Baabibiɛ oleɔta akyikye ku afiɔtii nwu, ni baalo Baal oletatɛ Matan di oleɔta akyikye nwu anu nɛ.18Ninfɛ di Yehoiada layɔ SAATE nwu olekatakɔ onyu aakpee di olebatatɛ ba niale ni Lewi batii nnɛɛ nɛ. Mba di Dawid lata ni sɛkpɛ di olekatakɔ nwu kamɛ, alɛ baatɔɔta ni SAATE nwu ofiɛ asaaɔta fɛ mmle bɛɛkpana beekpee ni di Mose Kufiofa kukũ kamɛ. Di suoto lɛyɔɔ ku sinu ɔsa kamɛ, fɛ mmle di Dawid labuɛ ni kanya.19Aasesee kafɔɔ n-yoko banyuntɛ di SAATE nwu olekatakɔ n-yoko alɛ otii kuonwii di osuku lele suoto ananklekle ni dilaabuo nii.20Ni di Yehoiada lakpaa akudi kɔlafa kanyabayilatɛ, banɔɔfotii kplɛ, batii nwu batunletɛ ku kasɔ nwu batii bamuu ku nnwɔɔ, ni baasooko ɔka baakyeko SAATE nwu olekatakɔ baawako nɛ. Baafe di Katoo Kayoko baabuo lɛkayo nwu kamɛ, ni baasiɛsa ɔka di lɛkakpomii suoto,21ni di kasɔ nwu suoto batii bamuu lanya suoto lɛyɔɔ nɛ. Ni di okpoo kplɛ nwu lalo kanana nɛ, diekye baalo Atalia ku kapamii.The Seed Company