2 KRONIKA17
Yehosafat Labale Ɔka
1Ɔka Asa obisuɔtɔbi Yehosafat nfɛ niabale ɔka, ni aasiensa suoto nɔɔ di Israel suoto nɛ.2Aadiki bakpɛtɛ aakpee di Yuda sekpoo kplɛ siene simuu kamɛ ni aatɛ bakpɛtɛ nsiɛkɔ di Efraim sekpoo se di ote Asa lafũ ni nɛ.3SAATE nwu lasiɛko Yehosafat, diekye di alɛɛ nɔɔ kasale kamɛ yi, aakyɛ di sisuku se di ɔwa nɔɔ Dawid latikanko ni suoto. Atawolaa asaa kamɛ aakyeko Baal nfũ,4kafɔɔ aawolaa ote nɔɔ Yaa nwu, aatikanko kafɔɔ afiofa nɔɔ ya nintale ni Israel sɛsaabla.5SAATE nwu lata sɛka kalekɔ nwu layila kpinkpĩ di kalɔ nɔɔ; ni di Yuda batii bamuu layɔ akyɛsaa baawako Yehosafat nɛ, nioso aawɛ lɛsaawɛ kplɛ ku dibu.6Otu nɔɔ latika di SAATE nwu sisuku suoto; diɛkyakaa nii yi, aakpakpaa ntakalekɔ nwu ku Asera sewoso di Yuda.7Di sɛka nɔɔ ole lɛlɛɛ tiɛfa kamɛ yi, aakpee banɔɔfotii nɔɔ Ben-Hail, Obadia, Sekaria, Netanel ku Mikaia alɛ balaatuo asaa di Yuda sekpoo.8Lewi batii bawo lawɛ ku mma- mma niale Semaia, Netania, Sebadia, Asahel, Semiramot, Yehonatan, Adonigya, Tobia ku Tob-Adonigya- ku olebatatɛ Elisama ku Yehoram.9Baayɔ SAATE nwu Kufiofa Kukũ baaklee, ni baatuo asaa di Yuda omuu; baakyɛ baakyi Yuda sekpoo simuu ni baatuo batii nwu asaa nɛ.Yehosafat Asaa Kplɛ Ɔbla
10SAATE nwu lɛyɛkɛ lapɛ sɛka nlekɔ nsɔ be mmuu niamana Yuda siakyi nii, nioso batataka kakpɛ di Yehosafat suoto.11Filisti batii bawo lawako Yehosafat akyɛsaa ku koto fututu fɛ kɔsɔsĩ, Arab batii kafɔɔ lawako nwɔ babɔkɛɛ: akunumuu nkpe nkuɛnsĩ-alafa-akuɛnsĩ ku batie nkpe nkuɛnsĩ-alafa-akuɛnsĩ.12Yehosafat latɔɔwɛ osie aatɔɔkyakaa. Aatofo ayo siene ku sekpoo kplɛ asaa ntɛkɔ di Yuda,13aawɛ asaa ntɛkɔ kpinwu di Yuda sekpoo kamɛ. Aawɛ kafɔɔ bakpɛtɛ ba niatofo ni kakpɛ nwaa di Yerusalem.14Nnya mmle baadiki ma ni di ayo lɛma kanya:Mba niakye ni Yuda, baale ni kanyabayilatɛ di kakpe kanya nɛ: kanyayilatɛ nwu Adna, layila di bakpɛtɛ nkpe alafa-atiɛ kanya;15kanyayilatɛ Yehohanan nfɛ niatika, aayila di bakpɛtɛ nkpe alafa-anyɔ- afosi-anɛ kanya;16Sikri obisuɔtɔbi Amasia nfɛ niatika, nnwɔ niayɔ suoto nɔɔ aata ni SAATE nwu ɔkpɛ ɔbla kasakasa layila di bakpɛtɛ nkpe alafa-anyɔ kanya.17Mba niakye ni Benyamin niale: kpɛtɛ sientɛ nwu onwii niale ni Eliada, layila di bakpɛtɛ nkpe alafa-anyɔ ba niakpakũ ni kɔtaa ku kubiafunsaa kanya;18Nnwɔ nfɛ niatika ni niale, Yehosabad, aayila di bakpɛtɛ nkpe kɔlafa-afosi-anɛ ba niakpakũ ni akpɛsaa baata ni kakpɛ.19Mba mmle niale bakpɛtɛ ba niale ni ɔka bakpɛmblatɛ, baakyakaa ni di mba aayɔ aatɛ ni di sekpoo kplɛ siene nwu kamɛ di Yuda omuu nɛ.
The Seed Company