2 KRONIKA15
Kakyi Asaa Ya Di Asa Labla Nii
1Yaa Ninwuna labuo di Oded obisuɔtɔbi Asaria suoto.2Ni aadie aakyɛ aalaakyakako Asa aatɔkɔ nwɔ alɛ, “Bikyɔɔ mi atoko, Asa ku Yuda ku Benyamin omuu. SAATE nwu nsiko ye di obe wɔ bisi ni ku nnwɔɔ. Nse biewolaa nwɔ, bibanyɔɔ, kafɔɔ nse biesĩ nwɔ yi, abasĩ ye.3Ditɔɔklɛ di Israel ditawɛ ni Yaa omuomu, batawɛ oletatɛ wɔ nikatuo ma ni asaa, batawɛ kufiofa kafɔɔ.4Kafɔɔ di nimiina lɛma kamɛ yi, baamunikĩi baawa SAATE nwu nfũ, Israel Yaa nwu, baawolaa nwɔ, ni baanyɔɔ kafɔɔ nɛ.5Di obe nwu kamɛ yi, falaafuo osuku ɔkyɛ okyikyii di atoko ɔkyɛ ole kamɛ, diekye batii ba bamuu niasiɛ ni di kasɔ nwu suoto lasiɛ di amumu kplɛ ɔbla kamɛ.6Kale kanwii ntaka di kale bamba suoto, okpoo kplɛ kafɔɔ ntaka di okpoo kplɛ bamba suoto, diekye Yaa latookpee ma kubuɛ ku amiina ateate biala.7Kafɔɔ aye yi, biwɛ osie, bitanta disi, diekye babata ye letota di ɔkpɛ wɔ biɔbla ni suoto.”8Obe wɔ di Asa lanu ni sɛlaa se mmle ku Oded obisuɔtɔbi ɔlabuɛtɛtɛ Aseria ɔlaa obuɛ ɔtɛ nwu yi, aawɛ otu. Aakpakpaa ayududusaa afiɔtii nwu di Yuda ku Benyamin kasɔ kamuu ku sekpoo se aafũ ni di Efraim akpenkpe kamɛ. Asa lalolaa SAATE nwu oleɔta akyikye ya niayila ni di SAATE nwu olekatakɔ lɛkpata sitũ.9Ninfɛ di Asa lasiisa Yuda ku Benyamin omuu ku batii ba niakye ni Efraim, Manase ku Simeon ba nintɔɔwa basi ni kaamɛ lɛma nɛ. Diekye batii kpinwu lakye Israel baawa ɔkyɛ nɔɔ di obe wɔ baanya alɛ SAATE Yaa nsiko nwɔ nii.10Baasi di Yerusalem di Asa sɛka olebee lefosi lɛlɛɛ nɔnle di kɔwɛntɛ tiɛfa kamɛ.11Di obe nwu kamɛ baayɔ banankyue nkpe alafa-akuɛnsĩ, bafoso ku batie nkpe-nkuɛnsĩ ba baakyeko kakpɛ kamɛ asaa ya baayɔ baawako ni baata ole baata SAATE nwu.12Baabla kanya ninii kanwii alɛ boowolaa SAATE nwu, bate lɛma Yaa nwu, ku otu lɛma ku ɔkla lɛma omuu.13Batii bamuu ba ninamawolaa ni SAATE Israel Yaa nwu yi, babalo ma, obisɔ ee ɔnɔɔfo, osuɔtɔ ee ɔsanko.14Ni baaka ntam baata SAATE nwu, ku sɛlɔ siene ku kudu oyiisa ku akyukyoo ku babɔkɛɛ akya nɛ.15Yuda omuu lanya suoto lɛyɔɔ di ntam nwu ɔka suoto, diekye baaka mi ku otu lɛma omuu. Baawolaa Yaa osie kanya, ni baanyɔɔ nɛ. Nioso SAATE nwu lata ma ɔnyɛɛ ɔtɛ di ɔfankyi biala.16Ɔka Asa latakatɛ ɔwa nɔɔ sanko Maaka di lekpomii nɔɔ fɛ ɔkasanko, ta aabla ni afiɔ-sanko ya bɔɔlɛɛ ni Asera owoso diyududusaa oso. Asa labudi owoso nwu aatɛ kaasɔ, ni aabubudi nwu aakpee di ɔtɔ aafiɛ di Kidron Ɔtaata nɛ.17Nu atakpakpaa ntakalekɔ nwu di Israel yi, Asa otu omuu latika di SAATE nwu suoto di nkpa nɔɔ osiɛ mmuu kamɛ.18Ni aayɔ koto fututu ku koto sɛɛle ku awansaa ya di nnwɔɔ ku ote ladiki ni kayi aawako di Yaa olekatakɔ nɛ.19Kakpɛ kukanwii ditasinwɛ dialaase di ɔka Asa sɛka olebee alɛɛ afosi-atiɛ-lɛnɔnle kamɛ.The Seed Company