1 SAMUEL8
Israel Batii Lakaalɛ Alɛ Base Ɔka Bata Ma
1Obe wɔ di Samuel ntoobe nii, aayɔ babisuɔtɔbi nɔɔ aase batunletɛ aata Israel.2Obi nɔɔ kasale leyooto niale Yoel, ɔnyɔɔfa leyooto kafɔɔ niale Abiya, baale batunletɛ di Beerseba.3Kafɔɔ babisuɔtɔbi nɔɔ nwu ditakyɛ di sisuku nɔɔ suoto. Baatikanko lɛlɛ, baatoofũ ditunu kamɛ asaa, baasĩ aka tinini ɔka.4Nioso Israel banɔɔfo bamuu lasi kanya baawa Samuel nfũ di Rama.5Baabatɔkɔ nwɔ alɛ, “Fatoobe, babisuɔtɔbi lɛfɔ kafɔɔ diɛkyɛ di sisuku lɛfɔ suoto; nioso nunua se ɔka, aaleko wo katũ, fɛ mmle di nnle bamba mmuu nkpe ni baka.”6Kafɔɔ baabuɛ ni alɛ, “Ta wo ni ɔka aaleko wo ni katũ,” yi, ɔlaa nwu ditamɛnɛmɛnɛ Samuel; nioso aapɛ ɔlaa aata SAATE nwu.7Ni di SAATE nwu latɔkɔ nwɔ alɛ, “Nu ɔlaa wɔ omuu di batii nwu kɔtɔkɔ fɔ ni; diele afɔ beesĩ, kafɔɔ batoosĩ mi fɛ ɔka lɛma.8Fɛ mmle baabla ni diayɔ ni di dii le lakpaa ma ladieko ni di Egipte diɛbadu ni miɛ dii le mmle, baasĩ mi nii, baakyɛ baalaatoosumu ni afiɔ bamba yi, nkpo bɔɔyɔ mambla fɔ nɛ.9Nunua nu ma ɔlaa; kafɔɔ funaa ma nwaa, faata ma batofo lɛsaa le di ɔka wɔ nimale ni sɛka di suoto lɛma kamabla ni.”10Samuel labuɛ SAATE nwu sɛlaa simuu aatɔkɔ batii ba niatɔɔkaalɛ nwɔ alɛ ata ma ni ɔka.11Aabuɛ alɛ, “Nnya lɛsaa le di ɔka wɔ nimale ni sɛka di suoto lee kamabla ni: Abakpaa babisuɔtɔbi lee, anta ma mambla ɔkpɛ ku bakeke ba di bapɔnkɔ nnanfi ni, ku bapɔnkɔ nɔɔ, babatoso kafɔɔ manle bakeke nɔɔ ba di bapɔnkɔ nnanfi ni katũ.12Abata bawo mbla kanya bayilatɛ manta nkpe ku afosi-anɔɔ. Babamba mafuu kasɔ nɔɔ manfee alesa nɔɔ, fiɛ di babamba kafɔɔ kamabla kakpɛ akpɛsaa ku akpɛnsaa manta bakeke nɔɔ di bapɔnkɔ nnanfi nii.13Abayɔ babisankobi lee manle nnɔnyi kɔnɔkɔnɔ bablatɛ ku alesaa bawantɛ ku bloblo bafiɛtɛ.14Abafũ afe lee biene ku nta awosobi afe ku nnɔnyi awoso afe an-yɔ anta bakpɛmblatɛ nɔɔ.15Abafũ atitabi lee dikyuu fosile ku nta lee an-yɔ anta banɔɔfotii ku bakpɛmblatɛ nɔɔ.16Anfũ basuɔtɔ bakpɛmblatɛ ku basanko bakpɛmblatɛ lee ku banankyue ku babɔkɛɛ ba nintuka ni atoo biene lee anta nnwɔɔ omu ɔkpɛ ɔbla.17Abafũ babɔkɛɛ sele lee dikyuu fosile, aye bamu kafɔɔ bibakple nwɔ balanle.18Nse dii nwu nkpo lewo, bibawi minkaalɛ lɛkyakaako minkyeko ɔka wɔ biediki ni nfũ. SAATE nwu kafɔɔ dilɔbatuna ata ye di dii nwu nkpo.”19Kafɔɔ batii nwu lasĩ batakyɔɔ Samuel ɔlaa atoko, ni baabuɛ alɛ, “Oowo! Buomiɛ ɔka munta suoto.20Ni bubate fɛle nnle bamba mmuu, ku ɔka wɔ nimaleko wo ni katũ, anleko wo ni katũ, ankpɛ nkpɛ loo anta wo nii.”21Di Samuel lanu ni sɛlaa se simuu di batii nwu labuɛ nii, ni aase sĩ dibuɛ ɔtɔkɔ SAATE nwu nɛ.22Ni di SAATE nwu ladiki kanya alɛ, “Nu ma ɔlaa, faata ma ɔka.”Ninfɛ di Samuel latɔkɔ Israel batii nwu alɛ, “Obiala lee akple aasifi okpoo nɔɔ.”
The Seed Company