1 SAMUEL3
SAATE Nwu Ladiki Suoto Aatuo Samuel
1Osuɔtɔbi Samuel nwu latɔɔbla ɔkpɛ di SAATE nwu anu di Eli kalɔ. Di obe nwu nkpo kamɛ, SAATE nwu ɔlaa ditatɛ kuawɛ; odiki otuo kpinwu ditawɛ.2Dii ninwii kakyɛ, Eli wɔ di anu nɔɔ nfɛ nte ni tutufuu, alɛ sebe fiɛ nfɛ ɔɔnya nii, late di katenkɔ nɔɔ.3Yaa ɔtɔ nwu kafɔɔ diinii, Samuel kafɔɔ late di SAATE nwu olekatakɔ kamɛ, di nfũ di Yaa lɛlakaa nwu n-yɛ nii.4Ninfɛ di SAATE nwu lalɛɛ Samuel nɛ.Samuel latuna alɛ, “Nnyɛɛ.”5Ni aatoso aakyɛ Eli nfũ aalaatɔkɔ nwɔ alɛ, “Fɛɛlɛɛ mi; nnyɛɛ.”
Kafɔɔ Eli labuɛ alɛ, “Ami ninlɛɛ fɔ; kple faatɔɔkyɛ falaate.” Nioso Samuel lasifi aalaate.6SAATE nwu lakple aalɛɛ alɛ, “Samuel!” Ni di Samuel lataka aakyɛ Eli nfũ aalaatɔkɔ nwɔ alɛ, “Fɛɛlɛɛ mi; nnyɛɛ.” Ni di Eli labuɛ alɛ, “Obi nii, ninlɛɛ fɔ; kple faatɔɔkyɛ falaate.”7Obe nwu Samuel diitofo SAATE nwu: Badidiki SAATE nwu ɔlaa batuo nwɔ.8SAATE nwu lalɛɛ Samuel ditiɛfa, ni di Samuel lataka aakyɛ Eli nfũ aalaatɔkɔ nwɔ alɛ, “Fɛɛlɛɛ mi; nnyɛɛ.”
Ninfɛ di Eli latofo alɛ SAATE nwu nikɔlɛɛ osuɔtɔbi nwu nɛ.9Nioso Eli latɔkɔ Samuel alɛ, “Tɔɔkyɛ faalaate, nse eekple ɛɛlɛɛ fɔ, faabuɛ falɛ, ‘SAATE, kakatɛ, diekye kpɛmblatɛ lɛfɔ konu.’ ” Nioso Samuel lakple aalaate di katenkɔ nɔɔ.10Ni di SAATE nwu labayila ninfa, aatɔɔlɛɛ fɛ obe nwu alɛ, “Samuel! Samuel!”
Ninfɛ di Samuel labuɛ alɛ, “Kakatɛ, kpɛmblatɛ lɛfɔ konu.”11Ninfɛ di SAATE nwu latɔkɔ Samuel alɛ: “Nyu, kɔwa lɛsaa ninwii ɔbabla di Israel nimata alɛ ɔfɔɔ kamasifi otii biala atoko nienu nwu nii.12Di obe nwu kamɛ kamabla lɛsaa biala le labuɛ layila ni di Eli leyo batii suoto- diɛyɔ ni di kasɔ kakyekɔ diɛlaase ni di kayɛntɛkɔ.13Diekye latɔkɔ nwɔ nlɛ kamakanko leyo nɔɔ batii dinaa ni kaloo, ta sikpile se aatofo sĩ ni ole; babisuɔtɔbi nɔɔ lɛbla suoto lɛma mbusuo lɛsaa, kafɔɔ aasĩ, ataka ma.14Nioso, lɛka ntam lɛta Eli leyo nlɛ, ‘Oleɔta ee asaaɔta dilɔbafuo Eli leyo sikpile ɔkpanaa diidii.’ ”15Samuel late dialaadu olesɛ fiɛ aasɛkɛtɛ SAATE nwu leyo n-yoko. Aayɛkɛ odiki otuo nwu ɔtɔkɔ Eli.16Kafɔɔ Eli lalɛɛ nwɔ aatɔkɔ alɛ, “Obisuɔtɔbi nii, Samuel.”
Ni di Samuel latuna alɛ, “Nnyɛɛ.”17Ninfɛ di Eli lakaalɛ nwɔ alɛ, “Obe di SAATE nwu latɔkɔ fɔ? Tan-yɔ nwu faawofasɛɛ. Yaa ananfi fɔ kootoko, aata ni diwɛ osie nwaa, nse fɛɛyɔ lɛsaa lele aatɔkɔ fɔ feewofasɛɛ.”18Nioso Samuel latɔkɔ nwɔ lɛsaa biala, atayɔ lɛsalɛsaa aawofasɔɔ. Ninfɛ di Eli labuɛ alɛ, “Nnwɔɔ ninle SAATE nwu nɛ, ta abla nle ninlɛ nwɔ ni di anu nɔɔ.”19Di Samuel lamuɔ nii, SAATE nwu lasiɛko nwɔ, aata ɔlaa nɔɔ biala lawa kaanya.20Nioso Israel omuu, diayɔ ni di Dan dialaadu ni Beerseba latofo alɛ beese Samuel fɛle SAATE nwu ɔlaa buɛtɛtɛ.21SAATE nwu lakple aatoodiki suoto aatootuo di Silo, nfa kafɔɔ aatoodiki suoto nɔɔ aatootuo Samuel diafe ni di ɔlaa nɔɔ kamɛ nɛ.
The Seed Company