1 SAMUEL21
Dawid Latoso Aadiɛ Saul
1Ninfɛ di Dawid lasifi Nob, di oletatɛ Ahimelek ɔkyɛ nɛ. Difu lapɛ Ahimelek di obe wɔ aakyakako nwɔ nii, ni aakaalɛ nwɔ alɛ, “Be oso di lete lɛfɔ dile? Be oso di kuonwii dietikanko fɔ?”2Ni di Dawid latɔkɔ oletatɛ Ahimelek alɛ, “Ɔka lekpee mi kɔtɔ ku sɛlaa sewo, aatɔkɔ mi alɛ, ‘Otii kuonwii atantofo lɛsalɛsaa di ɔkpɛ lɛfɔ ku afiofa lɛfɔ suoto.’ Batii nii mma, lɛtɔkɔ ma nlɛ bakyakako mi di lɛba ninwii.3Nunua, obe ninkpe fɔ? Tɛɛ bloblo akudi anɔɔ ee lɛsaa lele fɛɛwɛ.”4Kafɔɔ oletatɛ nwu latɔkɔ Dawid alɛ, “Nnaa bloblo nwaa kuonwii nunua; kafɔɔ, bloblo wɔ beekleklesa ni owo nte ninfũ- nse basuɔtɔ nwu diete ɛfankyi ɛnyɔ.”5Ninfɛ di Dawid ladiki kanya alɛ, “Nwaako, bɛɛblasa basanko di suoto loo, di obe lele ledie. Basuɔtɔ nwu suoto lɛbla Klekle, bia di sɛkpɛ se ninambla ni Klekle suoto. Fiɛ dibawa alɛ miɛ nfɛ!”6Nioso oletatɛ nwu latɔɔ bloblo klekle nwu. Diekye bloblo kuonwii ditate diediki bloblo wɔ di SAATE nwu Opunu suoto baadiki ni di SAATE nwu anu, mankplesa kafɔɔ bloblo kpankpa manaatɛ di dii le bɛɛyɔ nwɔ nii.7Di dii nwu nkpo, Saul kpɛmblatɛ onwii lawɛ ninfa, baatɔɔ aasiɛ di SAATE nwu anu. Saul bafoso bakpatɛ ɔnɔɔfo aale, leyooto nɔɔ niale Doeg, Edom otii aale.8Ninfɛ di Dawid lakaalɛ Ahimelek alɛ, “Fanaa lɛkplɔ ee kapamii ninfũ? Ninwako kapamii ee lɛkpɛsaa nii kuninwii, diekye ɔka ɔkpɛ nwu labla kpatakpata.”9Ni di oletatɛ nwu latɔkɔ Dawid alɛ, “Goliat, Filisti otii wɔ faalo ni di Ela Ɔtaata kapamii nte ninfũ. Beeninii ka di dibula kamɛ kate di simu akpeele nwu sɛmaa. Nse nka foomiɛ, yɔ ka; kapamii kukanwii diete ninfũ diediki nkankpo.”Ni di Dawid labuɛ alɛ, “Kukanwii diete fɛle nka-nkpo; yɔ ka fatɛɛ.”10Dii nwu nkpo Dawid latoso aadiɛ Saul aasifi Gat ɔka Akis nfũ.11Kafɔɔ Akis bakpɛmblatɛ lakaalɛ nwɔ alɛ, “Diele Dawid nɛ, kasɔ nwu ɔka nɛ? Diele nnwɔ suoto sinu bɔɔsa ni di ntũ lɛma kamɛ alɛ:“ ‘Saul lalo nkpe nɔɔ,Dawid kafɔɔ nkpe afosi nɔɔ’?”12Dawid lamufũ sɛlaa se mmle aakpee di otu, nioso aatɔɔyɛkɛ Gat ɔka Akis osie kanya.13Nioso aakũ aabla fɛ diete nwɔ nwaa di anu lɛma; aawɛ ma ni ninnɛɛ aatɔɔbla fɛle fiibuotɛ. Aatɔɔkyankya n-yoko akloo suoto, aatoosoosa anyakyɔ aatookpete di okusu nɔɔ.14Ninfɛ di Akis latɔkɔ bakpɛmblatɛ nɔɔ alɛ, “Binyu osuɔtɔ nwu! Diete nwɔ nwaa! Be oso biɛkpaa nwɔ biɛwakoe?15Bafiibuotɛ ninaa mi ni oso dikaatɛ alɛ biɛkpaa otii wɔ mmle biɛwako nfũ alɛ abatɔɔbla asaa ya mmle di anu nii? Dikaatɛ osuɔtɔ wɔ mmle kawa leyo nii?”
The Seed Company