1 SAMUEL11
Saul Lalenkee Amon Batii
1Ninfɛ di Amon otii Nahas lakata aakyɛ aalaamana Yabes Gilead aakyi nɛ. Ni di Yabes basuɔtɔ bamuu latɔkɔ nwɔ alɛ, “Binii kanya ku awo, ni bubasiɛ ye kaalɔ.”2Kafɔɔ Nahas, Amon otii nwu ladiki kanya alɛ, “Kamanii kanya ku aye di osuku wɔ mmle suoto alɛ kadiki obiala lee koletanɛɛ ninu, ninkpee Israel omuu sinunsɔ.”3Ni di Yabes banɔɔfo latɔkɔ nwɔ alɛ, “Ta wo ayi akuɛnsĩ buokpee batɔkyɛntɛ baakyi Israel omuu bafenko; nse kuonwii diɛwa abafũ wo yi, ni bubata disi.”4Obe wɔ di batɔkyɛntɛ nwu lawa ni Gibea, nfũ di Saul nsi nii, baatɔkɔ ni batii nwu ɔlaa nwu yi, bamuu lɛma baawi kaku osie kanya.5Nfanwu Saul latooyie koofe, aatikanko banankyue nɔɔ, ni aakaalɛ alɛ, “Obe nikɔbla batii nwu? Be oso boowi kaku?” Ni baase kanya ka di Yabes basuɔtɔ nwu lababuɛ ni ɔtɔkɔ nwɔ nɛ.6Di Saul lanu ni sɛlaa lɛma nwu, Yaa Ninwuna labuo nwɔ di suoto ku osie, ni di ɔblɔ lafiɛ nwɔ nɛ.7Ni aadiki banankyue banyɔ, aasasafɔ ma wɛkyɛwɛkyɛ, aayɔ kɔkyɛɛkɔkyɛɛ nwu aata batɔkyɛntɛ nwu baakyɛnko Israel omuu baatoobuɛ alɛ, “Nnya lɛsaa le bababla ni banankyue ba ninle ni otii lele ninantikanko ni Saul ku Samuel.” Ninfɛ di SAATE nwu difu lapɛ batii nwu, ni baadie fɛ otii onwii nɛ.8Obe wɔ di Saul lasiisa ma ni di Besek, Israel batii lɛpɔ labla nkpe alafa-atiɛ, Yuda batii kafɔɔ labla nkpe afosi-atiɛ.9Ni baatɔkɔ batɔkyɛntɛ ba niawa ni alɛ, “Bitɔkɔ Yabes Gilead batii bilɛ, ‘Kɔsɛɛ obe wɔ kuufĩ ntoobe nii yi, babadiki ye.’ ” Di batɔkyɛntɛ nwu lakyɛ baalaabuɛ ni ɔlaa wɔ mmle baatɔkɔ ni Yabes batii, suoto layɔɔ ma.10Ni baatɔkɔ Amon batii alɛ, “Kɔsɛɛ bubayɔ suoto loo munkpee ye ninnɛɛ, mimbla wo kafɔɔ lɛsaa lele ninlɛ dita ye.”11Kaleesɛ, Saul lasɛ batii nwu di akudi atiɛ nɛ; di kolesɛtũ baalaabuo Amon batii kasiɛkɔ, baaloloo ma dialaadu kakũ. Baasamiisa mba niabu baasiɛ ni nkpa kamɛ, alɛ batii banyɔ dilaasiɛ di lɛba ninwii.12Ninfɛ di batii latɔkɔ Samuel alɛ, “Bawe niakaalɛ alɛ, ‘Saul nimale sɛka di suoto loo?’ Bikpaa batii nwu biwako wo buolo ma.”13Kafɔɔ Saul labuɛ alɛ, “Kuonwii dilɔbalo otii miɛ, diekye miɛ dii le mmle SAATE nwu ntoodiki Israel.”14Ninfɛ di Samuel latɔkɔ batii nwu alɛ, “Biwa biɛta bukyɛ Gilgal buɔladiki sɛka nwu kayi ninfa.”15Nioso batii nwu bamuu lakyɛ Gilgal, ni baalaadiki Saul kayi fɛ ɔka di SAATE nwu anu nɛ. Ni baata suoto lɛyɔɔ asaaɔta di SAATE nwu anu ninfa nɛ. Ni di Saul ku Israel batii bamuu lanya suoto lɛyɔɔ kplɛ nɛ.The Seed Company