BAKA I4
Solomon Banɔɔfotii Ku Kanyabayilatɛ Nɔɔ
1Nioso Ɔka Solomon lale sɛka di Israel omuu suoto.2Nnya mba mmle niale banɔɔfotii nɔɔ finle nɛ:Sadok obisuɔtɔbi Asaria niale- oletatɛ;3Sisa babisuɔtɔbi Elihoref ku Ahiya niale kukũ- bakpanatɛ; Ahilud obisuɔtɔbi Yehosafat niale- asaa nsũtɛtɛ;4Yehoiada obisuɔtɔbi Benaia niale- bakpɛtɛ kanyayilatɛ-nɔɔfo; Sadok ku Abiatar niale- olebatatɛ;5Natan obisuɔtɔbi Asaria niale- kale bɛɛsɛ ni kukudi, kukudi kanya banɔɔfotii; Natan obisuɔtɔbi Sabud niale- oletatɛ ku otii wɔ ninka ni ɔka;6Ahisar- niayila di lɛkayo kanya; Abda obisuɔtɔbi Adoniram- niayila di osie sɛkpɛ ɔbla kanya.7Solomon kafɔɔ lawɛ kale bɛɛsɛ ni kukudi, kukudi kanyabayilatɛ lefosi-banyɔ di Israel omuu suoto, mma ninkyɛnko ɔka ku ɔka leyo batii alesaa nɛ. Obiala lɛma nkyɛnko alesaa nfa kɔwɛntɛ kunwii di lɛlɛɛ kamɛ.8Nnya ayooto lɛma ninle n-ya mmle nɛ:
Ben-Hur- lawɛ di Efraim lekpenkpe kale;9Ben-Deker- lawɛ di Makas, Saalbim, Bet Semes ku Elon Bet-hanan;10Ben-Hesed- lawɛ di Arubot (Soko ku Hefer nsɔ mmuu lale nwɔ nle);11Ben-Abinadab- lawɛ di Nafot Dor (Solomon obisankobi Tafat aayɔ);12Ahilud obisuɔtɔbi Baana- lawɛ di Taanak ku Megido, ku Bet San ntɛɛ nwu omuu niɛtɛtɛɛ ni Saretan di Yesreel nkpaalɔ, diayɔ ni di Bet San diasifi ni Abel Mehola diataalɛ diasifi ni Yokmeam;13Ben-Geber- lawɛ di Ramot Gilead (nkpayotũ be niawɛ ni di Gilead lale Manasse obisuɔtɔbi Yair nle, diɛkyakaa ni di Argob kale dikudi di Basan ku ekpoo kplɛ afosi-akuɔ be baatofo seyoyiɛ baakyisa ni baakpee ni abɔɔsaa sewoso n-yoko);14Iddo obisuɔtɔbi Ahinadab- lawɛ di Mahanaim;15Ahimaas- lawɛ di Naftali (aayɔ ni Solomon obisankobi Basemat);16Husai obisuɔtɔbi Baana- lawɛ di Aser ku Alot;17Parua obisuɔtɔbi Yehosafat- lawɛ di Isakar;18Ela obisuɔtɔbi Simei- lawɛ di Benyamin;19Uri obisuɔtɔbi Geber- lawɛ di Gilead (kale ka niale ni Amori batii ɔka Sihon ku Basan kale ɔka Og kale). Lete nɔɔ niale kale nwu bɛɛsɛ ni dikudi, dikudi kanyayilatɛ nɛ.
Solomon Lɛlɛ Di Sɛka Ole Kamɛ
20Yuda ku Israel batii lapɔ fɛ lekpo ɔtɛnsĩa; baale baanyi, baanya suoto lɛyɔɔ kafɔɔ.21Nioso Solomon lale sɛka di sɛka nlekɔ nwu mmuu, diayɔ ni di Eufrate Okle dialaase di Filisti batii kasɔ, dialaadu bia Egipte kasɔ kɔmɛ. Nnle be mmle lawako Solomon kɔsɔsĩ, ni baasiɛ nwɔ kaalɔ di nkpa nɔɔ mmuu osiɛ kamɛ nɛ.22Dii ninwii alesaa ya manta ni Solomon niale nnaafũ muɛmuɛ bakankyi alafa atiɛ ku nnaafũ kakyakakya bakankyi kɔlafa afosi-anɔɔ,23banankyue sele bɛɛta alesaa beele basi ni lɛla lefosi, banankyue afosi-anyɔ beekyeko ni sɛfa kaweekɔ ku bafoso ku batie kɔlafa, diɛkyakaa nii, nfɛ, nkpini, bakuɔ ku bakɔɔkɔ ba ninsi ni lɛla.24Diekye aale sɛka di sɛka nlekɔ mmuu di Eufrate Okle kufĩ kamɛɛkɔ lɛkyɛ, diayɔ ni di Tifsa diasifi ni Gasa, aawɛ atoko ɔkyɛ ole kafɔɔ ku nnle be niamana nwɔ diakyi nii.25Di Solomon nkpa obe kamɛ yi, Yuda ku Israel, diayɔ ni di Dan dialaase ni di Beerseba, baasiɛ di otu ote kamɛ, otii biala lasiɛ di nta awosobi ku abue awoso nɔɔ kalɔ.26Solomon lawɛ kɔba aakpee aakyisa ni bakeke ba di bapɔnkɔ nnanfi ni nkpe nna ku bapɔnkɔ lefosi nkpe nnyɔ.27Kale bɛɛsɛ ni kukudi, kukudi kanya bayilatɛ banɔɔfo biala, nnyu alɛ nse kɔwɛntɛ nɔɔ lewo, anwako Ɔka Solomon alesaa ku mba bamuu ninkonko ni di opunu nɔɔ suoto. Mannyu alɛ balaamiɛ lɛsalɛsaa banɔ.28Manwako kafɔɔ akpaa ku babɔkɛɛ alesaa ya bɛɛtɔkɔ ma alɛ bawako ni mamatɛ di katɛkɔ ninya, man-yɔ manta bapɔnkɔ ba ninanfi ni bakeke ku bapɔnkɔ bule.Solomon Ninumbe
29Yaa lata Solomon ninumbe ku lɛsaatofo kplɛ, ku lɛsɔnu le niapɔ ni manamafuo ni ɔka fɛ lekpo ɔtɛnsĩa.30Solomon ninumbe lataka katoo dialenke batii ba niawɛ ni di Kufĩ Kantunkɔ, diataka katoo dialenke kafɔɔ Egipte ninumbe nimuu.31Aabe anu aalenkee osuɔtɔ biala, kuɛ Etan, Esra otii nwu- aabe anu aalenkee Heman, Kalkol ku Darda, Mahol babisuɔtɔbi nwu. Leyooto nɔɔ kafɔɔ lakpɛ dialaadu nnle mmuu niamana nwɔ diakyi nii.32Aapɛ akpa nkpe-ntiɛ, sinu nɔɔ kafɔɔ lawo kakpe ku ɛnɔɔ.33Aakakatɛ di awoso ku sɛfa suoto, diayɔ ni di Lebanon sida awoso kplɛ diɛlaase ni di ɔfa biibii wɔ ninkɔntɔ ni di oyoyiɛ suoto. Aakakatɛ kafɔɔ di babɔkɛɛ ku bakansiɛ suoto, asaa ya ninkpɔkɔ ni kaasɔ ku kɔkpaku suoto.34Nnle mmuu batii nwa mamanu Solomon ninumbe sɛlaa, di kayi ka baka bamuu ba nintoonu nwɔ ni ninumbe niakyesee ma nii.The Seed Company