BAKA I20
Siria Lakpɛko Israel
1Ninfɛ di Siria ɔka Ben-Hadad lasiisa bakpɛtɛ nɔɔ bamuu nɛ. Baka afosi-atiɛ-banyɔ lakyakaa ku bapɔnkɔ ku bakeke lɛma ba di bapɔnkɔ nnanfi nii, ni baakata baakyɛ baalaamana Samaria okpoo kplɛ nwu baakyi, baadieko nwu nɛ.2Ni di Ben-Hadad lakpee batɔkyɛntɛ Israel ɔka Ahab nfũ di okpoo kplɛ nwu alɛ, “Nnya ɔlaa wɔ di Ben-Hadad kobuɛ ni alɛ:3‘Kole mi di koto fututu ku koto sɛɛle lɛfɔ nwu nle, basɔfɔ biene ku babi lɛfɔ kafɔɔ nle mi bale.’ ”4Ni di Israel ɔka ladiki kanya alɛ, “Saate nii ɔka, fɛ mmle feebuɛ ni kanya. Ami ku asaa ya amuu ninkpe mi nii yi, ale fɔ ale.”5Batɔkyɛntɛ lakple baawa baababuɛ alɛ, “Nnya ɔlaa wɔ di Ben-Hadad kobuɛ ni alɛ: ‘Lakpee nlɛ babafũ koto fututu ku koto sɛɛle lɛfɔ, basɔfɔ lɛfɔ ku babi lɛfɔ bawakoe.6Kafɔɔ kɔsɛɛ nuakpa okle kamakpee banɔɔfotii nii mamakpɛnkpɛ lɛkayo lɛfɔ ku banɔɔfotii lɛfɔ ayo kamɛ. Babafũ lɛsaa biala niefũ fɔ ni kɔya, mantuka nya mansifiko.’ ”7Ninfɛ di Israel ɔka lalɛɛ kasɔ nwu banɔɔfo bamuu aatɔkɔ ma alɛ, “Binyu mmle di osuɔtɔ wɔ mmle komiɛ ni kaloosa! Aakpee alɛ babafũ basɔfɔ nii ku babi nii, koto fututu ku koto sɛɛle nii, ntasĩ nwɔ ɔta.”8Ni di banɔɔfo nwu ku batii nwu bamuu ladiki kanya alɛ, “Tan-nu nwɔ ɔlaa ee faatuna ko nwɔ di asaa ya ɔɔkaalɛ nii.”9Nioso aatɔkɔ Ben-Hadad batɔkyɛntɛ nwu alɛ, “Bilaatɔkɔ saate nii ɔka bilɛ, ‘Kpɛmblatɛ lɛfɔ kamabla di asaa kasale ya amuu faakaalɛ ni kanya, kafɔɔ n-ya mmle fɔɔkaalɛ ni nnya, nintuna.’ ” Ni di batɔkyɛntɛ nwu lasifi baalaayɔ ntale baakyɛnko Ben-Hadad nɛ.10Ninfɛ di Ben-Hadad lata kanya bamba Ahab alɛ: “Bayaa nwu bakaalɛ mi, bia bata ditɛ diwɛ osie nwaa, nse kudù ko nimabu ni di Samaria kapɔ kun-yii bakpɛtɛ nii biala kɔnɛɛ kamɛ.”11Ni di Israel ɔka ladiki kanya alɛ, “Bitɔkɔ nwɔ bilɛ: ‘Otii wɔ ninkpee ni akpɛsaa nɔɔ ankyɛ ni kakpɛ, atankanta fɛle otii wɔ ninkyɛ ni kakpɛ ankple anwa amadiki akpɛsaa nɔɔ nwu antɛ ni.’ ”12Ben-Hadad lanu kanya ka mmle di obe wɔ di nnwɔɔ ku baka nwu latoonyi ni nta di akpaayo lɛma kamɛ, ni aatɔkɔ bakpɛtɛ nɔɔ alɛ: “Bilolaa suoto biɛlaadieko ma.” Nioso baalolaa suoto alɛ bɔɔlaadieko okpoo kplɛ nwu.Ahab Lalenkee Ben-Hadad
13Nfanwu, Yaa ɔlaabuɛtɛtɛ onwii lawa aabatɔkɔ Israel ɔka Ahab alɛ, “Nnya ɔlaa wɔ di Saate nwu kobuɛ ni alɛ: ‘Fɔɔnya bakpɛtɛ dikudi kplɛ le mmle? Kamayɔ ni nkpee di nnɛɛ lɛfɔ miɛ, ni fabatofo falɛ ami ninle Saate nwu nɛ.’ ”14Ni di Ahab lakaalɛ alɛ, “Kafɔɔ owe nimabla nle mmle?”Ni di Yaa ɔlaabuɛtɛtɛ nwu labuɛ alɛ, “Nnya ɔlaa wɔ di Saate nwu kobuɛ ni alɛ, ‘Kale dikudi kakpɛ kanyabayilatɛ bakosopo nimabla ni.’ ”
Ni aakaalɛ alɛ, “Ni owe nimakye kakpɛ nwu kasɔ?”
Ni di Yaa ɔlaabuɛtɛtɛ nwu ladiki kanya alɛ, “Afɔ nimakye kasɔ.”15Nioso Ahab lalɛɛ kale dikudi kakpɛ kanyabayilatɛ basokopo, alafa-anyɔ-afosi-atiɛ-banyɔ. Ninfɛ aasiisa Israel batii bule, bamuu labla nkpe nkuɛnsĩ.16Ni baadie ku kakũ nwu, di obe wɔ di Ben-Hadad ku baka afosi-atiɛ-banyɔ ba niabla ni onwii ku nnwɔɔ lasiɛ ni di akpaayo lɛma kamɛ baatoosiɛ ni nta.17Kale dikudi kakpɛ kanyabayilatɛ bakosopo nwu niakasa odie.
Ni di kasɔ balantɛ ba di Ben-Hadad lakpee ni kɔtɔ labatɔkɔ nwɔ alɛ, “Bakpɛtɛ lekye Samaria bɔɔwa.”18Ni di Ben-Hadad labuɛ alɛ, “Nse atoko ɔkyɛ ole bɔɔwako yi, biemufũ ma ku nkpa; nse kakpɛ kafɔɔ bɔɔwako yi, biemufũ ma ku nkpa.”19Ni di kale dikudi kakpɛ kanyabayilatɛ bakosopo nwu lakyɛ baadie di okpoo kplɛ nwu, di bakpɛtɛ lɛma latikanko ma ni sɛɛmaa,20ni di obiala lalo lo nɔɔ nɛ. Di obe nwu kamɛ, Siria batii latoso, ni di Israel batii latikanko ma nɛ. Kafɔɔ Siria ɔka, Ben-Hadad latoso aasifi di pɔnkɔ suoto ku bapɔnkɔ basiɛtɛ nɔɔ bawo.21Israel ɔka lakpɛ, ni aafũ bapɔnkɔ ku bakeke ba di bapɔnkɔ nnanfi nii, ni aalo Siria batii kpinwu nɛ.22Nni kamaa, Yaa ɔlaabuɛtɛtɛ nwu lawa Israel ɔka nfũ aabatɔkɔ nwɔ alɛ, “Siensa bakpɛtɛ lɛfɔ, faanyu lɛsaa le dikaatɛ bɛɛbla ni, diekye di kabienle ka nikɔwa nii, Siria ɔka kamakple andieko fɔ.”
Siria Batii Ladieko Israel Lɛnyɔɔfa
23Ninfɛ di Siria ɔka banɔɔfotii laka nwɔ baabuɛ alɛ, “Bayaa lɛma nle akpenkpe bayaa. Nkpo oso baasiiwo osie nɛ. Kafɔɔ nse buɔkpɛko ma di sɛtaata yi, nwaako bubawɛ osie munlenkee ma.24Bibla mmle: Bikyisa baka bamuu di nyilakɔ lɛma, biɛyɔ banɔɔfotii bamba bise di nyilakɔ lɛma.25Dikpe ni biese kafɔɔ bakpɛtɛ fɛle mba niakpi ye ni- bapɔnkɔ di bapɔnkɔ lɛpɔ kanya, bakeke ba di bapɔnkɔ nnanfi ni kafɔɔ di bakeke ba di bapɔnkɔ nnanfi ni kanya- di mmle buafuo ni Israel ɔkpɛko di sɛtaata nwu. Ni nwaako, bubawɛ osie munlenkee ma.” Ni aatunako ma, aadiki kɔkpaa di mmle diasiɛko ni kanya nɛ.26Di kabienle ka niawa nii, Ben-Hadad lasiisa Siria bakpɛtɛ, ni baakata baakyɛ Afek baalaakpɛ Israel nɛ.27Obe wɔ kafɔɔ baasiisa ni Israel batii, baata ma ni alesaa asaa yi, baadie baakyɛ baalaakyakako ma. Israel bakpɛtɛ lasiɛ baakyɔɔ Siria bakpɛtɛ anu, fɛle batie di akudi biibii anyɔ, di obe wɔ di Siria bakpɛtɛ kafɔɔ layii ni kale nwu.28Ninfɛ di Yaa otii nwu labatɔkɔ Israel ɔka alɛ, “Nnya ɔlaa wɔ di Saate nwu kobuɛ ni: ‘Ta di Siria batii lenyu alɛ, Saate nwu nle ni akpenkpe yaa, ni ananle ni sɛtaata yaa oso yi, kamayɔ bakpɛtɛ dikudi kplɛ le mmle nkpee di nnɛɛ lɛfɔ. Ni fabatofo falɛ ami ninle Saate nwu nɛ.’ ”29Ayi akuɛnsĩ amu baasiɛ baakyɔɔ bawo anu, ni di dii kuɛnsinle suoto kakpɛ nwu lasɔ nɛ. Israel bakpɛtɛ laloloo Siria bakpɛtɛ ba ninkyɛ ni ninkpaa, nkpe kɔlafa di dii ninwii kamɛ.30Babule lɛma latoso baabuo di Afek okpoo kplɛ kamɛ, ninfɛ di oyoyiɛ labiɛ kuapɛ batii lɛma nkpe afosi-anyɔ nkpe nkuɛnsĩ nɛ. Ni di Ben-Hadad latoso aasifi okpoo kplɛ nwu aalaawofo di leyo ninwii kamɛ, kamɛ nɛ.31Ni di banɔɔfotii nɔɔ latɔkɔ nwɔ alɛ, “Nyu, buonu bulɛ Israel leyo baka nle nyaami banyatɛ. Bita bukyɛ Israel ɔka nfũ, buominisa aboko di sɛtɔ loo, buominisa sikũ di asi loo. Loobia abafũ ye nkpa.”32Baayɔ aboko baaminisa sɛtɔ lɛma, baaminisa sikũ di asi lɛma, ni baakyɛ Israel ɔka nfũ baalaatɔkɔ nwɔ alɛ, “Kpɛmblatɛ lɛfɔ Ben-Hadad alɛ; ‘Lekoto tɛɛ nsiɛ nkpa.’ ”Ni di Israel ɔka lakaalɛ alɛ, “Eekple akpe nkpa? Obiloo-suɔtɔbi ale.”33Ni di Ben-Hadad batii nwu layɔ ɔlaa nwu fɛ kɔkpaa didiki biene kule nɛ, nioso baapɛsɛwa baakafɔ ɔlaa nɔɔ nwu baabuɛ alɛ, “Yii, obilee-suɔtɔbi Ben-Hadad!”
Ni di ɔka labuɛ alɛ, “Bilaakpaa nwɔ biwako.” Di Ben-Hadad ladie aawa nii, Ahab latɔɔ aakata aabuo di keke nɔɔ wɔ di bapɔnkɔ nnanfi ni kamɛ.34Ninfɛ di Ben-Hadad latɔkɔ Ahab alɛ, “Kamakplesa sekpoo kplɛ se di teemi lafũ ni di teefɔ nfũ nta fɔ. Fantɛ asaa kasunsũkɔ lɛfɔ amu di aba nwu di Damasko, fɛ mmle di teemi labla ni di Samaria.”
Ni di Ahab labuɛ alɛ, “Di kanya ninii oso yi, kamadiɛ fɔ fansifi.” Nioso aabla kanya ninii ku nnwɔɔ, ni aadiɛ Ben-Hadad aasifi nɛ.
Yaa Ɔlaabuɛtɛtɛ Onwii Latɛ Ahab Kolò
35Di Saate nwu ɔlaa kanya yi, Yaa ɔlaababuɛtɛtɛ onwii obisuɔtɔbi latɔkɔ oklopo nɔɔ alɛ, “Safɔ mi ku lɛkpɛsaa lɛfɔ.” Kafɔɔ osuɔtɔ nwu lasĩ.36Nioso Yaa ɔlaabuɛtɛtɛ nwu labuɛ alɛ, “Ta fanaanu ni Saate nwu ɔlaa oso yi, nse feedie odie di ɔkyɛ nii, kyata kamalo fɔ.” Di osuɔtɔ nwu lasifi nii, kyata lakyakako nwɔ, ni aalo nwɔ nɛ.37Ni di Yaa ɔlaabuɛtɛtɛ nwu lanya osuɔtɔ bamba, ni aatɔkɔ nwɔ alɛ, “Lekoto, safɔ mi.” Nioso osuɔtɔ nwu lasafɔ nwɔ, aatika nwɔ kakɔ.38Ninfɛ di Yaa ɔlaabuɛtɛtɛ nwu lasifi aalaayila di osuku kotoko aasoko ɔka nɛ. Aakyɛlɛnsa asaa di suoto nɔɔ, aayɔ dibula aaninii disi diatĩi anu nɔɔ.39Di ɔka nwu latoofe nii, Yaa ɔlaabuɛtɛtɛ nwu lalɛɛ nwɔ aatɔkɔ alɛ, “Kpɛmblatɛ lɛfɔ lakyɛ kakpɛkɔ kasienlekɔ, ni di otii onwii lawa ɔkyɛ nii ku otii onwii baamufũ ni aawako aababuɛ alɛ, ‘Toonyu osuɔtɔ wɔ mmle. Nse eeyu, ni nkpa lɛfɔ fabayɔ fanta nkpa nɔɔ disi, ee fabata koto fututu fɛ bakilo afosi-atiɛ-bana.’40Obe wɔ di ninu lasɛɛ ni kpɛmblatɛ lɛfɔ, oofe ni katoo ku kala yi, osuɔtɔ nwu layɛ.”Ni di Israel ɔka nwu labuɛ alɛ, “Afɔ omu niebuɛ nwu, nioso nni ninle letoko nanfi lɛfɔ nɛ.”41Ninfɛ di Yaa ɔlaabuɛtɛtɛ nwu lapɛsɛwa aafukiti dibula nwu aaninii ni disi ku anu nɔɔ, ni di Israel ɔka latofo nwɔ alɛ Yaa ɔlaabuɛtɛtɛ onwii ale nɛ.42Ni aatɔkɔ ɔka nwu alɛ, “Nnya ɔlaa wɔ di Saate nwu kobuɛ ni alɛ: ‘Afɔ feediɛ osuɔtɔ wɔ latɛ nlɛ aakpi ni lesifi. Nkpo oso nkpa lɛfɔ ninle diɛta nkpa nɔɔ, batii lɛfɔ bata ni batii nɔɔ.’ ”43Ni di Israel ɔka nwu lakatu anu, aanya ɔblɔ aasifi lɛkayo nɔɔ di Samaria nɛ.
The Seed Company