1 Kronika18
Dawid Lalenkee Di Nkpɛ Kpinwu Kamɛ
1Di obe owo sɛmaa, Dawid lakpɛko Filisti batii aalenkee ma, ni aawakosa ma kasɔ nɛ. Ni aafũ Gat ku sekpoenyii se niamana nwu kuakyi ni di Filisti batii nnɛɛ nɛ.2Dawid lakple aakpɛko Moab batii aalenkee ma, ni baabasiɛ nwɔ kaalɔ, baatɔɔwako nwɔ kɔsɔsĩ nɛ.3Diɛkyakaa nii, Dawid lakpɛko Soba ɔka Hadadeser, dialaadu bia Hamat, di obe wɔ di Hadadeser lakyɛ aalaatika ni kɔnɛɛ nɔɔ di Eufrate Okle kotoko.4Dawid lafũ ɔka Hadadeser bakeke ba di bapɔnkɔ nnaanfi ni kakpe, bapɔnkɔ basiɛtɛ nkpe nkuɛnsĩ ku bakpɛtɛ ba ninkyɛ ni ninkpaa nkpe afosi-anyɔ. Aabubudi bapɔnkɔ nwu bamuu sɛkpaakũ aabla ma abafa, kafɔɔ aadiɛ bakeke ba di bapɔnkɔ nnaanfi ni kɔlafa.5Di obe wɔ di Siria batii ba di Damasko lawa alɛ bɔɔbakyakaako ni Soba ɔka yi, Dawid lalo batii lɛma nkpe afosi-anyɔ nkpe nnyɔ.6Dawid labla bakpɛtɛ nsiɛkɔ di Siria batii kasɔ suoto di Damasko, ni di Siria batii labasiɛ di Dawid kalɔ baatɔɔwako nwɔ kɔsɔsĩ nɛ. SAATE nwu lata Dawid lelenkee di kakɔ biala aakyɛ nii.7Dawid layɔ koto sɛɛle kubiafunsaa ya niale ni Hadadeser banɔɔfotii ale, ni aayɔ nya aawako Yerusalem nɛ.8Dawid lafũ abɔɔsaa sɛɛle kpinwu di Tibhat ku Kun batii nnɛɛ di sekpoo se niale ni Hadadeser sele kamɛ. Nnya di Solomon layɔ aabla abɔɔsaa sɛɛle lekpo babɛɛsi, akpaka ku abɔɔsaa sɛɛle awansaa ateate nɛ.9Obe wɔ di Hamat ɔka Tou lanu alɛ Dawid ntoolenkee ni Soba ɔka Hadadeser bakpɛtɛ bamuu yi,10ni aakpee obisuɔtɔbi nɔɔ Hadoram aakyɛ Dawid nfũ aalasɛɛsa nwɔ, aatansa nwɔ kafɔɔ di mmle aalenkee ni Hadadeser di kakpɛ kamɛ, diekye kakpɛ lasiɛ di Hadadeser ku Tou ntɛɛ. Hadoram lawako Dawid koto sɛɛle ku koto fututu ku abɔɔsaa sɛɛle asaa ateate amuu.11Ɔka Dawid labla asaa ya mmle kayi-odiki ɔsaabla aata SAATE nwu, fɛ mmle aabla ni ku koto fututu ku koto sɛɛle ko aafũ aakyeko ni nnle be mmle mmuu nnɛɛ: Edom batii ku Moab batii, Amon batii ku Filisti batii, ku Amalek batii.12Seruia obisuɔtɔbi Abisai lalo Edom batii lefosi-nkpe-nnɛ aatɛ di lɛba le bɔɔlɛɛ ni Mmba Ɔtaata suoto.13Aatɛ bakpɛtɛ nsiɛkɔ di Edom, ni di Edom batii bamuu lasiɛ di Dawid kalɔ nɛ. SAATE nwu lata Dawid lelenkee di kakɔ biala aakyɛ nii.Mba Mmle Niale Dawid Banɔɔfotii Nɛ
14Dawid lale sɛka di Israel omuu suoto, aatɔɔbla asaa ya niakaatɛɛ nii, aate ni tinini aatɔɔta batii nɔɔ bamuu.15Seruia obisuɔtɔbi Yoab niayila di bakpɛtɛ kanya; Ahilud obisuɔtɔbi Yehosafat niatɔɔtɛ asaa nsũ;16Ahitub obisuɔtɔbi Sadok ku Abiatar obisuɔtɔbi Abimelek niale olebatatɛ; Sawsa niale kukũ kpanatɛ;17Yehoiada obisuɔtɔbi Benaia niayila di Keret batii ku Pelet batii bakpɛtɛ nwu kanya; Dawid babisuɔtɔbi kafɔɔ niale banɔɔfo-nɔɔfotii di ɔka lɛkyɛ nɛ.The Seed Company