1 Kronika16
1Baayɔ Yaa lɛlakaa nwu baawako baabayɔ ni baase di lɛkpaayo le di Dawid lapɛ aata nini kamɛ, ni baata ofiɛ asaaɔta ku atoko ɔkyɛ ole asaaɔta di Yaa anu nɛ.2Di Dawid laloo ni ofiɛ asaaɔta ku atoko ɔkyɛ ole asaaɔta sɛmaa yi, aata batii nwu lɛtɔtrɔ di SAATE nwu leyooto kamɛ.3Ni aayɔ bloblo dikudi, sina dikudi ku nta lewosobi kosole aata Israel otii biala osuɔtɔ ku ɔsanko nɛ.4Ninfɛ aadiki Lewi batii bawo alɛ babla kasumu ɔkpɛ di SAATE nwu lɛlakaa anu, baapɛ ɔlaa, baapɛ sɛfa, baatansa kafɔɔ SAATE nwu, Israel Yaa nwu nɛ:5Asaf niale disi, Sakaria latika, kamaa Yeiel, Semiramot, Yehiel, Matitia, Eliab, Benaia, Obed-Edom ku Yeiel. Mma dikpeni manfɛ basanku ku bakyitaa nɛ, Asaf ninsa abɔɔsaa anɛɛkya,6olebatatɛ Benaia ku Yahasiel kafɔɔ dikaatɛ bɛɛfɛ akyukyoo obe lele di Yaa kanya ninii lɛlakaa nwu anu.7Dii nwu nkpo niale lɛkasale di Dawid layɔ SAATE nwu sɛfa ɔpɛ onu wɔ mmle aakpee di Asaf ku bakpɛmblatɛ wo nɔɔ nnɛɛ nɛ.
Dawid Katansa Onu
8Biyɔ sɛfa ɔpɛ bita SAATE nwu, bilɛɛ nwɔ leyooto;Bita batofo di nnle nwu kamɛ lɛsaa le atɔɔbla ni.9Bisa sinu bitɔɔ, bisa katansa sinu bitɔɔ;bibuɛ sɛsaabla nɔɔ se simuu niɛbla ni ɔkpɛ.10Biyɔ dibu bita leyooto klekle nɔɔ;biɛta batii ba situ ninwolaa ni SAATE nwu banya suoto lɛyɔɔ.11Biwolaa SAATE nwu ku osie nɔɔ;biwolaa anu nɔɔ obe lele.12Binyuma asaa ya niɛbla ni ɔkpɛ atɔɔbla ni,atuosaa nɔɔ, ku akanko ya aabuɛ ni.13Oo bakpɛmblatɛ nɔɔ Israel banantii,Oo Yakob babisuɔtɔbi, aye ba eediki ɛɛta ni suoto nɔɔ.14Nnwɔɔ ninle SAATE Yaa loo nɛ;akanko nɔɔ nkpe di nsɔ nwu mmuu kamɛ.15Anyuma kanya ninii nɔɔ dinaa ni kaloo,ɔlaa wɔ aabuɛ aata ni banantii kakpe,16kanya ninii le aabla ni ku Abraham,ntam be aaka aata ni Isak.17Aatika nwu difuɔ aata Yakob fɛ kufiofa,aata Israel fɛ kanya ninii le ninaa ni kaloo:18“Afɔ kamayɔ Kanaan kasɔ nwu ntafɛ atesaa kalekɔ ka bibafũ nii.”19Obe wɔ baale ni batii basɛɛ di lɛpɔ kamɛ,nwaako kafuii, bafɔɔ kafɔɔ baale ninwu kamɛ,20baakyɛ baakyi kale, baafe kale,baadie di sɛka kalekɔ kanwii baasifi kabamba.21Atata otii kuonwii lanyinka ma;aasĩ ɔlaa aata baka ta mma oso alɛ:22“Bitankpanko mba lɛpɛ ni ɔfɔɔ;bitambla ɔlaa babuɛtɛtɛ nii dikpile kuninwii.”23Kasɔ kamuu, bisa sinu bita SAATE nwu;biyie lɛkya di didiki nɔɔ suoto dii biala.24Bidiki dibu nɔɔ bibuɛ di nnle nwu kamɛ,sɛsaabla nɔɔ se niɛbla ni ɔkpɛ di batii bamuu kamɛ.25Diekye SAATE nwu lemuɔ, ɛɛtɛ eesiɛko ni katansa kafɔɔ;dikaatɛ alɛ man-yɛkɛ nwɔ manlenkee ni bayaa bamuu.26Diekye nnle nwu bayaa bamuu yi, afiɔ bale,kafɔɔ SAATE nwu niabla osi nɛ.27Dibu ku sɛka ole nte di anu nɔɔ;osie ku suoto lɛyɔɔ nkpe di kasiɛkɔ nɔɔ.28Oo nnle nwu banantii, biyɔ bita SAATE nwu,biyɔ dibu ku osie bita SAATE nwu,29biyɔ SAATE nwu leyooto le di dibu lesiɛko ni bitɔɔ.Biyɔ asaaɔta biɛwa di anu nɔɔ;bisumu SAATE nwu di lɛkpa nɔɔ sɛlɛ kamɛ.30Kasɔ kamuu katũkũ di anu nɔɔ!Bɛɛtɛ kayi nwu kpinkpĩ; balaafuo ka otũkunsa diidii.31Bita osi asaa anya suoto lɛyɔɔ, biɛta kafɔɔ suoto siyɔɔ kasɔ nwu;biɛta ma babuɛ di nnle nwu kamɛ alɛ, “SAATE nwu koole sɛka!”32Bita lekpo ku asaa ya amuu ninsi ni ninni kamɛ ayiisa kudú;bita afe ku lesaa biala ninsi nya ni kaamɛ anya suoto lɛyɔɔ!33N-se lepoo kamɛ awoso ntɔɔsa sinu,babasa sinu mampɔ di SAATE nwu anu,diekye ɛɛwa alɛ ɔɔbakanko kasɔ nwu.34Bipɛ SAATE nwu sɛfa, diekye alɛ̀;lɛbɔmbɔ nɔɔ nkpe dinaa ni kaloo.35Bibuɛ bilɛ, “Oo Yaa, dikitɛ loo, diki wo;siisa wo, faadiki wo kafɔɔ fakyeko nnle nwu nnɛɛ,alɛ buapɛ leyooto klekle lɛfɔ nwu sɛfa,alɛ buayɔ katansa lɛfɔ muntakatɛsa suoto loo katoo.”36Bitansa SAATE nwu, Israel Yaa nwu,diɛyɔ ni di nua diesifi ni dinaa ni kaloo.Ninfɛ di batii nwu bamuu labuɛ alɛ “Diwa kaanya” ni “Biɛtansa SAATE nwu.”Yaa Kasumu Di Yerusalem Ku Gibeon
37Dawid lakyɛ aadiɛ Asaf ku bakpɛmblatɛ wo nɔɔ di SAATE nwu kanya ninii lɛlakaa nwu anu alɛ babla kasumu ɔkpɛ nwu obe lele, di mmle kanya diesiɛko diɛta ni dii biala.38Aadiɛ kafɔɔ Obed-Edom ku bakpɛmblatɛ wo nɔɔ afosi-akuɔ-banɛ alɛ babla kasumu ɔkpɛ ku mma. Yedutun obisuɔtɔbi Obed-Edom ku Hosa kafɔɔ lale n-yoko banyuntɛ.39Dawid ladiɛ oletatɛ Sadok ku olebatatɛ wo nɔɔ di SAATE nwu akpanta klekle anu di Gibeon olekatakɔ nwu40alɛ baata ofiɛ asaaɔta manta SAATE nwu di ofiɛ asaaɔta oleɔta akyikye suoto obe lele, olesɛ ku kɔtɔɔfɔ, di lɛsaa biala le bɛɛkpana ni di SAATE nwu kufiofa kukũ kamɛ kanya, nko aata ni Israel.41Heman ku Yedetun ku batii bule ba baadiki ni di ayooto kanya alɛ baasa ni sinu mampɛ ni SAATE nwu sɛfa lawɛ ku mma, “Diekye lɛbɔmbɔ nɔɔ nkpe dinaa ni kaloo.”42Heman ku Yedutun niale mba ninfɛ ni akyukyoo mansa ni abɔɔsaa anɛɛkya, mansa ni asansaa bamba, mansa ni kafɔɔ Yaa katansa sinu nɛ. Yedutun babisuɔtɔbi baase di kayoko kanya.43Ninfɛ di batii nwu bamuu lasifi nɛ, obiala lasifi leyo nɔɔ nimu, ni di Dawid lakple aasifi leyo aalaata leyo nɔɔ kamɛ batii lɛtɔtrɔ nɛ.The Seed Company