Okuharâmya ebiremwa
1Nêci, bali ba busha bwenêne balya boshi barhamanyaga Nyamuzinda, n’omu kubona ebiboneka barhahashag’imanya Nyamubâho, n’omu kubona obushanja barhamanyaga omulenga wabukolaga.2Ci bôhe bamanya mpu omuliro, empûsi, emboho, nîsi erhi amalunga n’enyenyêzi ziyibà, nîsi erhi omuhûsi gw’amîshi erhi ebimole by’oku nkuba, bamanya mpu bo banyamuzinda, mpu bo ba nna-amahanga-goshi.3Akabâga bânunîrwe n’obwinjà bw’ebyo kwarhuma babijira banyamuzinda, bamanyâge n’oku nnabyo abikulîre, bulya Namulemi w’obwinjà yêne wabiremaga.4N’akabà obuhashe n’emikolo yabyo yabarhangâzize, bamanyirageho oku ôwabijiraga abilushire buhashe.5Bulyâla obunene n’obwinjà bw’ebiremwa cibà cêrekane c’owabilemaga.6Cikwône abôla barhali ba kugaywa bwenêne, bulyâla nkaba ciru bahabusire erhi balonza Nyamuzinda mpu bamuhikekwo.7Okubà omu karhî k’obushanja akolaga kunarhume bacisêza okubusingiriza, ciru banalinde barhebwa n’iranga erhi bwinjà bw’ebi babwîne burhuma.8Bône erhi barhanali ba kubabalirwa:9Akabà babwîne buhika oku bumanye, balinda basâgarha igulu, kurhi Nnalyo yeki babulaga bwamuhikakwo duba?Okuharâmya enshusho
10Cikwône bali bahanya abacîkubagira emifiriri, abaderha emikolo y’enfune z’abantu mpu banyamuzinda, amasholo, amarhale matule n’obulenga, enshushano z’ensimba, ibuye lya busha-busha lyakolagwa n’okuboko kwa mîra.11Omuntu aj’emuzirhu, akube gulya murhi gwankanaziga gwabinjwa, agugongôlekwo ecûla bwinjà bwinjà, agwîre agubinja, akûlemwo orhulugu akaz’ikolêsa.12Obuvungunyukiza bwa gulya mukolo, abuguke nshâli bakaz’imuyenderamwo ebi alya, kukolaga kulwîsa ishali.13N’ehindi hihimbi hyasigalaga, hirya hirhali hinjà, higolôlosire hinali hya mahaji-mahaji. ahiyanke ahibinje n’obushiru bw’omuntu wafuluka, ahirhendêze n’obulenga bw’omuntu wahumûka, ahikûlemwo obusù bw’omuntu,14nîsi erhi arhenzemwo ehisimba hya bushabusha, ahisinde olukuyu, ahihembe omugôla, ahîre n’obulembo ngasi hali ecibande.15Abul’ijà aho, obushanja bwâge abuyûbakire enyumpa ebukwânîne, abugwâse omu lukûta anabusegezemwo n’omusumari.16Kuderha mpu obushanja bwâge bwankanarhibuka, amanyire bwinjà oku burhankacirhabâla bwône, eri nsanamu erhankacîrhabâla.17Kurhahangè arhanayisengera mpu eyimangire ebyâge, amahya g’aha mwâge n’abâna bâge; arhali na nshonyi za kushambâza omurhi mûmu; amagala agalolere oku buzamba,18akalamo akalongeze oku lufù, oburhabâle abuhûne engonyi, akola abalama agend’ishenga ehirhahinya kugulu mpu hyalambagira!19Akajà burhunzi, mpu lyo ayunguka anabêrwe omu mirimo y’okuboko kwâge, agend’isengera ehyo hirhagwêrhi nsimiko omu maboko!