Ombêre obwonjo, Yâgirwa Nyamuzinda
1Gwârhi omukulu w’abimbiza. Lulanga. Lwa Daudi.2Amango omulêbi Natani àjaga emunda Daudi ali kulya kubà anacîhemwîre kuli Betiseba.3Yâgirwa Nyamuzinda ombabalire, obwonjo bwâwe burhumire.4Omu lukogo lwâwe lunji, ozâze ecâha câni.5Bulyâla ntababiri obubî bwâni, ngasi mango ecâha câni cindi omu masù.6Wêne nagomire, Nyamwagirwa, ebiri bibî omu masù gâwe nabijizire. Ntyo oli murhondekezi omu bucîranuzi bwâwe, oli mutwî w’emmanja mwimâna.7Okengêre oku naburhagwa omu bubî, omu câha nayâlalagwa omu nda ya nyâmà.8Omurhima gw’omuntu w’okuli gwo gukusîmîsa, omu ndubi y’omurhima gwâni mw’onyigîriziza obumanye.9Ewe Nyakasane onkangûle lyo ncà, onshuke mbè mwêru nka lubula.10Nyumve obusîme n’omwîshingo, amavuha gàli gavungunyusire garhambe.11Orhalolaga obubî bwâni, ebyâha byâni byoshi obizâze.12Mâshi Nyamuzinda, omurhima gwâni oguleme buhyâhya ompiremwo iroho lihyâhya onalizibuhye.13Orhantenzagy’emalanga gâwe, orhanyagaga omûka gwâwe Mutagatîfu.14Ongalulire obushaguluke bw’obuyôkozi bwâwe, ompè omurhima gw’entwâli.15Nyêreke abagoma enjira zâwe, n’abanya-byâha bagaluk'emund’oli.16Ondîkûze oku buhane bw’omukò, Nyakasane Muyôkozi wâni, olulimi lwâni lukayimba oburhondekezi bwâwe.17Onshwêkûle akanwa Nyakasane, olulimi lwâni lukâderha irenge lyâwe.18Bulya enterekêro erhakusîmîsa, n’erhi nankakubâgira orhankayêmera.19Enterekêro yâni, Yâgirwa, guli murhima gwadwa mukò, omurhima gwarhanya gunavungunyusire, orhankagukabulira, Nyakasane.20Omu bwinjà bwâwe, okengêre Siyoni, Muhanyi, oshub’iyûbaka olugo lwa Yeruzalemu.21Lyoki wankayankirira enterekêro zirhegesirwe, entûlo n’embâgwa ya nsirîra, lyoki bankarherekêra ebimasha oku luhêro lwâwe.