Yezu afumya omuhûrha kurhenga okuburhwa
1Erhi agera, abona omuntu waburhagwa ali muhûrha.2Abaganda bâge bamudôsa, mpu: «Waliha Muyigîriza, ndi wajizire ecâha, oyu muntu erhi ababusi bâge, obûla abusirwe muhûrha?»3Yezu, erhi: «Oli ye oli ababusi bâge ntà câha bajizire, ci mpu lyo obuhashe bwa Nnâmahanga bubonekana kuli ye.4Obûla bwacibona, kukwânîne njire emikolo y’owantumaga: obudufu buyiruka, n’obudufu burhakola.5Obu nciri en’igulu, ndi bumoleke bw’igulu».6Erhi abà amâderha ntyo, anacitwîra ahanshi, ajira orhujondo n’amarhî gâge, arhushîga oku masù ga gulya muhûrha.7Okubundi amubwîra, erhi: «Jaga ocîshuke omu iriba lya Silowe» kwo kuderha: orhumirwe. Gulya muhûrha gwagenda, gwacishuka gwanagaluka erhi gukola gwabona n’obwâlagale.8Abalungu bâge n’abantu bakâg’iyôrha bamubona ajà ahûnahûna, baderha, mpu: «K’arhali olya wakâg’iyôrha ahûnahûna oyu?»9Baguma, mpu: «Yenêne». Abandi, mpu: «Arhali ye, ci wundi omushushire». Naye, erhi: «Nie nênè».10Bamudôsa, mpu: «Kurhi amasù gâwe gabungûsire?»11Abashuza, erhi: «Olya baderha mpu ye Yezu, ye wajiraga orhujondo, arhunshîga oku masù, anambwîra, erhi: “Jaga ocîshuke omu iriba lya Silowe”. “Nayijà, nacîshuka, nanabona”».12Bamudôsa, mpu: «Ngahi ali?» Naye, erhi: «Ntishi».13Banacîkanyanya olya muntu wali muhûrha emw’Abafarizeyi.14Olusiku Yezu ajiraga orhujondo anamuzibûla amasù lwàli lwa Sabato.15Abafarizeyi nabo bashub’imudôsa kurhi amasù gâge gabungûkaga. Naye, erhi: «Anshîga orhujondo oku masù, nagend’icîshuka, nankola ndwîrhe nabona».16Bafarizeyi baguma, mpu: «Oyo muntu arharhenga emwa Nnâmahanga, bulya arhakenga Sabato». Abandi, mpu: «Kurhi omunya-byâha ankajira ebisômerîne biri nk’ebi?» Bacîgabamwo bônene na bônene.17Banacishub’idôsa olya wali muhûrha, mpu: «Nâwe kurhi odesire kuli oyo wakuzibûlaga amasù?» Naye, erhi: «Ali mulêbi».18Ci Abayahudi barhalonzagya okuyêmêra oku oyo muntu ali muhûrha n’oku akol’adwîrhe abona. Kwo kuhamagala ababusi bâge.19Babadôsa, mpu: «Ka mugala winyu oyu, olya muderha mpu aburhagwa muhûrha? Kurhi akolaga adwîrhe abona?»20Ababusi bâge bashuza, mpu: «Rhuyishi oku rhwe rhwamuburhaga n’oku aburhagwa erhi afîre amasù.21Ci oku akola adwîrhe abona n’owamuzibûlaga amasù, rhurhishi. Mumudôse; akola mulume, yêne acîderhera».22Bwôba bwa Buyahudi bwarhumaga ababusi bâge baderha ntyo; bulya bâli erhi bahizire mpu owaderhe oku Yezu ye Kristu anakagwe omu sinagogi.23Co carhumaga ababusi bâge baderha, mpu: «Akola mulume; mumudôse yêne».24Abayahudi bashub’imuhamagala obwa kabiri, bamubwîra, mpu: «Okuze Nnâmahanga! Rhwêhe rhuyishi oku ola muntu ali munyabyâha».25Naye, erhi: «Akabà ali munya-byâha, ntishi; kantu kaguma kône mmanyire: nali muhûrha na buno nkola ndwîrhe nabona».26Banacimudôsa, mpu: «Kurhi kulya akujizire? Kurhi akuzibwîre amasù?»27Abashuza, erhi: «Nammubwîzire mîra, murhanayumvîrhe. Carhuma mwalonza nshub’immubwîra? Nkaba ninyu mwalonza okubà baganda bâge?»28Banacirhondêra bamujâcira, mpu: «Okaba muganda wâge! Rhwêhe rhuli baganda ba Mûsa.29Rhwêhe rhuyishi oku Mûsa ye Nnâmahanga abwîzire ebinwa byâge; ci oyo rhurhishi ali wa ngahi?»30Olya mulume abashuza, erhi: «Lêro namasômerwa! Murhishi ali wa ngahi omuntu onfumize obuhûrha!31Rhuyishi oku Nyamuzinda arhayumvîrhiza banya-byâha, ci omuntu omurhumikira n’ojira oku alonza ye ayumvîrhiza.32Ka mukola muyumvîrhe omuntu azibwîre amasù gw’owaburhagwa muhûrha?33Acibâga arhali emwa Nnâmahanga arhenga, ntâco anankajizire».34Bamushuza, mpu: «Kurhenga omu nda ya nyoko erhi oyunjwîre byâha, onakola mpu warhuyigîriza!». Banacimulibirhakwo.35Yezu ayumva oku bamulibisirekwo. Erhi bacishimânana, amubwîra, erhi: «K’oyêmîre Mwene-omuntu?»36Naye, erhi: «Ye ndi, Nyakasane, mmuyêmêre?»37Yezu amubwîra, erhi: «Omubwîne, ye dwîrhe akudesa».38Naye, erhi: «Nyêmîre, Nyakasane!» Anacifukama embere zâge.39Okuhandi Yezu anaciderha, erhi: «Kucîranula kwandwîrhe en’igulu: lyo abarhabona babona, n’ababona babè mihûrha».40Abafarizeyi bahali erhi bayumva, bamudôsa, mpu: «Ka rhuligi mihûrha nîrhu?»41Yezu ababwîra, erhi: «Mucibaga mihûrha, rhinga ntà câha mugwêrhe. Ci mwêhe, mpu: Kubona rhubona! Co cirhumire ecâha cinyu ho cinaciri».