Ayubu ajâcira olusiku àburhagwa
1Cazînda Ayubu abûmbûla akanwa, ajâcira olusiku àburhagwa.2Ayubu arhoza akanwa aderha, erhi:3Lukahera olusiku naburhagwamwo, n’obudufu bwaderhaga mpu: «Mwâna-rhabana oyâlîrwe!»4Mâshi! mâshi! olwo lusiku lukabà ndunduli, Nyamuzinda w’enyanya irhondo arhalushibiriraga, n’obulangashane burhacilumolekeraga!5Luzikanwe n’obudufu n’endunduli y’olufù, ecitù cilubwikire, obwîre kabirhi bulubone.6Nêci, omwizimya guluhâbwe, lufânande, lurhaganjiragwa omu nsiku z’omwâka, lurhajâga omu mubalè gw’emyêzi.7Obwo budufu bugumbe, burharhengagamwo na kakù ka mwishîngo!8Mâshi mâshi luhehêrerwe na balya bahehêrera ensiku, balya bayishizûsa Leviatani;9Zihirigirhe enyenyêzi z’omucêracêra gwâbwo, bulangâlire omûshi buguzunguluke! Burhanabonaga lukula azibûla engohe.10Obwabulaga kuhamika olûmvi lw’enda nàlimwo, lyo amasù gâni galek’ibona aga maligo.11Cârhumaga ntafîra omu nda ya nyâmà, erhi nkacigendera oku nanaburhwa?12Cârhumaga habà madwî abirhi ganyankirira, cârhumaga habà mabêre abirhi ganyônsa?13Bulya rhinga buno ncîbêrîre omu murhûla, rhinga ndwîrhe nahûnga irò ntânatulukè,14haguma n’abâmi n’abarhambo b’igulu, balya bayubakire omu mpinga,15nîsi rhinga ncîbêrîre haguma n’abaluzi bàluzagya amasholo n’enshinda zâbo bazibumba marhale.16Nîsi, ncicîbêrerage cimomano càbishirwe, rhinga ntahali, rhinga ncîbêrîre nka balya barhaburhagwa.17Eyo munda yo embaka z’ebyâbi zihwêra, yo abâlikola barhamire baluhûkira.18Ebigorogo nabyo binaluhûke, birhanaciyûmva mulenge gw’owabimokera mpu bikole.19Eyo munda abarhò n’abakulu boshi cihembe ciguma, n’omujà arhaciri mujà wa ndi.20Omuhanya bici bamuhêra obulangashane, gwa bici omûka bahà omurhima guli mungo?21Ogu bahà abadwîrhe balinga olufù lurhanayisha, abalulonza kulusha obuhirhi?22Abàkacishinzire bacibonaga obudaka bw’enshinda, bakahamira omu lyânya bacihikaga omu cûsho.23Cankarhuma eyo ngalo bayihà omuntu arhanacimanyiri olunda ayêrekîre, oyu Nyamuzinda agosire.24Eyi milumbo n’ebikubi byo bikola biryo byâni, n’olujamu lwâni kwo ludwîrhe lwadubuka nka mîshi.25Ebi nayobohaga byo bino byamanyishira, n’ebi nakazâg’irhînya byo bino byamantibukirakwo.26Kuli nie ntà murhûla, ntà kuluhûka, ntà kugoheka, ntabona irò lya mûshi, ntabona lya budufu erhi kulîbwa n’amagala kurhuma.