Okuyumvanya n’okubêra omu cinyabuguma
1Mmuhûnyire, nie mushwêke muli Nyakasane, nti olugendo lwinyu lulingânane n’obwôrhere mwahamagirwemwo.2Mubè bîrhôhye na batûdu, munalemberane; muyumvanye omu buzigire,3munacîsêze okulanga obuguma bwa Mûka Mutagatîfu omu murhûla gw’ecinyabuguma.4Omubiri guli muguma na Mûka Mutatagatîfu ali muguma; n’obulangâlire mwahamagirwemwo nabwo buli buguma.5Nyakasane ali muguma Yêne, n’obuyêmêre buli buguma, n’obubatizo buli buguma.6Nyamuzinda ali muguma, y’Îshe w’abantu boshi, ye kulîre boshi, akola muli boshi, anabà muli boshi.7Ci kwônene ngasi muguma muli rhwe ahâbirwe eyâge ngalo nk’oku anatwîragwa n’enshôkano ya Kristu.8Kwo Amandiko gadesire, mpu: Arheremîre emalunga, ahêka abàbôhe, agabira abantu enshôkano.9«Arheremîre», kwo kuderha kurhi? Ka kurhali kuderha oku ali arhanzir’iyandagalira omu kuzimu?10Oyo wayandagalaga, ye wanarheremaga, arhaluka amalunga goshi, mpu abè ishwinjiro ly’ebintu byoshi.11Kandi ye washobôzagya: baguma okubà ntumwa, abandi okubà balêbi erhi bajà-bugo b’Emyanzi y’Akalembe, n’abandi okubà balungere erhi bayigîriza,12akeresa ntyo abemêzi omu mukolo gw’oburhumisi, mpu lyo ayûbaka omubiri gwa Kristu,13kuhika rhweshi haguma rhuhike omu cinyabuguma c’obuyêmêre n’ec’okumanya Mugala wa Nnâmahanga, rhulinde rhubà muntu mwimâna, rhuhike oku Lugero lukwânîneishwinjiro ly’omubiri gwa Kristu.14Ntyo lêro rhurhaciyôrhe nka bâna ba birhabà bayêhûlwa eyi n’eyi na ngasi mpûsi y’enyigîrizo zarhenga omu bunywesi bw’abantu n’omu bulyâlya bwâbo bw’okurhebana.15Ci omu kujira eby’okuli omu buzigire, rhwayûshûka omu ngasi njira, rhuyegere irhwe, ye Kristu.16Ye hà omubiri gwoshi okusimbana n’okusêra haguma oku burhabâle bw’enungo zoshi zigulisa n’omukolo gwa ngasi cirumbu; na ntyo kwo kushunjûka n’okucîyûbaka gwône omu buzigire.Obuzîne buhyâhya muli Kristu
17Lêro mâshi, mmubwîzire nnammugashire muli Nyakasane, nti murhacikâg’iyôrha nka bapagani bakashimba enkengêro zâbo za busha.18Obukengêre bwâbo buyunjwîre mwizimya, n’obuhwinja bw’omurhima gwâbo guhûsire bwarhumîre barhabona obuzîne bwa Nyamuzinda.19Bàcibêrire bacikala-nshonyi, bashimba engeso mbî y’okuhusha, bagwîra okukâjira eby’enshonyi bya ngasi lubero.20Ci mwêhe arhali ntyo kwo mwayigîrizibwe Kristu,21akabà mwamuyumvîrhe n’akabà mwayigîrizibwe muli ye nka kulyâla binali muli Yezu.22Mwayigîrizibwe oku murhegesirwe okuleka obwôrhere bwinyu burhanzi n’okuhogola omuntu wa mîra, olya ojà wabola omu kushimba enyifinjo mbî,23lyo muhinduka bahyâhya omu murhima n’omu nkengêro zinyu,24munacîhundikire omuntu muhyâhya, olya Nyamuzinda alemaga oku nshusho yâge omu bushinganyanya n’omu butagatîfu bw’okunali.25Lêro ntà kucikaz’inywerha, ci ngasi muguma akabwîra abâbo eby’okuli, bulya rhweshi rhubà ngasi muguma birumbu by’abâbo.26Mukunire, ci murhajiraga câha: izûba lirhazikaga n’obukunizi bucimmugwêrhe.27Mumanye mwankahà hishetani engwârhiro.28Ngasi wali cishambo agokôle; akole n’amaboko gâge erhikwo nk’oku bishingânîne, ciru ahash’irhabâla ab’obuligo.29Ntà luderho lubî lurhengage omu kanwa kinyu; mukaderha ebiwa binjà byône, birya byankabà lwingayo lwinjà oku bandi amango gakwânîne, n’okulêrhera ababiyumva akamalo.30Mumanye murhajiraga Mûka Mutatagatîfu gwa Nyamuzinda burhè, ye wammuhiragakwo ecimanyîso c’olusiku lw’obucunguzi.31Omujina, ennongwè, obukunizi, akadali, ebijâci, ebyôla byoshi birhenge ekarhî kinyu, haguma na ngasi coshi ciderhwa cibî.32Muciyêrekane binjà erhikwo na ba lukogo baguma oku bandi, omu kubabalirana mwêne na nnene nka kulya Nnâmahanga ammubabaliraga muli Kristu.