Obubî bw’olubaga lw’e Yope n’e Yamuniya
1Erhi babà bamâyumvanya, Lisiyasi ashubira oku bwâmi, nabo Abayahudi barhangira okuhinga amashwa gâbo.2Ci kwône, baguma omu bakulu b’abasirika bali eyôla munda: Timoteyo, Apoloniyusi mwene Geneyusi kuguma na Yeronimusi boshi na Demofoni, na kuhirakwo Nikanori murhambo w’e Cipro, bakahûguga Abayahudi barhazigaga balama n’omurhûla.3Abantu b’e Yope banacijira obu bubî bukulikîre. Banacilâlika Abayahudi bayûbaka emwâbo boshi na bakâbo n’abâna bâbo, mpu bajè omu mârho babarheganyize nka kulya barhagwêrhi kafulo ciru n’akasungunu kulibo.4Ci kwônene, bajiraga ntyo oku muhigo gwàli erhi gwarhôzirwe n’olugo. Abayahudi banaciyêmêra, nka bantu balonza omurhûla; barhàli bacîkêbirwe cici: ci erhi bahika omu karhî k’enyanja babazisa: bâli nka magana abirhi na kulusha.5Erhi Yûda amanya obwôla bubî bwajiriragwa bene wâbo, agendimanyîsa abâbo.6N’erhi babà bamâshenga Nyamuzinda, ye mucîranuzi mushinganyanya, arhabâlîre abôla bayîrhaga bene wâbo. Enyumpa zàli okw’izîko azidûlika muliro budufu, amârho gâbo nago agayôca, anacinaguza n’abalonzagya okuyâkira eyôla munda.7Ebwa kubà olugo lwàli luhamike acîgendera ci erhi anacigwêrhe omuhigo gw’okushub’igaluka n’okuherêrekeza olugo lw’abôla bantu b’e Yope lwoshi.8Erhi amanya oku abantu b’e Yamuniya nabo bagwêrhe omuhigo gw’okujirira Abayahudi bayûbaka emwâbo nk’okwôla abôla babajiriraga,9Yûda naye abarhêra budufu, abo b’e Yamuniya. Ayôca izîko n’amârho gâbo kuhika engulumira yakazibonekana e Yeruzalemu yakamoleka yo n’obwo bàli kulî nabo hantu ha lugendo lwa stadi magana abirhi na makumi anni.Olugo lwa Galadi lwarhêrwa
10Oku acîyêgûla n’abo stadi mwenda, akolaga ashimbire Timoteyo, Abaharâbu bamurhêra hôfi bantu bihumbi birhanu na kulusha bagenda n’amagulu, na banyakulwîra oku nfarasi magana arhanu.11Entambala yalûbwa akantashakûlulwa wa! Ci oku burhabâle bwa Nyamuzinda Ogala-byoshi, Yûda n’abàbo bahima ezôla nzunguzi z’omw’irungu. Oku zahimwa ntyôla, zahûna Yûda mpu abalambûlirage kw’okuboko kulyo, bamulaganya oku bamuhyûlira ebishwêkwa, n’oku bâcimukwânane omu bindi bintu.12Yûda anaciyumva oku nêci bânacimukwânane oku bindi bintu, ayêmêra okubahà omurhûla n’erhi babà bamâhânana ecigasha (mukono) bashubir’emwa babwè.13Oku bundi Yûda anacirhabâlira olugo luyûbakîrwe buzibuzibu n’ecôgo c’emitungo mihamu na mizibu, lunayûbasirwe n’abantu ba ngasi bûko; izîno ly’olwo lugo ye Kaspini.14Abôla bâli bagosirwe, omu kucîkubagira obuhamu bw’ebyôgo byâbo n’obunji bw’ebiryo bâli bamâhaka, babula obukenge oku bantu ba Yûda, bakabajâcira, ciru n’okubahehêrera n’okubabwîra ebindi binwa bigalugalu.15Abantu ba Yûda erhi babà bamâshenga Nyakasane w’igulu lyoshi, olya wahongolaga ebyôgo bya Yûda buzira ngandabuzi nîsi erhi masini g’amatabâro, bacîhonda kwo lulya lugo n’oburhwâli bunene. Emihigo n’ebikolanwa byahiraga Yeriko oku idaho amango ga Yozwè zali ngandabuzi n’amashini bantu bahukula olukûta.16Erhi babà bamârhôla olugo, bayîrhamwo bantu banji, babahungumula okurhankaderhwa, kuhika eciyanja cigali càli mw’olwo lugo calinzibà nk’eciyunjwîre n’olwîshi lw’omukò.Entumba y’oku Karnioni
17Omu kurhenga ahôla, lugendo lwa stadi magana galinda, bahika aha Caraka, emwa Abayahudi baderhwa Batubiani.18Barhacishimânaga Timoteyo ahôla hantu, àli amâharhenga buzira kubarhabâla ci kwônene asigaho entwâli zahalanga buzibu.19Ci babirhi omu barhambo b’abalwî ba Yûda, Dositeyo na Sosipateri bagend’imalîra eyôla ngabo Timoteyo asigaga ahôla hantu hazibuzibu, yali ya bantu bihumbi ikumi.20Olunda lwâge Makabeyo erhi abà amâgaba engabo bikêmbe bikêmbe aha abôla barhambo b’abasirika okurhegeka ebyôla bikembè. Naye yêne akanya ajà afûkula Timoteyo walirhabîre n’engabo y’abasirika bagenda n’amagulu bihumbi igana na makumi abirhi na bihumbi bibirhi na magana arhanu ga banyakulwîra oku nfarasi.21Erhi amanya oku Yûda akola ali hôfi hâbo, Timoteyo abà ashokoza abakazi, abâna n’ebindi birugu byasigalaga, olunda luderhwa Karnioni, càli cihugo cirhankalwîsîbwe, bulya okujamwo kwàli kuzibu erhi kubà n’orhujira rhutya-rhutya rhwa misima omwôla lugo lwoshi.22Erhi ecikêmbe cirhanzi ca Yûda cipamuka; obôba n’entemu byarhibukira oku bashombanyi. Boshi bafuduka banayôboba bwenêne okubona Olya-obona-byoshi amâcîyalagaza embere zâbo, boshi bakanyiriza bayâkira myâhu myâhu kuhika bônene barhondêra okutumirhana n’okunigana n’engôrho zâbo bônene.23Yûda abakulikira luminomino aj’anigûza ezo nshâhu, kuhika abayîrhamwo bantu bihumbi makumi asharhu.24Timoteyo yêne arhibukira omu maboko g’abasirika ba Dositeyo na Sosipateri akâbayinginga n’obwenge bunene bwenêne mpu bamulîke agende barhamuyîrhaga bulya agwêrhe naye Buyahudi banji ba bene wâbo mulibo, alagânana n’oku erhi bankamuyîrha, nabo obuhanya bwanabajakwo.25Abayinginga bwenêne oku ahizire okubalîka, kuhika Abayahudi bamulîka mpu lyo baciza bene wâbo.26Oku bundi Yûda anacirhabâlira e Karnioni n’e Atargateonianaciyîrhayo bantu bihumbi makumi abirhi na birhanu.Efroni na Sitopoli barhêrwa
27Erhi aba amâmalîra n’okukungusha abanzi n’abashombanyi bâge, Yûda arhabâlira e Efroni lugo luzibu bwenêne lwayûbakagwamwo na Lisiyasi n’abantu ba ngasi bûko; abâna b’emisole bâli oku cigamba embere z’ebyôgo bakazilwa burhagagajwa n’olugo loshi lwali luzinzîbwe masini ga kulwa n’eby’okulashîra.28Ci kwônene Abayahudi erhi babà bamâshenga olya Ogala-byoshi, Olya Ruvunangiza w’emisî y’abashombanyi banahima lulya lugo banacilugwârha, bayîrhamwo bantu bihumbi makumi abirhi na birhanu omu bantu bayûbakaga mulilwo.29Kurhenga ahôla bagolonjokera e Sitopoli lugendo lwa stadi magana galindarhu kurhenga e Yeruzalemu.30Ci kwône Abayahudi bayûbakaga eyôla munda erhi bayûs’ihamîriza oku abantu b’eyo Sitopoli banakaz’ibajirira aminjà, n’oku amango g’amalibuko banabayankirire kwinjà,31Yûda boshi n’abàbo bavuga bwenêne omunkwa oku bantu b’eyôla Sitopoli kuli agôla minjà gâbo, banabakomêreza mpu barhalekaga okukajirira obûko bwâbo aminjà. Enyuma ly’ahôla bashubira e Yeruzalemu erhi olukulu lw’emigobe lukol’irhangira.Gorigiasi arhêrwa
32Erhi olusiku lukulu luderhwa lwa Pentekoste luhwa, barhêra Gorigiasi ye warhambulaga omu Idumeya.33Oyûla anaciyisha adwîrhe bantu bihumbi bisharhu bya basirika bagenda n’amagulu, na banyakulwîra oku nfarasi magana anni.34Lwabumbana, Abayahudi bahungumuka mwandu.35Muntu muguma ye Desiteyo, nyakulwîra oku nfarasi w’omu murhwe gwa Tobiani, muntu wa burhwâli, anacihamirakwo Gorigiyasi anamurhulubira omu mukîka ajà amubulula n’emisî, lêro mpu agwârhage gulya muhera gunacizîne, musirika muguma, Trakoni, munyakulwir’oku nfarasi anacihamirakwo Dositeyo amurhola ecirhugo. Gorigiyasi anacifulumuka ntyo ayâkira e Marisa.36Mw’agôla mango engabo yali na Esdriyasi erhi yarhamire n’entambala. Okubundi Yûda anacishenga Nnâmahanga mpu ayêrekane oku ye n’ali burhabâle bwâbo, ye na murhambo wâbo omu ntambala.37Oku bundi banacirhondêra bakûbiza ebîtakîro by’amatabâro omu lulimi lw’ababusi bâbo, haguma n’ezindi nyimbo, anacirhibukira caligumiza oku bantu ba Gorigiyasi, anacibacandabukakwo.Enterekêro oku bafire
38Enyuma ly’ahôla erhi Yûda aba amashubûza engabo yâge, anacija ebwa lugo luguma lwo Odalami n’erhi olusiku lwa kalinda lw’omugobe luyîsha, banacicîyôbôla nk’oku banakomêreraga banacigereza olwa sabato ahôla hantu.39Olusiku lwakulikiraga, abantu ba Yûda banaciyîsha (bulya ago mango gali gakola gabasezize) bayishirhôla emirhumba y’abakumbaga, mpu bababishe boshi n’abalungu babo omu nshinda z’ababusi babo.40Bakazishîmâna idako ly’ebishûli bya ngasi nyakufà, ebirugu byarherekîrwe abazimu byarhengaga omu mpivu za Yamuniya, n’obwo irhegeko lyàli lihanzize Abayahudi bya bene ebyôla. Boshi banamanyira aho oku okwo kwo kwarhumaga bafà.41Boshi banacikuza Nnâmahanga kuli okôla anajiraga, ye mushinganyanya, avuhûla ebyali bifulisirwe.42Oku bundi boshi banacirhondêra okushenga banacikaz’isengera mpu obwôla bubî bwajiragwa boshi bubabalirwe, n’erya ntwâli Yûda, yanacikaz’ikomêreza abantu mpu bakacîlanga beru-kwêru, bulya bamabona bonene ebyadwirhwe n’ebyâha by’abôla bafâga.43Kandi, erhi aba amarhûla entûlo ya drakma bihumbi bibirhi, eyahanagwa n’abantu, abirhuma e Yeruzalemu mpu zijiba nterekêro oku byâha. Cijiro cinja cajiragwa n’enkengêro z’okuyêmêra obufûke zirhuma.44Bulya nk’arhàli ayêmîre obufûke bw’abasirika bâge bafâga, kwàli kwaba kwa busha na kwa kucîrheba okuhûnira abàfire.45Anakazâg’imanya oku oluhembo lwinja bwenêne lukwânîne abafà banali omu bwîra bwa Nnâmahanga. Luli lukengêro lwinja na lwîmâna olwôla. Kwo kwarhumaga okola ahâna eyôla nterekêro y’okuhûnira abàfire, mpu lyo bakûlirwa ebyâha byâbo.