ADIISƐM5
1Na nwuni nwomaa bɔ babobɔ bie wɔ bɔ ɔte ɔhene bia naso ne sa famaa nu. Ne bahworɔ ye nyunu ne ye si mukoraati, na ne bafa stamp nzoo bateta ye noa.2Na nwuni kyɛ abɔfo bie bɔ ole anwoserɛ afa konviɛ pirikua bie atea nu kyɛ: “Nwa yeɛ ɔfata kyɛ obukye nwomaa bɔ babobɔ nanu, na ɔtete stamp nemɔ fi ye noa ɔ?”3Nakoso anwuro oo, aseɛ so ne aseɛ bo oo, ebiala nne berɛ bɔ ɔhora bukyele nwomaa bɔ babobɔ ne, na ɔneane nu ɔ.4Na nzuni paa, ofikyɛ bannya ebiala bɔ ɔfata kyɛ obukye nwomaa bɔ babobɔ nanu, anaa ɔnea nu ɔ.5Nakoso mbanyi nanu kõ ha hyirele me kyɛ: “Yakyi suɛ ne. Nea, Yuda abusuakue nanu Gyata ne, David ndii ne ali ngunim, yeti ɔkɔhora kobukye nwomaa bɔ babobɔ nanu, na watete stamp nzoo bɔ bafa bateta ye noa ne.”6Na nwuni kyɛ, Boan Ba bie gyi ɔhene bia ne, ateasefoɛ nna ne, yeɛ mbanyi ne afia; boan ba ne, né wayɛ kyɛ bapɛ ye ti ne; na né ole mmɛen nzoo ne anyeɛ nzoo, na anyeɛ ne gyi berɛ ma Nyameɛ honhom nzoo bɔ wasoma bɛ wɔ aseɛ naso mukoraati ne.7Na ɔhɔle bɔ ɔte ɔhene bia naso ne berɛ, na olɛle nwomaa bɔ babobɔ ne fili ye sa famaa nanu.8Olɛle nwomaa nala pɛ, ateasefoɛ nna ne, bɛ ne mbanyi 24 ne butuli Boan Ba ne nyunu berɛ, né bɛ nu biala le dwotai ne sikaa kɔkorɛ kyɛnzee bɔ insɛns wɔ nu. (Insɛns ne te akrongronfoɛ né mbaeɛ.)9Na bɛtole edwein foforɛ kyɛ:“Wɔ yeɛ ɛfata kyɛ edɛ nwomaa bɔ babobɔ ne, na ɛte ye stamp nemɔ noa ɔ,ofikyɛ bɛhuni wɔ,na ɛfale wɔ mogya tɔle mmenia fili abusuakue,dwudwolɛ, mmenia ne maen biala nu mane Nyameɛ.10Na ayɛ bɛ ahemman ne asɔfo ama yɛ Nyameɛ,na bɛkoli aseɛ naso hene.”11Afei ndole me nye, na ndele abɔfo pee bɔ bapɛ ateasefoɛ ne, mbanyi ne, ne ɔhene bia nanwo bayia ne konvi, ne bɛ dodoɔ te apepe-srala buburu-gyaa.12Na bɛteane nu bɛhane kyɛ:“Boan Ba bɔ bɛhuni ye ne,tumi, ahonyadeɛ,nyanza, anwoserɛ, nidie,anuonyam ne nhyira fata ye.”13Na ndele kyɛ abɔdeɛ biala bɔ ɔwɔ anwuro, aseɛ so, aseɛ bo, ɛpo nu, ɔne nikye biala bɔ ɔwɔ bɛ nu ne ka kyɛ:“Nhyira, nidie, anuonyam ne tumiha bɔ ɔte ɔhene bia naso ne,ɔne Boan ba ne daa, daa.”14Na ateasefoɛ nna ne hane kyɛ: “Amen!” Na mbanyi ne fale bɛ nyunu butuli berɛ, na bɛsõne.
Lexihub