ADIISƐM21
1Na nwuni anwuro foforɛ ne aseɛ foforɛ; né anwuro daa ne aseɛ daa ne apɛ nu, na ɛpo nne berɛ kõ.2Na nwuni kuro krongron ne, Yerusalem foforɛ ne kyɛ ofi Nyameɛ berɛ wɔ anwuro odwu ba ase, na né basiesie ye kyɛ ayeforɔ bɔ bɛfa ye bɛkɔma ohu ne.3Na ndele konviɛ kandinga bie mvili ɔhene bia nanu kyɛ:“Nea, Nyameɛ tɛnt wɔ mmenia nu,na ɔne bɛ kɔtena, ná bayɛ ye maen.Na Nyameɛ bɔbɔ ne bɛ kɔtena.4Na okokyikyi bɛ nye abo moen mukoraati,Na ewue nne berɛ kõ,na aworaborɛ ne esuɛ ne yealɛ biala nne berɛ kõ,ofikyɛ daa nningyein nemɔ apɛ nu.”5Na bɔ ɔte ɔhene bia naso ne hane kyɛ: “Nea, meyɛ nningyein mukoraati foforɛ.” Osa hane kyɛ: “Tworɔ, ofikyɛ edwirɛ hemɔ te nahorɛ, na ɔkɔwa nu.”6Na ɔha hyirele me kyɛ: “Wawa nu! Me yeɛ nne Alfa ne Omega, ahyɛaseɛ ne awieɛ ne. Ebiala bɔ nzuhɔen ku ye ne, ngɔma ye ngoa nzue ti nanu nzue ne bie mbaen.7Ebiala bɔ odi ngunim ne, okonya ɛhe amukoraati, na ngɔyɛ ye Nyameɛ, ná ye koso wayɛ mma.8Nakoso bɛ bɔ bɛte serɛ, bɛ bɔ bɛlle gyidie, bɛ bɔ bɛyɛ nningyein bɔ ɔyɛ tɛ, awudifoɛ, adwamammɔfoɛ, bɛ bɔ bɛyɛ ahonhomzɛm, bɛ bɔ bɛsõ bosoen, ne ngondombofoɛ mukoraati de, bekonya bɛ kyɛfa wɔ see ne sɔfa nanu. Ɛhe yeɛ ole ewue bɔ ɔtɔ so nyɔ ne.”9Na abɔfo nzoo bɔ bɛtire-tira kyɛnzee nzoo bɔ ɔhaw bɔ ɔpɛ yebo ne wɔ nu nanu kõ wale me berɛ, na ɔha hyirele me kyɛ: “Bra, na ngohyire wɔ ayeforɔ ne, Boan Ba ne aye ne.”10Na ɔnate honhom naso fale me hɔle bokaa kandinga tendee bie so, na ohyirele me Yerusalem kuro krongron ne kyɛ odwu fi Nyameɛ berɛ wɔ anwuro ba ase,11na ne ole Nyameɛ anuonyam. Na ɔta hyireinn te kyɛ nyɔboɛ pa paa, te kyɛ nyɔboɛ bɔ bɛfrɛ ye jasper ne, hyireinn kyɛ ahwehwɛ.12Ole fasue pirikua tendee, na ole anoa 12 bɔ abɔfo 12 gyigyi ye nwo, na ne bahworɔ Israel mmaa mmusuakue 12 ne dumaa bagua anoa nemɔ nwo.13Né anoa nanu nza wɔ afiteleɛ, nza wɔ sorɔ, nza wɔ ngwaen, yeɛ nza wɔ atɔleɛ.14Né sua ne fasue ne koso le fapem 12, na ne bahworɔ Boan Ba né asomafoɛ 12 ne dumaa bagua bɛ nwo.15Né abɔfo bɔ ɔne me dwudwo ne tira elemmire bɔ bafa sikaa kɔkorɛ bayɛ, na né ɔbaafa susu kuro ne, ye anoa ne, ɔne ye fasue ne.16Ne kuro ne te ahinanan, ye tendee ne ye piri te pɛ. Na ɔfale elemmire ne susuli kuro ne, né ɔte kilomita 2,220; ye tendee, ye piri, ne ye tɛtrɛtɛ ne te pɛ.17Osa susuli ye fasue ne, né ɔte mita 64, osusuli ye kyɛbɔ sona susu nikye, na sɔ ala yeɛ abɔfo koso susu ye ɔ.18Jasper yeɛ ne bafa bayɛ fasue ne ɔ, na kuro ne koso, ne ɔte sikaa kɔkorɛ pa paa, bɔ ye nye te kyɛ ahwehwɛ.19Kuro ne fapem bɔ fasue ne gyi so ne, bɛfale nyɔboɛ pa mukoraati bie yeɛ bɛhyehyɛle ɔ: Bɔ oli moa ne te jasper, bɔ ɔtɔ so nyɔ ne te safire, bɔ ɔtɔ so nza ne te kasedoni, bɔ ɔtɔ so nná ne te emerald,20nnu ne te sardons, nzia ne te kanelian, nzoo ne te krisolite, mmɔtwɛ ne te beril, ngona ne te topaz, buru ne te krisoprase, buru-ne-kõ ne te hasin, yeɛ buru-ne-nyɔ ne te amatɛs. 21Afei koso, agudeɛ pa 12 yeɛ ne bafa bayɛ anoa 12 ne ɔ. Ná kuro né dwaaso ne te sikaa kɔkorɛ pa bɔ ye nye la berɛ te kyɛ ahwehwɛ.22Mannwu asɔre awuro biala wɔ nu, ofikyɛ Awurade, Otumvoɛ Nyameɛ ne né Boan Ba ne yeɛ bɛte ye asɔre awuro ɔ.23Na onhia kyɛ eyia anaa ɛsraen ta kuro nanu, ofikyɛ Nyameɛ anuonyam ta kuro nanu, na Boan Ba ne yeɛ ɔte ye kanea ɔ.24Maen-maen ne kɔnate ye kanea nanu, na aseɛ so ahemvo kɔfa b'anuonyam kɔwa nu.25Na kuro ne anoa ne kɔla so daa bɔ bɛngɔto nu ɔ, ofikyɛ aleɛ ngɔsa berɛ.26Na bɛkɔfa maen-maen n'anuonyam ne nidie bɛkɔwa nu.27Nakoso nikye biala bɔ ye nwo nde, ɔne ebiala bɔ ɔyɛ akyiwadeɛ anaa ɔlaka-laka mmenia ne, ɔngɔhɔ kuro nanu lle. Bɛ bɔ bahworɔ bɛ dumaa wɔ Boan Ba ne ngoa nwomaa nanu ne ngome yeɛ bɛkɔhɔ nu ɔ.
Lexihub