ADIISƐM11
1Na ɔfale elemmire bɔ wayɛ kyɛ bakaa tendee bie mane me, yeɛ ɔhane kyɛ: “Dwɔso, na susu Nyameɛ asɔre awuro ne né afɔleɛ bokyea ne, na ka bɛ bɔ bɛsõ [Nyameɛ] wɔ berɛ ne.2Nakoso, asɔre awuro né aluo berɛ ne de, yakyi, nnɛsusu, ofikyɛ bafa bama maen-maen ne, na bɛkɔfa bɛ gya bɛkotietia kuro krongron naso bosome 42.3Na ngɔmaa m'adanzefoɛ nyɔ ne kowura brisie, ná bahyɛ ngɔm ngyẽa 1,260.”4Sɔ adanzefoɛ nyɔ hemɔ gyi berɛ ma olive mmakaa nyɔ ne kanea mmakaa nyɔ bɔ bɛgyi aseɛ Wura ne nyunu ne.5Sɛ ebie pena kyɛ opira bɛ a, see fi bɛ noa nu bayera b'atamfo nemɔ. Ebiala bɔ ɔpena kyɛ ɔha bɛ ne, sɔ atee he aso yeɛ odikyɛ bɛku ye ɔ.6Sɔ adanzefoɛ hemɔ le tumi kyɛ bɛto anwuro nu, kyɛbɔ ɔkɔyɛ a ngyẽa bɔ bɛhyɛ bɛ ngɔm ne, nzue ngɔtɔ, na bɛle tumi bɔ bɛmaa nzue kakyi mogya, ná bɛfa ɔhaw biala bie bɛba aseɛ naso mmerɛ biala bɔ bɛkuro ɔ.7Sɛ beyie bɛ adanzeɛ ne a, kaka suronyi-suronyi bɔ ofili kumaa kuron-kuron nanu wale ne, ɔne bɛ kɔhõ, okoli bɛ so ngunim na wahu bɛ.8Na bɛ fuin ne kogua kuro kandinga ne dwaaso, sɔ kuro ne yeɛ honhom nu bɛfrɛ ye Sodom ne Egypt ne. Na ɛberɛ yeɛ bɛbɔle b'Awurade asɛnnua nu ne.9Na mmenia bɔ bɛfi abusuakue, dwudwolɛ, ne maen ahoroɛ nu kɔnea bɛ fuin ne ɛlɛsa ne bue, na bɛngɔma bɛngɔfa bɛ fuin ne bɛngɔgua kumaa nu.10Na bɛ ti, mmenia bɔ bɛtete aseɛ naso ne nye kɔgye, bɛkoli ahurusi na bahyehyɛ bɛ nwo nikye, ofikyɛ sɔ adiifoɛ nyɔ he maa bɛ bɔ bɛtete aseɛ naso ne nwo yerale bɛ paa.11Na ɛlɛsa né si ne, ngoa honhom fili Nyameɛ berɛ wurale bɛ nu, na bɛdwɔso bɛgyinane bɛ gya so, na esuronyi hane bɛ bɔ bɛnwuni bɛ ne paa.12Na bɛtele kyɛ konviɛ piri bie fi anwuro ka kyire bɛ kyɛ: “Ɛmɔfo bɛbra wa!” Na bɛfale munungum nu bɛhɔle anwuro, wɔ b'atamfo nemɔ nyunu.13Sɔ mmerɛ nanu ala, aseɛ wosolɛ kandinga bie sili, na kuro né ngyekyɛmue buru nu kõ bubuli, na aseɛ wosolɛ ne hunu mmenia 7,000, na esuronyi hane bɛ ngaa ne, yeti bɛhyɛle anwuro Nyameɛ ne anuonyam.14Mmusue bɔ ɔtɔ so nyɔ ne awa awieɛ. Nea, ɔngɔhyɛ, bɔ ɔtɔ so nza ne kɔwa.15Abɔfo bɔ ɔtɔ so nzoo ne huli ye awɛen ne. Na konviɛ pee teɛteane nu wɔ anwuro kyɛ:“Wiase ahennie ayɛ y'Awurade ne ye Kristo ne deɛ,na okoli hene daa daa.”16Na mbanyi 24 bɔ bɛtete bɛ bia so wɔ Nyameɛ nyunu ne fale bɛ nyunu butuli berɛ, na bɛsõne Nyameɛ17bɛhane kyɛ:“Awurade, Otumvoɛ Nyameɛ,wɔ yeɛ ne ɛwɔ berɛ, ná etɛ́ wɔ berɛ ɔ.Yɛda wɔ ase kyɛ afa wɔ tumi kandinga ne,ná ahyɛ yebo edi tumi.18Nakoso maen-maen ne fɛle yaa paa,na wɔ koso ɛfɛle yaa.Na mmerɛ aso kyɛ ebu awufo atɛn,ná ɛfa wɔ ngoaa adiifoɛ, akrongronfoɛ,ne bɛ bɔ bɛsuro wɔ dumaa ne akatua ma bɛ,mmaa-mmaa ne mbiri,ná ɛsɛkye bɛ bɔ bɛsɛkye aseɛ ne.”19Afei bɛbukyele Nyameɛ asɔre awuro bɔ ɔwɔ anwuro ne, na bɛnwuni ye apam alaka ne wɔ ye asɔre awuro berɛ. Na agralaa bobɔle nu, agralaa tetele yerɛm-yerɛm, na dede, aseɛ wosolɛ ne asukɔtwea wale.
Lexihub