2 Tɛsalonikafoɛ2
1Afei aliemaa mɔ, mmerɛ bɔ y'Awurade Yesu Kristo kɔwa, ɔne mmerɛ bɔ bɛkɔboɔboa yɛ noa maa yɛkooyia ye ne de, yɛ srɛ ɛmɔ,2sɛ ɛmɔte kyɛ bɛkeka kyɛ Awurade kyẽa ne awa, ná sɛ bɛka kyɛ ɔte honhom nu dwirɛ, anaa ebiemɔ yeɛ bɛka ɔ, anaa ngrataa bɔ ofi yɛ berɛ a, nnɛmaa ɛmɔ tia nu yɛ ɛmɔ kesenee, anaa ɛmɔ kunu tete ɛmɔ.3Nnɛmɔ maa ebiala laka-laka ɛmɔ wɔ atee biala so, ofikyɛ sɔ kyẽa ne ngɔwa, sana atuateɛ ne di moa ba, maa sona bɔ onni mmeraa so ne — baa bɔ wasɛkye ne nwo da berɛ kora.4Ye yeɛ ɔma ye nwo so na odwɔso tia nikye biala bɔ bɛfrɛ ye nyameɛ, anaa nikye biala bɔ bɛsõ ye ne. Yeti, ɔkɔtena Nyameɛ asɔre awuro berɛ, na ɔkɔmaa ebiala konwu ye kyɛ, ɔte nyameɛ.5Ɛmɔngaye kyɛ mmerɛ bɔ né nwɔ ɛmɔ berɛ ne, né metaa meka sɔ dwirɛ he mekyire ɛmɔ?6Ɛmɔ de, nnaa ɛmɔse bɔ wasi ye atee ne, kyɛbɔ ɔkɔyɛ a, ye nwo kɔla berɛ wɔ ye mmerɛ nu ne.7Nahorɛ nu, bɔ onni mmeraa so ne nwo dwirɛ bɔ wafea ne ahyɛ yebo dada, nakoso, ɔkɔhɔ so kɔfea koodwu kyɛ, bɔ wasi y atee ne kofi berɛ ɔ.8Ɛhene si ne, bɔ onni mmeraa so ne bo kɔla so, ye yeɛ Awurade Yesu kɔfa ye noa nu honhom kɔye ye kofi berɛ wɔ ye walɛ nanu ne, na sɛ bɛda Awurade Yesu ali a, ɔkɔsɛkye ye koraa.9Satan yeɛ ɔkɔmaa bɔ onni mmeraa so ne kɔwa ɔ, na ɔkɔmaa ɔkɔyɛ nningyein bɔ ɔyɛ suro, anwanwadeɛ bɔ ɔtte nahorɛ, nzɛngyerɛneɛ ahoroɛ,10ne nnaka-nnaka bɔ ɔttemaye kɔfa kɔ laka-laka bɛbɔ bɛsɛkye ne. Ofikyɛ nahorɛ bɔ okole bɛ ngoa ne, bannya ɔdɔ bamma ye.11Yeti, Nyameɛ maa nnaka-nnaka nyane bɛ so tumi, kyɛbɔ ɔkɔyɛ a, bɛkole ngondombo ne bɛkoli,12na wamaa babu bɛ mukoraati atɛn, ofikyɛ banne nahorɛ ne banni, mmom né bɛ nye gye nningyein bɔ ɔndengyɛ nwo.13Nakoso, aliemaa mɔ bɔ Awurade dɔ ɛmɔ, ɛmɔ ti, odikyɛ daa yɛda Nyameɛ ase, ofikyɛ ahyɛaseɛ ne yeɛ Nyameɛ yele ɛmɔ kyɛ ɛmɔnya daa ngoa, nate ye honhom bɔ ɔfa tele ɛmɔ nwo, ɔne gyidie bɔ ɛmɔle ye wɔ nahorɛ nanu naso.14Ɔnate nzɛmba bɔ yɛka naso yeɛ ɔfrɛle ɛmɔ wale daa ngoa nanu ɔ, kyɛbɔ ɔkɔyɛ a, ɛmɔ konya y'Awurade Yesu Kristo anuonyam ne.15Yeti aliemaa mɔ, ɛmɔgyina pindinn, na ɛmɔsɔ bɔ yɛhyirele ɛmɔ nanu yé, kyɛ ɔte edwirɛ bɔ yɛfale yɛ noa yɛ hane, anaa ngrataa bɔ yɛ hworɔle ne.16Afei, y'Awurade Kristo Yesu bɔbɔ ne yɛ Baba Nyameɛ bɔ ɔlɔle yɛ, na ye adom ti ɔmane yɛ awerɛkyekye bɔ ɔwɔ berɛ daa ne anidasoɛ pa ne,17ɔma ɛmɔ ahone tɔ ɛmɔ kunu, na ɛmɔyɛ se wɔ dwudwolɛ ne adwuma pa biala nu.
Lexihub