2 KORINTOFOƐ2
1Na mayɛ m'adwene kyɛ, mengɔwa ɛmɔ berɛ ma ɛmɔ wora ngɔbɔ kõ.2Ofikyɛ sɛ me maa ɛmɔ wora bɔ a, nwa bieku yeɛ ɔkɔmaa me nye kɔha ɔ? Nná ɛmɔ bɔ mamaa ɛmɔ wora abɔ nala?3Ɛhene ati yeɛ ndworɔle krataa hene ne, kyɛbɔ meba a, mmenia bɔ odikyɛ medi bɛ nwo ahurusi ne, bɛngɔma me wora ngɔbɔ ɔ. Ná nne gyidie kyɛ, bɔ ɔmaa me nye gye ne, ɛhene ala yeɛ ɔmaa ɛmɔ koso ɛmɔ nye gye ɔ.4Ofikyɛ nne ahometrɛ, ahone nu yealɛ, ne ɛmoen yeɛ ndworɔle krataa ne mmerɛle ɛmɔ ɔ. Nná kyɛ mepena kyɛ ɛmɔ wora bɔ, na mmom mepena kyɛ ɛmɔnwu ɔdɔ bɔ nne ye mma ɛmɔ ne.5Na sɛ ebie ama aworaborɛ awa a, nná me ngome yeɛ wamaa me wora abɔ ɔ, atee bie so ne, ɛmɔ mukoraati. Menguro kyɛ mesɛkye edwirɛ ne koraa.6Sɔ sona ne de, asotwe bɔ mmeni dodoɔ ne afa ama ye ne te pa,7yeti, ɛmɔfa bɛhyɛ ye, na ɛmɔkyekye ye wora, wanyɛ sɔ a, aworaborɛ kohu ye. 8Yeti mesrɛ ɛmɔ, ɛmɔma onwu ye kyɛ ɛmɔdɔ ye.9Na ɛhe ati yeɛ ndworɔle krataa ne mmerɛle ɛmɔ ne, né mepena kyɛ menwu kyɛ, sɛ ɛmɔyɛ sotie wɔ nikye biala nu a.10Na ebiala bɔ ɛmɔ kɔfa bɛkɔhyɛ ye ne, me koso mafa mahyɛ ye. Na nikye biala bɔ mafa mahyɛ ne, (sɛ mafa mahyɛ a), ɛmɔ ti yeɛ mafa mahyɛ wɔ Kristo nyunu ne,11kyɛbɔ ɔkɔyɛ a, Abɔnzam ngonya yɛ, ofikyɛ yɛse ye atee nemɔ.12Mmerɛ bɔ ngɔle Troa kyɛ mekwaaha Kristo nwo nzɛmba ne, atee bie bukye mane me wɔ Awurade nu.13Nakoso né me nwo ndɔ me, ofikyɛ mannwu nniema Tito wɔ berɛ. Yeti mene bɛ lili ngraa, yeɛ ngɔle Makedonia ɔ.14Nakoso asennaa ha Nyameɛ, ye yeɛ daa odi yɛ nyunu maa yɛne Kristo to sanden wɔ ngunim nu, na ɔnate yɛ so amaa ye nimdeɛ nanwo pambaen ne awuro-wura nekaa biala.15Na Nyameɛ nyunu de, yɛte Kristo nwo pambaen ma bɛ bɔ bedɛ bɛ ngoa, ɔne bɛ bɔ bɛsɛkye ne.16Bɛ bɔ bɛsɛkye ne de, yɛte pambaen bɔ ofi ewue nu ɔkɔ ewue nu; na bɛ bɔ bedɛ bɛ ngoa ne de, yɛte pambaen bɔ ofi ngoa nu ɔkɔ ngoa nu. Na nwa yeɛ adwuma he fata ye ɔ?17Yɛ, ofikyɛ yɛ de, yɛndɔne Nyameɛ dwirɛ ne, kyɛbɔ mmeni pee yɛ ne, mmom yɛfi y'ahone nu yɛdwudwo wɔ Kristo nu kyɛ mmenia bɔ Nyameɛ asoma bɛ, wɔ Nyameɛ nyunu.
Lexihub