2 KORINTOFOƐ10
1Afei me Paul, mefa odwoɔ ne ayamye bɔ Kristo le ye ne mesrɛ ɛmɔ. Sɛ mene ɛmɔ wɔ berɛ a, nnde sona biala, nakoso sɛ nne berɛ a, me maa ɛmɔnwu ye kyɛ nne akukuduro paa.2Mesrɛ ɛmɔ, meba a, mengɔfa akukuduro mengɔwa kyɛbɔ né menea atee ne, ná wamma me nye ammoro bɛ bɔ bɛbu yɛ kyɛ yɛnate anwoɔnaen nu naso.3Ɔwɔ nu kyɛ yɛnate anwoɔnaen nu de, nakoso yɛngɔ koɛ anwoɔnaen nu.4Ofikyɛ nningyein bɔ yɛfa yɛkõ ne, ɔtte anwoɔnaen nu nningyein, nakoso Nyameɛ maa ɔyɛ se, na yɛkora yɛfa yɛtutu nningyein bɔ yebo atimu paa po yɛgua.5Ná yɛtutu nzusuyɛɛ ne nikye biala bɔ wama ye nwo so watia Nyameɛ nimdeɛ ne yɛgua, na yɛma adwene biala yɛ akoaa, ná ɔbrɛ ye nwo ase ma Kristo.6Na yayɛ krado kyɛ, ɛmɔ sotie nya di mu ala pɛ, yɛkɔhwe ebiala bɔ ɔkɔyɛ asoserɛ ne so.7Bɔ otua anyeɛ yeɛ ɛmɔnea ɔ. Sɛ ebie bu ye nwo kyɛ ɔte Kristo deɛ a, ma osa dwene sɔ nahorɛ dwirɛ he anwo: Kyɛbɔ ɔte Kristo deɛ ne, sɔ ala yeɛ yɛ koso yɛte Kristo deɛ ɔ.8Awurade ama yɛ tumi kyɛ yɛma ɛmɔnya ngɔsoɛ, wamma yɛ tumi kyɛ yɛbu ɛmɔ abanu; na sɛ mefa sɔ tumi ne mehoɔhoa me nwo maa ɔbo so kaa po a, ɔnyɛ me fɛle.9Na membena kyɛ ɔbayɛ kyɛ mefa me ngrataa me nwuna-nwuna ɛmɔ.10Ofikyɛ, ebiemɔ keka kyɛ: “Ye ngrataa ne de, ye noa yɛ se, na enu yɛ nno, nakoso sɛ ye bɔbɔ ɔwɔ wa a, ɔyɛ mmerɛ, na ye dwirɛ mbɛ asue.”11Odikyɛ sɔ sona ne te ye nwo bo kyɛ, bɔ yɛka ye wɔ yɛ ngrataa nanu mmerɛ bɔ yɛnne berɛ ne, yɛ ba a, ɛhene ala yeɛ yɛkɔyɛ ɔ.12Yɛmmɔ yɛ nwo mmusue kyɛ yɛfa yɛ nwo yɛboka bɛ bɔ bɛkamvo bɛ nwo naso, anaa yɛfa yɛ nwo yɛtoto bɛ nwo po. Sɛ bɛfa bɛ nwo bɛsusu bɛ mmango, na bɛfa bɛ nwo bɛtoto bɛ mmango nwo a, okyire kyɛ bɛnze nworɛ.13Na yɛ de, yɛngɔ-hoɔhoa yɛ nwo ma ɔngɔbo so, mmom yɛkɔ-hoɔhoa yɛ nwo wɔ ɛwɛen bɔ Nyameɛ asusu ama yɛ nanu, na sɔ wɛen ne, ɔbadwu ɛmɔ berɛ.14Ná yɛndwe yɛ nu ma ɔmmo so, te kyɛ ɛnwa yandwu ɛmɔ berɛ ne. Ofikyɛ yɛ yeɛ yɛli moa yɛfale Kristo nwo nzɛmba ne yɛwale alaa yɛɛdwuli ɛmɔ berɛ ɔ.15Ɔtte kyɛ yɛhoɔhoa yɛ nwo maa ɔbo so, ná yɛfa adwuma bɔ ebiemɔ ayɛ yɛhoɔhoa yɛ nwo. Mmom yɛle anidasoɛ kyɛ, mmerɛ bɔ ɛmɔ gyidie yɛ piri ne, bɔ yayɛ ye wɔ y'aseɛ nanu né koso kɔyɛ piri,16kyɛbɔ ɔkɔyɛ a, yɛkɔha nzɛmba ne wɔ maen ahoroɛ bɔ ɔwɔ ɛmɔ si dɔ nanu, ná yamva adwuma bɔ ebie ayɛ ye dada wɔ nekaa bie ne yanhoɔhoa yɛ nwo.17“Nakoso, bɔ ɔhoɔhoa ye nwo ne, ma ɔhoɔhoa ye nwo wɔ Awurade nu.”18Ofikyɛ nná bɔ ɔkamvo ye nwo ne yeɛ ɔfata ɔ, mmom bɔ Awurade kamvo ye ne.
Lexihub