1 YOHANE2
1Me mmaa mɔ, metworɔ ɛhe mebrɛ ɛmɔ, na ɛmɔ anyɛ bɔne. Nakoso, sɛ ɛmɔ nu bie yɛ bɔne a, yele kamafoɛ wɔ Baba ne nwo berɛ, yeɛ ole teneneeniɛ Yesu Kristo.2Ye yeɛ ɔpata ma yɛ bɔne, nná yɛ ngome, mmom ewiase namukoraati.3Sɛ yɛkɔ so yɛdi ye ahyɛdeɛ so a, ɛhene yeɛ okyire kyɛ yɛse ye ɔ.4Sɛ ebie ka kyɛ: “Mese Ye,” nakoso onni ye ahyɛdeɛ so a, né ɔlaka, na nahorɛ ne nne ye nu.5Nakoso, ebiala bɔ odi ye dwirɛ so ne, sɔ sona nanu yeɛ Nyameɛ dɔ di mu ɔ. Na ɛhe yeɛ ɔmaa yɛnwu kyɛ yɛne ye te kõ.6Na ebiala bɔ ɔka kyɛ ɔne ye te kõ ne, odikyɛ ɔkɔ so bɔ ye bra kyɛbɔ Yesu bɔle ye bra ne.7Aliemaa mɔ, nná ahyɛdeɛ foforɛ bie yeɛ metworɔ mebrɛ ɛmɔ ɔ, mmon ahyɛdeɛ bɔ ahyɛaseɛ ne ɛmɔ nyane ye nala. Sɔ ahyɛdeɛ daa ne yeɛ ole edwirɛ bɔ ɛmɔtele ne.8Afei, metworɔ ahyɛdeɛ foforɛ mebrɛ ɛmɔ. Sɔ ahyɛdeɛ ne, ɔte nahorɛ wɔ ye ne ɛmɔ nu. Ofikyɛ awosii ne pɛ nu, ná kanea né ahyɛ yebo ɔta.9Ebiala bɔ ɔka kyɛ ɔwɔ kanea nanu, nakoso ɔtane oliema ne, ɔtɛ́ wɔ awosii nu.10Ebiala bɔ ɔdɔ oliema ne wɔ kanea nu, na sintidua biala nne ye nu. 11Nakoso ebiala bɔ ɔtane oliema ne wɔ awosii nu, sɔ sona ne nate awosii nu, na ɔnze nekaa bɔ ɔkɔ ɔ, ofikyɛ awosii ne asi ye nye.12Me mmaa mɔ, metworɔ ɛhe mebrɛ ɛmɔ,ofikyɛ ye dumaa nati, bafa ɛmɔ bɔne bahyɛ ɛmɔ.13Baba mɔ, metworɔ ɛhe mebrɛ ɛmɔ,ofikyɛ ɛmɔ anwu bɔ ɔwɔ berɛ fi ahyɛaseɛ.Mmrandeɛ, metworɔ ɛhe mebrɛ ɛmɔ,ofikyɛ ɛmɔ ali ɔbɔnefoɛ naso ngunim.Ngwalaa, metworɔ ɛhe mebrɛ ɛmɔ,ofikyɛ ɛmɔ anwu Baba ne.14Baba mɔ, metworɔ ɛhe mebrɛ ɛmɔ,ofikyɛ ɛmɔ anwu bɔ ɔwɔ berɛ fi ahyɛaseɛ ne.Mmrandeɛ, metworɔ ɛhe mebrɛ ɛmɔ,ofikyɛ ɛmɔ nwo yɛ se, Nyameɛ dwirɛ ne tɛ́ wɔ ɛmɔ nu,na ɛmɔ ali ɔbɔnefoɛ naso ngunim.15Nnɛmɔ nya ɔdɔ bɛma ewiase ne, anaa nningyein bɔ ɔwɔ wiase nanu ne. Sɛ ebie dɔ wiase ne a, ɔnnɔ Baba ne.16Ofikyɛ nningyein bɔ ɔwɔ ewiase ne—anwoɔnaen akɔnnɔ, anyeɛ akɔnnɔ, ɔne nningyein bɔ sona fa hoahoa ye nwo ne—nná Baba ne berɛ yeɛ ofi ɔ, mmom ofi wiase.17Afei ewiase ne, ɔne ye akɔnnɔ ne pɛ nu, nakoso ebiala bɔ ɔyɛ bɔ Nyameɛ kuro ne kɔtena berɛ daa.18Me mmaa mɔ, mmerɛ bɔ ɔpɛ yebo ne ɛhe, na kyɛbɔ ɛmɔtele kyɛ antikristo kɔwa ne, kesaalae de, antikristo pee awa wiase. Ɛhe yeɛ ɔmaa yɛnwu kyɛ yɛwɔ mmerɛ bɔ ɔpɛ yebo nanu ne.19Bɛfili yɛ nu yeɛ bɛhɔle ɔ, nakoso, né bɛ bokka yɛ so, ofikyɛ sɛ bɛboka yɛ so a, ahaa bɛne yɛ tenane. Nakoso, bɛfili yɛ nu, kyɛbɔ ɔkɔyɛ a, yekonwu kyɛ nná ebiala yeɛ ɔboka yɛ so ɔ.20Na ɛmɔ de, krongroniɛ ne asra ɛmɔ, na ɛmɔ nu biala le nimdeɛ.21Krataa he bɔ metworɔ mebrɛ ɛmɔ ne, ongyire kyɛ ɛmɔnze nahorɛ ne, mmom bɔ ɔmaa metworɔ yeɛ ole kyɛ, ɛmɔse nahorɛ ne, na ɛmɔse kyɛ ngondombo biala mvi nahorɛ nanu mma.22Nwa yeɛ ole ngondomboniɛ ne? Yeɛ ole sona bɔ onne ndonu kyɛ Yesu te Kristo ne. Sona bɔ onne Baba ne ne Baa ne ndonu ne, ye yeɛ ole antikristo ne.23Ebiala bɔ onne Baa ne ndonu ne, onne Baba ne koso ndonu, nakoso, ebiala bɔ odɛ́ Baba ne to nu ne, odɛ́ Baa ne koso to nu.24Yeti, ɛmɔma edwirɛ bɔ ɛmɔ ate bafi ahyɛaseɛ ne tena ɛmɔ nu, na bɔ ɛmɔ ate bafi ahyɛaseɛ ne tena ɛmɔ nu a, ɛmɔ kɔtena Baa ne, ɔne Baba ne nu daa.25Na bɔ wafa wahyɛ yɛ bɔ yeɛ ole daa ngoa.26Bɔ metworɔ mebrɛ ɛmɔ ne, ɔfa bɛ bɔ bɛpena kyɛ bɛlaka-laka ɛmɔ nanwo.27Na ɛmɔ de, bɔ ɔfa srale ɛmɔ ne tɛ́ wɔ ɛmɔ nu, yeti ye nwo nhia kyɛ ebiala kyirekyire ɛmɔ. Ofikyɛ nikye bɔ ɔfa srale ɛmɔ ne kyirekyire ɛmɔ nikye biala, ɔka nahorɛ, ɔmbɛ anoanu. Kyɛbɔ wahyirehyire ɛmɔ ne, ɛmɔ ne bɔ ɔsrale ɛmɔ ne yɛ kõ.28Yeti, me mmaa mɔ, ɛmɔ ne ye yɛ kõ, na sɛ bɛda ye ali a, yahora yadwudwo, na yamvɛle wɔ ye nyunu.29Sɛ ɛmɔse kyɛ ɔte teneneeniɛ a, ye de ɛmɔse kyɛ ebiala bɔ ɔyɛ bɔ ɔtengyɛ ne, ye yeɛ ɔwole ye ɔ.
Lexihub