1 KORINTOFOƐ11
1Ɛmɔsuesua me, kyɛbɔ nzuesuane Kristo ne.2Aliemaa mɔ, me kamvo ɛmɔ, ofikyɛ ɛmɔkaye me wɔ nikye biala nu, na ngyerɛkyerɛ bɔ mva mmane ɛmɔ ne koso, ɛmɔdi so pɛpɛɛpɛ.3Nakoso, mepena kyɛ ɛmɔnwu ye kyɛ, brienzua biala ti yeɛ ole Kristo, brasua biala ti yeɛ ole brienzua, na Kristo koso ti yeɛ ole Nyameɛ.4Brienzua biala bɔ ɔbɔ mbaeɛ anaa ɔhyɛ ngɔm a, ɔkɔkata ye ti so ne, wagua ye ti ne nyunu ase.5Na brasua biala bɔ ɔbɔ mbaeɛ anaa ɔhyɛ ngɔm a, ɔngata ye ti so ne, wagua ye ti ne nyunu ase, ofikyɛ ɔte kyɛ wabɔ sakola nala.6Sɛ brasua angata ye ti so a, ye de ma ɔpra ye ti nwiaa ne. Na sɛ ɔyɛ fɛle kyɛ brasua kɔpra ye ti de a, ma ɔkata so.7Brienzua de nnɛmaa ɔkata ye ti so, ofikyɛ ɔte Nyameɛ suban ne ye anuonyam; nakoso brasua de, ɔte brienzua anuonyam.8Ofikyɛ nná brasua nu yeɛ brienzua fi ɔ, brasua mmom yeɛ ofi brienzua nu ɔ.9Yeɛ nná brasua ti yeɛ bɛbɔle brienzua ɔ, mmom brienzua ti yeɛ bɛbɔle brasua ɔ.10Ɛhe ne abɔfo nemɔ ti yeɛ odikyɛ brasua nya nikye bie wɔ yeti so bɔ okyire kyɛ ɔbrɛ ye nwo ase wura tumi ne bo.11Awurade nyunu de, brienzua ngɔ nyakyi brasua, yeɛ brasua koso ngɔ nyakyi brienzua,12na kyɛbɔ brasua fi brienzua nu ne, sɔ ala yeɛ brasua wo brienzua ɔ. Na nikye biala fi Nyameɛ berɛ.13Ɛmɔ bɔbɔ ɛmɔbu ye nwo atɛn: Ɛmɔnea a, ɔte pa kyɛ brasua kɔbɔ Nyameɛ mbaeɛ bɔ ɔngɔ kata ye ti so ɔ?14Sɛ ɛmɔnea kyɛbɔ bɛbɔle nningyein ne a, sɛ brienzua yakyi ye ti nwiaa gua ye nwo kusuu a, ɛmɔnnwu ye kyɛ ɔte animguaseɛ ne?15Nakoso brasua de, sɛ ye ti nwiaa gua ye nwo a, ɛmɔnnwu ye kyɛ ɔhyɛ ye anuonyam ne? Ofikyɛ bafa nwiaa ne bama ye kyɛ ɔfa kata ye ti so.16Sɛ ebie nne sɔ dwirɛ hemɔ ndonu a, yɛlle nhyehyɛɛ foforɛ biala kõ, Nyameɛ asafo nemɔ koso, bɛlle kõ.17Edwirɛ he bɔ meka ne de, mengɔkamvo ɛmɔ, ofikyɛ sɛ ɛmɔyia nu a, ɛmɔnyɛ nikye pa, bɔ ɔttemaye yeɛ ɛmɔyɛ ɔ.18Bɔ oli moa ne, mate kyɛ sɛ ɛmɔyia nu kyɛ asafo a, ɛyɛ a né mbakye-mbakye-muɛ wɔ ɛmɔ nu, na atee bie so ne, medɛ́ medi.19Ofikyɛ, kyɛbɔ ɔte biala ne ngyekyɛmue kɔwa ɛmɔ nu, kyɛbɔ ɔkɔyɛ a, bekonwu bɛbɔ bɛfata ne.20Sɛ ɛmɔyia nu a, menne menni kyɛ Awurade Adidie yeɛ ɛmɔdi ɔ.21Ofikyɛ mmerɛ bɔ ɛmɔ baali ne, né ebiala ali moa ali ye nnɔsoa aleɛ deɛ. Yeti, ɛhɔen ku ebie ne, ne ebie koso abo.22Aso ɛmɔ nu biala lle awuro bɔ odidi nu na ɔno nu anaa? Anaa ɛmɔbu Nyameɛ asafo ne animtia, ná ɛmɔgua bɛbɔ bɛlle hwee ne nyunu ase hɔ? Nzu yeɛ nga ngyire ɛmɔ ɔ? Ngamvo ɛmɔ anaa? Ɛhe anwo de, mengɔkamvo ɛmɔ!23Bɔ nya mvili Awurade berɛ nala yeɛ me koso mva mmane ɛmɔ ne. Yeɛ ole kyɛ, kɔngɔen bɔ bɛbaaye Awurade Yesu bɛma ne, ɔfale paanoo24na ɔlale ase yiele ne, obubule nu, yeɛ ɔhane kyɛ, “Ɛhe gyi berɛ ma me nipadua bɔ bɛfa bɛma ɛmɔ ne, ɛmɔhɔ so bɛyɛ ɛhe bɛfa bɛkaye me.”25Sɔ ala yeɛ ɔyɛle kwangoa ne, mmerɛ bɔ bɛdidi bɛyiele ne, ɔfale kwangoa ne, na ɔhane kyɛ, “Sɔ kwangoa he gyi berɛ ma apam foforɛ bɔ bɛfa me mogya bɛyɛ ne. Mmerɛ biala bɔ ɛmɔ kɔno kwangoa he noa ne, ɛmɔyɛ bɛfa bɛkaye me.”26Na mmerɛ biala bɔ ɛmɔ koli paanoo he, na ɛmɔ kɔno kwangoa he noa ne, né ɛmɔka Awurade wue nanwo dwirɛ kodwu kyɛ ɔkɔwa ɔ.27Yeti sona biala bɔ okoli paanoo he, anaakyɛ ɔkɔno Awurade kwangoa ne noa wɔ atee bɔ ɔttemaye so ne, okoli Awurade nipadua ne ye mogya nanwo fɔ.28Yeti, maa sona ne limoa neɛnea ye nwo nu yé, na ɔnea sɛ ɔfata kora né wali paanoo ne bie, ná wano kwangoa ne noa.29Na ebiala bɔ odi na ɔno bɔ ɔnde Awurade nipadua nabo ne, odi no fa atemmuo ba ye bɔbɔ ye nwo so.30Ɛhene ati yeɛ ɛmɔ nu pee nala ayɛ mmerɛ na bafokyɛ ne, na ɛmɔ nu biemɔ ala wɔ ewue nu ne. 31Sɛ yɛneɛnea yɛ nwo nu yé a, bɛngɔbu yɛ atɛn.32Nakoso sɛ bɛbu yɛ atɛn a, Awurade yeɛ ɔtengyɛ yɛ so ɔ, kyɛbɔ ɔkɔyɛ a, bɛngɔbu yɛ fɔ bɛngɔ boka wiase naso ɔ.33Yeti nniema mɔ, sɛ ɛmɔyia nu kyɛ ɛmɔ baali a, ɛmɔ nwondɛ ɛmɔ nwo.34Sɛ ɛhɔen ku ebie a, ma odidi awuro, na sɛ ɛmɔ bayia nu a, ɛmɔ amva atemmuo bamma ɛmɔ nwo so. Nningyein bɔ waha ne de, sɛ meba a, ngoli ye mukoraati nwo dwumaa.
Lexihub