Galatiya3

1Nyee vanu va ku Galatiya wo muli vapufi, nani yo avahavye? Henye wo ndongwa tsa Yesu Chilisito kuvambwa mumusalaba tsawoniche bila wufiho halutalo henyu.2Ntsin'gana mundonjele lulongwa lumwe. Mbe, mwanuchilye Muhe va Mulungu kwasawuli ya kukwitsa ng'olwa tsa malajitso ga Musa, awu kwa kuhulika na kutsitumba Ndongwa Nofu ya Mulungu?3Mbe, henye muveye muli vapufi chinya ndawuli? Hamutalo henye mwantsitse wumi wenyu wupya kwa kutangwa na Muhe va Mulungu, lelo sambi mun'gana kusinda kwa ludali lwa mivili jenyu?4Mbe, ndongwa tsila tseka tsa ng'odeko ngomi tso tsavapasile henye tsiveye bule hela? Nachene siyo ihyo ndaya.5Mbe, mwene Mulungu yo avapelaga vanu Muhe vake na kudita mitinuso hagati henyu, kwasawuli munhulikitsa malajitso ga Musa, awu kwa kuhulika na kitumba chila cho mwahuliche?
6Mumwihukaje Ibulahimu hila fyo amutumbye Mulungu, na Mulungu akamudichilaje kwa kutumba kwake.7Duve lelo, mutselaje kuta vanu vanya litumbilo, nachene iwo wo vana va Ibulahimu.8Mandiko ga Mulungu mwanga gavaga gamuvikulye Ibulahimu Ndongwa Nofu luhuma katali kuta, “Kukolela kwa heve, Mulungu akuvadita vanu wosi Vayawudi vave vawuya halutalo ha Mulungu.”9Ihyo vala vanu veka wo vanya litumbilo vidichilwaga kwa Mulungu hamwe na Ibulahimu yo avaga na litumbilo.
10Vala veka wo vangihuvila kukuluswa kwa ndongwa tsa malajitso ga Musa iwo vakotulwe na Mulungu. Yandikwe mu Mandiko ga Mulungu, “Akotwiche chila munu yo sinambeatsikwitse ndongwa tseka tso tsandikwe mu chitabu cha Malajitso ga Musa.”11Duve wukweli wuli hino, kuduhu munu yoyuve yo afuluche adichilwe halutalo ha Mulungu kwa kugafwata malajitso ga Musa, kwasawuli yandikwe, “Munu muwuya akikala kwa litumbilo.”12Lechelelo malajitso ga Musa sigatsitse kwa litumbilo ndaya, kota hila Mandiko ga Mulungu fyo ganlonga, “Munu yo an'dita kota malajitso fyo gan'gana, akikala kwa kugahuvila Malajitso igo.”
13Chilisito atugombwe kuhuma mu ng'otolo ya malajitso ga Musa kwa kuyitegula ng'otolo iyo kwajili ya hetwe, kwakuva Mandiko ga Mulungu ganlonga, “Akotwiche munu yula yo anvambwa mu musalaba.”14Chilisito atugombwe ili ndongwa tsa wuwuya tso apasile Ibulahimu, vapataje na vanu va inyi tsinji kukolela Chilisito Yesu, ili kwa litumbilo twanuche Muhe vake yo avaga atulonje kuta akutupela.
15Nyee vang'olotsangu, ntsin'gana ntsivalonjele muhwano kuhuma mu ndongwa tso tun'dita chila chimunyi. Muhotsaje kuta vanu vavili vilajine, manyi vanu iwo vakuva vilajine duve kuduhuli munu yo afuluche abene awu kuwila chinu chochive mu lulongwa lula lo mwanga valajine.16Hohihyo na Mulungu nayo fyo avaga alajine na Ibulahimu na lulelo lwake. Mandiko ga Mulungu sinambegalonje, “Kwa chilelo chake” Kulajila kuta vanu wolofu, ila ganlonga “Kwa lulelo lwake” Chinya kutijila munu yumwe, nayo yo Chilisito.17Ntsin'gana kulonga kuta, Mulungu alongwe kudita nachene lilagano lyake na Ibulahimu, hambele myaka miya ine na salasini gakatsaje malajitso ga Musa. Ihyo malajitso igo sigafuluche gabene awu kubadila chila cho Mulungu avaga alajine na Ibulahimu.18Manyi chifunje cha Mulungu chihuvilaga malajitso ga Musa, duve sichifuluche chihuvile lilagano. Lechelelo Mulungu kwa wuwuya wake amupelye Ibulahimu chila chifunje kukolela chila cho avaga alajine nayo.
19Lelo kwasawuli yachi kuveye na malajitso? Malajitso gawilitwe iho kwasawuli ya kulajila kuta ndongwa ntsibi cho chinu chachi, mbaka ho alava kutsa yula va lulelo lwa Ibulahimu yo atambulwe kuta yo muhali va chila cho alontsile Mulungu. Mulungu akamupelaje malajitso igo mutantsi vake va kilanga, nayo akamupelaje Musa, na Musa akavapelaje vanu.20Ihyo mupatanisi si aganikaga manyi lulongwa lwene lwa kupatanisa luveye lwa lubali lumwe, na Mulungu nayo yo yumwe yo avisile lilagano na Ibulahimu bila kumutuma yunji yoyuve.
21Mbe, malajitso gasumwanaga na lila lilagano lya Mulungu? Ndaya! Kwasawuli manyi yika yive malajitso gafuluche gavapele vanu wumi, ihyo tuka kudichilwa na Mulungu kukolela kwa malajitso igo.22Lechelelo Mandiko ga Mulungu mwanga galontsile, vanu veka va inyi vali mu wimilitsi wa ndongwa ntsibi, ihyo lelo vala veka wo vangumutumba Yesu Chilisito, vakwanuchila chila cho avaga alontsile Mulungu.
23Hala hotwavaga tung'ali kumutumbila Chilisito, malajitso gavaga gatudisile tuve kota vapogotsi, twatsindaga litumbilo ilyo ligubulwe.24Ihyo malajitso ga Musa gatulongwitse mbaka hala hoatsitse Chilisito, ili tudichilwe halutalo ha Mulungu kukolela litumbilo.25Lechelelo kwakuva lila litumbilo mwanga litsitse, ihyo lelo hetwe sambi situli mu wimilitsi wa malajitso.
26Ihyo lelo henye nyeka muveye vana va Mulungu kwa litumbilo, kwa kihantsa na Chilisito Yesu.27Henye nyeka yo mubatitswe mwihantsise na Chilisito, na munkuva mwihwanile na Chilisito.28Ihyo haduhu wubagulo wowuve kwa Muyawudi na wosi Vayawudi, awu kwa mupogotsi na munu yo simupogotsi, na kwa mulume awu mudala. Henye nyeka munkuva chinu chimwe kwa kula kihantsa na Chilisito Yesu.29Henye muli vanu va Chilisito, duve henye munkuva lulelo lwa Ibulahimu, mukwanuchila chila cho avalonje Mulungu kuta akuvapela.

The Word for the World International

https://app.library.bible/content/b36e557361a3f422