VAEFWESO2
1Iho hamutalo henye mwavaga kota mufweye kwasawuli simwamuhulikitsaga Mulungu na mwaditaga ndongwa tsenyu ntsibi halutalo hake.2Luvala lula mwikalaga na mwatsifwatitsaga ndongwa tsa ntsovelo tsa muinyi yino, na tsa yula yo muvina wa wuvetso wa hilanga, muhe yula yo anguvatavala vanu vala wo sinambevamuhulikitse Mulungu.3Nambe na hetwe tweka iho hamutalo twavaga kota vawo, na twikalaga kwa kutsifwatitsa ndongwa tsa muinyi na kudita hila fyo jin'gana mivili jetu. Hetwe natwe Mulungu aganikaga atutove kota munu yoyuve hela.4Lechelelo Mulungu kwa wugano wake wukomi wo siwupimikaga,5nambe hala ho twavaga vanu wo tufweye kwasawuli ya kuleka kumuhulikitsa Mulungu, mwene atudisile tuve wumi hamwe na Chilisito. Ino lelo mukuluswe kwa wuwuya wa Mulungu hela.6Kwa kihantsa na Chilisito Yesu, Mulungu atutsilipwe hamwe nayo, ili tukikale hamwe nayo uko Kilanga.7Mulungu aludisile lulongwa ulo ili kuvalajila vanu va siku tsino tsa wudugo wuwuya wake wukomi lo atuditye hetwe kwa kumutumbila Chilisito Yesu.8Kwakuva mukuluswe kwa wuwuya wa Mulungu hela kwa kumutumbila Chilisito, siyo kwa kikangatsa henye kwasawuli icho cho chifunje luhuma kwa Mulungu.9Munu alekaje kidutsa kuta aveye ihyo kwa kikangatsa mwene hela.10Hetwe twawumbitwe na Mulungu, na atudisile tumutumbe mugati mwa Chilisito Yesu, ili tudite ndongwa tsa wuwuya tso alongwe kutuvichila chang'ani luhuma hamutalo.11Mwiwukaje kuta henye iho hamutalo henye vanu wosi Vayawudi, iwo Vayawudi vavachemaga henye, “Vanu wo sivinje likumbi,” kuno vene vichemaga kuta, “Vanu wo vinje likumbi!” Vichemaga ihyo kwasawuli ya hila fyo viditye mu mivili jawo.12Luvala lula mwavaga kutali na Chilisito, kaha mwavaga kutali na vana va Isilaheli. Kwa wujentsi uwo wo mwavaga nawo wavadisile muve kutali na lilagano lya Mulungu, na ihyo mwavaga mulihela lihuvilo na mwavaga mulihela Mulungu umu muinyi.13Lechelelo henye wo mwavaga kutali na Mulungu, kwa kihantsa na Chilisito Yesu, sambi munkuva mulibulitswe kwa chifo chake.14Mwene Chilisito yo atuletye wusichimafu kwa kuvadita Vayawudi na vanu wosi Vayawudi tuve wovamwe. Kwa hila fyo agutawe muvili gwake, ahetsitse wutelani wo watulekanitsaga kota lukantsi.15Chilisito yo agavisile kulubali Malajitso geka ga Vayawudi na amuli tseka, ili kwa fikundi ifyo fivili ipatile likundi lipya lyo liwunganise na mwene, na kwa kudita ihyo awulete wusichimafu.16Kukolela kwa chifo chake hala ha musalaba, Chilisito ahetsitse wula wutelani wa fikundi ifyo fivili, na kwa musalaba gwake akafihantsaje five chinu chimwe na kuchipatanisa na Mulungu.17Ino lelo Chilisito atsitse kuvikula wusichimafu wo Ndongwa Nofu kwa vanu veka, kwa vala wosi Vayawudi wo vavaga kutali na Mulungu na kwa Vayawudi wo vavaga habehi na Mulungu.18Ihyo kukolela kwa Chilisito, Vayawudi na vala wosi Vayawudi tufuluche tumuhejelele Dada kwa Muhe va Mulungu.19Duve ihyo henye wosi Vayawudi, siyo vajentsi na simuli kutali kaha. Henye sambi muveye vanyakaye na kaha muveye vayawo na vanu vahagulwa va Mulungu.20Henye munakota nyumba ya Mulungu yo yitsentsilwe mwilanga mwa musinji gwa vatumi na valoli va Mulungu, na mwene Yesu Chilisito anakota liganga likomi lyo linyamana lya kutsenjela lya kulubali.21Mwene Chilisito yo munya kuyiwunganisa ili yive ngomi na kuva kota Nyumba nyagulwa ya Mutwa.22Kwa kula kihantsa na Chilisito vanu wosi Vayawudi munkuva mutsentsilwe hohamwe mu nyumba iyo, ili muve hono ha kikala Mulungu kwa kukolela kwa Muhe vake.
The Word for the World International