2 VAKOLINDO2

1Ihyo tsalamwe mu numbula yangu kuta singuwila kudita lujendo lunji lo lukuvadita henye mususuvale.2Ino lelo manyi ntsivasusutatse henye, nani yo akumela wuhechelelo? Si mukuva henye wo ntsivasusutise!3Ihyo ntsavandichilye baluva kota hila, ili manyi ntsitse kwenyu ndeche kususutatswa na vanu yo van'ganika vamele wuhechelelo. Ntsingihuvila nachene kuta manyi heni nyechelele, na henye nyeka munhechelela hamwe na heni.4Hala ho ntsavandichilaga ntsavaga mu ng'odeko ngomi na ng'ung'uto mu numbula na kuvemba ndalahela. Sintavandiche ili kugana mususutale, ila tsaganaga muwutsele wugano wo ntsinguvagana fyowuli wukomi.
5Lechelelo manyi kuna munu amutifitse muyage, akuva sianifitse heni ng'ani, ila akuva avatifitse na henye nyeka, heni sintsin'gana ng'alipe kulutila fyo ntsin'ganika kukalipa.6Ng'odeko yo akuva apasile kuhuma kwa vanu wolofu yikuva yimukwilye.7Lelo chiba mumuhulumile na kumuhongetsa munu uyo, ili aleche kususutala ndalahela na kugotsola nachene.8Ihyo ntsinguvagongola mumulajile kaha kuta mungumugana.9Ntsavandichilye baluva yinya hila ili kutsela kuta mufuluche mudichile chila chinu cho ntsinlajitsa.10Manyi henye mumuhulumile munu yoyuve, na heni ngumuhulumila. Kaha manyi ntsimuhulumile munu lulongwa loluve, duve nguva ntsimuhulumye kukolela kwa Chilisito kwasawuli ya henye nyeka,11ili Lihoka lileche kutusuma. Kwasawuli tujitsele mipanjo mibi ja Lihoka.
12Hotsavaga kufika ku Tulova kutsivikula Ndongwa Nofu tsa Chilisito, ntsafisile Mutwa mwanga ambichye chang'ani chila chinu ili ntsiyidite katsi yake.13Lechelelo sintsavaga na wusichimafu, kwasawuli sitsamufisile uko mung'olotsangu Tito. Ihyo ngalaganaje nawo na kuwuka kubita ku Machedoniya.
14Lechelelo alumbwaje Mulungu yo atulongwitse bila kutuleka, atulongwitse mu lujendo lwa wusumi kwa kwihantsa na Chilisito. Mwene yo atuditaga tuwutagalitse chila hono wukweli wa Chilisito kota wununyililo wunofu.15Hetwe tunakota wununyililo wunofu wo Chilisito amutawulye Mulungu, wununyililo wunofu wo wuntagalila hagati ha vanu wo vankuluswa na wo sinambevamutumbe Chilisito.16Kwa vanu vala wo sinambevamutumbe Chilisito, hetwe tunkuva kota wununyililo wa chifo, lechelelo kwa vanu vala wo vankuluswa, hetwe tunkuva kota wununyililo wunofu wa wumi. Nani yo afuluche ihantse mu ndongwa kota itso?17Hetwe siyo kota vanu vanji wo vangutsivikula Ndongwa tsa Mulungu ili vapate magobole. Badili yake hetwe tungutsivikula kwa wugolofu kota vanu wo tutumilwe kuhuma kwa Mulungu, vanu yo twihantsitse kwa Chilisito.

The Word for the World International

https://app.library.bible/content/b36e557361a3f422