2 VAKOLINDO10
1Heni Pawulo ntsinguvagongola kwa wudeche na wuwuya wake Chilisito, heni yo mbaga munu va kwika hala ho ntsinkuva hamwe na henye, lechelelo ng'alipaga hala ho ntsinkuva kutali na henye!2Ntsinguvagongola muleche kundita ntsive mukali iho ho nguvakutsa, kwasawuli ntsinhotsa kuta fuluche ntsive mukali kwa vanu veka wo vanhotsa kuta tungikala kota vanu vanji va muinyi fyo vikalaga.3Nayivaje kuta tungikala muinyi, lechelelo sinambe twitove ligalu kota fyo vitovaga vanu va muinyi,4kwasawuli fitovelo fyetu siyo tsa chiwunu, ila fina wuvetso wa Mulungu nambe kugwisa ng'antsi ngatsi tseka na kwananga mahotso geka ga wudesi,5na kugwisa mahotso mabi na chila chinu cho chinkwinuka tebe na ntselo tsa Mulungu, na kugakwegwesa mahotso gawo mabi na kuvadahitsa vamuhulikitse Chilisito.6Tukumuhiga chila munu mudadambafu hagati henyu, hala ho mukuva chang'ani kumuhulikitsa Chilisito kwa chila chinu.7Henye mutsilave ndongwa tsotsili mwivala hela. Manyi kuve na munu yoyuve yo angitumba kuta mwene munu va Chilisito, uyo an'ganika kwiwuka kuta na hetwe tunakota mwene.8Nayive mufuluche kumbona kuta ndutilitse kidutsa kwa wuvina wo amelye Mutwa, nayo atupelye wuvetso ili tuvakangatse na siyo tuvatetse, na ihyo lelo heni sinambembone nyoni kwa hila fyontsin'dita.9Ntsin'gana muleche kuhotsa kuta ntsin'jela kuvakabusa kwa baluva tsangu.10Munu afuluche alonje kuta, “Baluva tsa Pawulo ng'ali na nalamu, lechelelo mwene ho ankuva hamwe na hetwe ankuva alichaka hela, nambe na ndongwa tsake tsinkuva mefu hela.”11Munu kota uyo atselaje kuta ndongwa tso tunkwandika mu baluva, yo tsotsitso tso tunkuva natso hala hotunkuva hamwe na henye.12Yive fyoyili, hetwe situfuluche tuve likuga limwe awu kihwananitsa na vanu vala yo vangidutsa vene. Vanu wo vangidita kuta vene wo chipimilo na wo vangihwananitsa vene kwa vene, na kwakudita ihyo vangilajila kuta van'dita ndongwa tsa chipufi.13Lechelelo hetwe situfuluche twitsumile kulutila hila fyo yin'ganika, ino lelo tukitsumila kota fyo atugavye mwene Mulungu na katsi yo tunguyikola nambe kwa henye.14Sitwatsufile mbaka tsa kitsumila hala ho twatsaga kwa henye, kwasawuli hetwe wo twalongwe kutsa kwenyu kuvaletela Ndongwa Nofu ya Chilisito.15Ino lelo sinambetwitsumile kwa katsi tso vadisile vanu vanji, ila tungihuvila kuta litumbilo lyenyu linkwendelela kukalagala, nayo katsi ya hetwe kwa henye yikwendelela kugatsuka kwa kudita kota fyo an'gana Mulungu.16Ihyo ho tukuvetsa kuvikula Ndongwa Nofu ku inyi tsinji tsa kutali na henye ko kuduhu munu yo ankola katsi uko. Kwasawuli tulema kitsumila kwajili ya katsi yo yidisilwe chang'ani na munu yunji.17Lechelelo kota fyo galongaga Mandiko ga Mulungu, “Mwene yo angitsumila, itsumilaje kwa katsi tso adisile Mutwa.” 18Munu yula yo idichilwaga na Mutwa, avaga siyo yo angitsumila mwene, ila yula yo an'tsumilwa na Mutwa.
The Word for the World International