Read Luka 1

Luka1sbe_wbt

¹Taubada Teopilo! Tamowai gwaudi se kaipate bena ginauli Yaubada ye ginaulidi luwadaena wa se kulidobiyeidi.²Saha se kuli wa meta iya ede huya bagubagunana unai ginauli maudoidi taukitadi wa se wasaduwaiyei na se hekawa ye dobima kalidaena.³Na yau ginauli maudoidi ta ya kitahekasadiko, kabahetubu unai ye lau gehena. Unai ya nuwatui ye namwa mo taba yau hinage wasa ta ya kulihekasa kowa yom, taubada saesaekalilina,⁴to bena kabina ku kata ginauli saha se hekatago wa meta se mamohoikalili.

Yowane Babatiso yona labasi hededenonohaina

⁵Heloda yona huyawasawasa Yudeya tanona unai meta taukaitalasam hesau hesana Sakaliya. Iya meta taukaitalasam kadi boda gagilina hesana Abidiyatamowaina hesau. Sakaliya ma mwanena Elisabeta kadi mumuga ede Aloni.⁶Taudi labui wa yodi miyamiya se dudulai Yaubada matanaena, yo Guiyau yona laugagayo yo kabikabi maudoidi se miyawataninamwanamwaedi.⁷Na nige natudi, matawuwuna Elisabeta ye kobosi yo ye sinesinebadako, yo hinage Sakaliya ye tautaubadako.⁸Huya hesau Sakaliya kana boda yodi huyapaisowa Numa Tabuna unai, na iya kaitalasam paisowana ye ginauli Yaubada matanaena.⁹Taukaitalasam wa kadi kulutubu kabikabina unai yodi kaisunuwa se ginaginauli,ede Sakaliya ye hai bena kabo ye lusae Guiyau yona Numa Tabuna kalona ne unai na inisenisi ye gabu.¹⁰Na inisenisi huyagabuna unai bodalakilaki Numa Tabuna bakubakuna wa unai se tapwatapwalolo.¹¹Na Guiyau yona anelu ye taumasalaha iya unai, na inisenisi kabagabuna tehakahatuna unai ye totolo.¹²Huyana Sakaliya anelu wa ye kita meta ye siliyata yo ye matausikalili.¹³Na anelu wa ye hededelau unai ye wane, “Sakaliya, tabu ku matausi! Yaubada yom tapwalolo ye lapuidiko. Unai mwanem Elisabeta kabo natumiu loheya ye labasi, na kabo hesana ku tole Yowane.¹⁴Iya kabo nuwam ye henamwakaliliyei, na yona huyalabasi ne debanaena kabo tamowai gwaudi se gwauyala,¹⁵matawuwuna iya meta ye saekalili Guiyau matanaena. Iya nige gonowana waina yo numanuma bayabayaodi ye numadi. Sola nige se labasi na Yaluwa Tabuna iya ye hemwayau.¹⁶Na Isalaela tamowaidi bodalakilaki kabo ye woyaidi se uyoma Guiyau yodi Yaubada unai.¹⁷Na Yaubada yaluwana yo yona gigibwali kabo Yowane unai gonogonowana doha Eliya, na unai kabo Guiyau yona keda ye bagunaei. Yona paisowa meta kabo tamadiyao ye henuwabuidi na se kitalau natudiyao udiyedi, yo kaiteyadi Yaubada taukawayagalaena kabo ye henuwatulobaidi na se lapulau tamowai dudulaidi yodi nuwatu sibasibadi udiyedi. Teina laulau ta ye ginaulidi bena tamowai gwaudi ye nonohaidi Guiyau yona laoma hesabana.”¹⁸Sakaliya ye hededelau anelu wa unai ye wane, “Idohagi na kabo kabina ya kata meta teina ta mamohoi? Yau meta ya tautaubadako, yo mwanegu meta ye sinesinebadako.”¹⁹Anelu wa ye hededebui ye wane, “Yau Gabileli, Yaubada matanaena ya totolo, na ye hetamaligau ya laoma bena wasa namwanamwana ta yom ya hedehedede.²⁰Na kowa meta kalinagu nige ku kawamamohoiyeidi, unai kabo ku mwanou na nige gonowana ku hedehedede, kana siga yogu hedehedede ta se laoma se mamohoi yodi huya dudulaina unai.”²¹Mahanana ne unai boda wa Sakaliya se nayanayai yo se nuwapwanopwano idohagi to ye miya huyalohaloha Numa Tabuna wa unai.²²Yona huyapesa ne unai meta nige gonowana ye hedehededelau udiyedi. Se nuwatulobai meta Yaubada tautau hesau ye hekitayako Numa Tabuna kalona ne unai. Hekihekinoi nimana udiyedi ye ginaulidi, na nige saha hesau ye hedede.²³Sakaliya yona paisowa mayadaidi wa se gehe ede ye uyo yona magai.²⁴Mulina ne unai kabo Elisabeta ye diyaka, na yona numa kalona ne unai ye miya nawalai haligigi,²⁵na ye wane, “Teina ta Guiyau ye ginauli kaliguyena! Teina huya ta unai yona kabinamwa unai ye kitagau na kagu mwadinetamowai matadiyena ne ye haigabaei.”

Yesu yona labasi hededenonohaina

²⁶Elisabeta yona diyaka nawalaina haligigi-kesega (6), kabo Yaubada yona anelu hesana Gabileli wa ye hetamali ye lau teha Galili magaina hesau, hesana ede Nasaleta.²⁷Temenai hasala hesau nuwanuwasupuna. Iya se hededehepatuyako bena kabo tamowai hesau hesana Yosepa ye tawasolai, iya Dawida kana isimulita hesau. Hasala nuwanuwasupuna wa hesana ede Maliya.²⁸Anelu wa ye lau iya unai ye wane, “Yauwedo! Guiyau ede maiyam yo yona kabinamwa ye lakikalili kalimwai.”²⁹Maliya nuwana ye dagugukalili yona hedehedede wa unai, yo ye nuwanuwatu lautoki ta kaniyona ede saha.³⁰Na anelu wa ye hededelau unai ye wane, “Maliya, tabu ku matausi! Yaubada yona kabinamwa unai ye kaisunuwaigo.³¹Kabo ku diyaka na natum loheya ku labasi, na hesana ku tole Yesu.³²Iya kabo ye saekalili yo se katai Yaubada Saesaekalilina Natuna. Na Guiyau Yaubada kabo iya kana kulutubu Dawida yona kabatuli saesaena ye mosei,³³na kabo Yakobo kana isimulitao ye kitahetetedi ye lau ee nige kana siga, yo yona basileiya nige yona kabagehe.”³⁴Maliya ye henamai anelu wa unai ye wane, “Teina ta kabo idohagi? Yau meta waihiu nuwanuwasupuna, sola nige loheya hesau maiyagu ka hailobai.”³⁵Na anelu wa ye wane, “Yaluwa Tabuna kabo ye laowa kalimyena, yo Yaubada Saesaekalilina yona gigibwali kabo ye helogulogugo. Unai wawaya ku labasi ne meta iya Tabuna, yo iya kabo se katai Yaubada Natuna.³⁶Keham Elisabeta ku kita! Iya ye sinesinebadako na iyamo ye diyaka na kabo natuna loheya ye labasi. Tamowai se hedede meta iya bena ye kobosi, na iyamo ye diyaka yona nawalai haligigi-kesega.³⁷Matawuwuna nige saha hesau ye bayao Yaubada kalinawai.”³⁸Kabo Maliya ye wane, “Yau Guiyau yona heyayai tauhaina. Saha ku hedede me bena ye tubu kaliguyena.” Na kabo anelu wa ye laugabaei.

Maliya Elisabeta ye kaitaumanai

³⁹Nige bayaona na Maliya ye kabinonoha na ye laumwamwayau ye lau teha Yudeya magaina hesau unai, iya ede teha kudukudulina unai.⁴⁰Temenai ye mwalae Sakaliya yona numa unai na Elisabeta ye hailobai.⁴¹Huyana Elisabeta Maliya yona lautoki ye lapui meta wawaya wa bogana luwanaena ye teteli. Yaluwa Tabuna Elisabeta ye hemwayau,⁴²na ma kalina lakilakina unai ye wane, “Sinesineo maudoidi luwadiyena kowa meta Yaubada ye hededehenamwakaliliyeigo, yo natum bogam luwanaena ne Yaubada ye hededehenamwa!⁴³Na yau yogu namwa saha, na yogu Guiyau sinana ye laoma ye kaitaumanaigau!⁴⁴Huyana yom lautoki wa ya lapui ede wawaya bogagu luwana unai ye teteli ma gwauyalana.⁴⁵Kowa gonowana ku gwauyala, matawuwuna ku kawamamohoi meta Yaubada yona hedehedede kalimyena wa kabo ye hemamohoiyeidi.”

Maliya yona wanahedebasae

⁴⁶Na Maliya ye wane,“Nuwagu ta unai Guiyau ya hedebasaei⁴⁷na yaluwagu ta ye gwauyala Yaubada taugilihaigau debanaena,⁴⁸matawuwuna Yaubada iya yona heyayai tauhaina ta ye kita meta ya dobikalili.Huya ta yo huya matada ne unai tamowai maudoidi kabo se hedede meta yau gonowana ya gwauyala,⁴⁹matawuwuna Yaubada Gigigigibwalina ginauli saesaedi ye ginaulidi yau kaliguyena.Iya tabuna.⁵⁰Isina to isina udiyedi yona katekamkamna ye hemasalaha tauhekasisiyeina udiyedi.⁵¹Iya yona gigibwaliyena ginauli saesaedi ye ginaulidi,na kaiteyadi se nuwasaesae meta ye hetatagwaligwalidi.⁵²Wasawasa saesaedi yodi kabatuli udiyedi ye toledobiyeidi,na tamowai dobidobidi ye lausinidi.⁵³Tauhasahasali nimadi ye hemwayaudi ginauli namwanamwadi udiyedi,na taugogogogo ye hetamalidi se dalahai ma nimagaibudi.⁵⁴Yona heyayai tauhaidi, siya ede Isalaela tamowaidi, ye saguidi,na yona hededehesunuma kada kulutubu kalidiyena ye nuwatui metayona katekamkamna kabo ye hemasalaha kada mumuga Abelahamayo kana isimulita maudoidi udiyedi ye lau ee nige kana siga.”⁵⁶Maliya Elisabeta maiyana se bawa nawalai haiyona, na kabo ye uyo yona magai.

Yowane Babatiso yona huyalabasi

⁵⁷Na Elisabeta yona huyalabalaba mayadaina ye lage, ede natuna loheya ye labasi.⁵⁸Dedekadiyena taumiya yo kehanao se lapui meta Guiyau yona katekamkamna lakilakina unai Elisabeta ye sagui, na maiyadi se gwauyalakalili.⁵⁹Wawaya wa ye labasi sabati kesega ye lau kabo se laoma bena se hepelitome. Na se henuwa bena hesana se tole Sakaliya, tamana yona heliyam.⁶⁰Na sinana ye wane, “Nige! Hesana ede Yowane.”⁶¹Se hededelau Elisabeta unai se wane, “Kehamwao udiyedi nige hesau hesana Yowane!”⁶²Ede hekihekinoi se ginaulidi tamana wa unai na se henamaiyei kabo wawaya ne hesana saha ye henuwa bena ye tole.⁶³Sakaliya ye kaibwada bena kabakulikuli se mosei na ye kuli, “Hesana ede Yowane.” Na maudoidi wa se siliyata.⁶⁴Mahanana ne unai Yaubada Sakaliya kawana ye soke na ye hedehededeꞌuyo, na Yaubada ye hedehedebasaei.⁶⁵Na dedekadiyena taumiya maudoidi se siliyatakalili, na Yudeya teha kudukudulina maudoina unai taumiya ginauli maudoidi ta se hetahetaladi.⁶⁶Wasa wa taulapuina maudoidi nuwadi udiyedi se nuwanuwatuidi na se henahenamaiꞌuyoidi se wane, “Wawaya ne ye tubusae kabo iya tamowai sahasahana?” Matawuwuna se kita meta Yaubada yona gigibwali ede iya unai.

Sakaliya yona hededepeloweta

⁶⁷Yowane tamana Sakaliya Yaluwa Tabuna ye hemwayau na ye hededepeloweta, ye wane,⁶⁸“Guiyau ta hedebasaei, iya Isalaela yoda Yaubada!Matawuwuna ede ye laoma yona tamowai ye gilihaida.⁶⁹Taugilihaida gigigigibwalina ye haiyama, iya ede yona heyayai tauhaina Dawida kana isimulita hesau.⁷⁰Teina ta ye hededehemasalahayako yona peloweta tabudiyao udiyedi huya bagubagunana unai na se hededepelowetaiyako.⁷¹Kabo ye gilihaida kada waiunu udiyedi,yo tauhewaiunu maudoidi nimadiyena ye saguhaida.⁷²Laulau ta ye ginaulidi meta yona katekamkamna ye hemasalaha kada mumuga udiyediyo yona talam tabuna ye nuwatui,⁷³iya ede yona kaigwala kada mumuga Abelahama unai.⁷⁴Ye kaigwala kabo kada waiunu nimadiyena ye gilihaida,yo ye hebayaoda bena ma nuwaꞌaꞌada yo miyamiya dudulaidi udiyedi iya ta tabaꞌohui yoda mauli mayadaidi maudoidi udiyedi, na nige gonowana ta matausi.

⁷⁶Na kowa, natugu, kabo se kataigo Yaubada Saesaekalilina yona peloweta,matawuwuna kabo Guiyau ku kedabagunaeibena yona kamwasa ku kabinonohai,⁷⁷yo yona tamowai ku hekatadi meta Yaubada yona kabagilihaidi kedana ede yodi yababa nuwatugabaedi unai.⁷⁸Yona katekamkamna nuwabigabigana debanawai Yaubada kabo ye saguidana Mesaiya galewa ne unai ye hetamaliyama kalidawaidoha malatomtom unai mahana ye dalasae,⁷⁹na mala ye hesina kaiteyadi masigili unai taumiya yo boita taumatausiyeina kalidiyena,na ye woyaida nuwadaumwali unai.”⁸⁰Wawaya wa ye tubusae yo yaluwa unai ye bayao, na balabalagaibuyena ye miya kana siga ye taumasalaha Isalaela udiyedi ye lauguguya.