Jona1

1Dal na Warsangul bamanê Jona anbe wanju Amitae epea,2“O temra aê ebalon lierelêp atlap, Niniba, aê eba duhri banê antôn êr na ôt re aê ewar pwiris banê êr, olin nar sekan êr an taaknoknon ne êr mi betlap goro mtak.”
3Ape Jona mamra aê engamo pii mtatnê Warsangul aê epe i met'pet las ba Tarsis. I mamlel ba Jopa aê eba jikrênê bulbul su an metea Tarsis aê egle nan sal aê eba ran bulbul aê epii jingi Warsangul me êr ba Tarsis.
4Aê Warsangul mwalngi lang teprô su baran tas aê i mwamwê ne tas sanga, aê mamsurnê ane bulbul tenggos.5Antôn êr na ômwan na bulbul mamta aê gasu m'po ka olin tobodboan banê nan bwatkôlkôl. Aê êr sabrênê soksok êr an ket ran bulbul balon tas, olin ane bulbul taet'maa.
Ape Jona ngamo mlel balon lo bulbul aê eba pwat aê emjur.
6Antôn an mwalêlê bulbul ba bwêlên aê eba pe banê i epea, “?O mamjur olin sa? O temra aê eka banê nam bwatkôlkôl! Tagasê nam bwatkôlkôl tenga dmê kêt, aê kêt taet'matmat.”
7Aê antôn êr na bulbul sahra re êr epea, “Gimi t'ma aê kêt met'sasanê sê kêt aê ejikrênê i an mwamwê ne tan sanga elo m'bamanê kêt.” Aê êr sasanê sêr aê i môt bara Jona.8Aê êr mwausiusi banê i epea, “O t'pe banê gema, epe sê en mwamwê ne tan sanga lo m'bama ra kêt. ?Nam ômwan be sa? ?Aê o mwamra ran ere anbê? ?Aê nam tan enbe ôt bê? ?Aê o mamra re or antôn êr anbê?”
9Aê i m'pe banê êr epea, “Nê m'be ta Hibru su, aê nê mamêmênê Warsangul Bwatkôlkôl na lo tôngtông an môômnê tas aê ra tanôt.”
10Aê antôn êr anre mamta balêp aê eusiusi banê i epea, “?O môômnê sa?” Olin ane antôn êr anre mwakêlê epe i m'roo mtatnê Warsangul olin ane i m'paetnê banê êr tê.
11Êr pe banê i epea, “?Gema met'ômnê sa banê êk ne tas met'pwat milumlum? Olin ane tas aê i mwapwripwris nga ba.”
12Aê i m'pe banê êr epea, “Gimi tedbe nê aê epwasnê nê balon tas, aê tas met'pwat milumlum. Olin ane nê mwakêlê epe nê en mwamwê ne lang teprô anlo m'bama ra gimi ela.”
13Aê re ngane antôn êr anre ngamo pelôs môl banê sêôt, ape êr taangrê, olin ane tas aê i mwapwiris balêp.14Aê êr ka banê Warsangul aê epea, “Warsangul, o ngalomwê ne gema tematmat olin miran na antôn anla. Aê o ngalolê gema epe gema m'basel olin matan na antôn an taaômnê tatesu an sanga elo. Olin ane êk Warsangul aê o môômnê papanê ane lom m'be.”15Aê êr mwadbe Jona aê epwasnê i balon tas, aê tas pwat bôôbôr.16Aê antôn êr anre mamtatnê Warsangul aê esunê nar pilan an pangsê banê i. Aê êr môômnê jingjingan su banê Warsangul epe êr met'sodutôn.
17Ape Warsangul mwahrô mahlo sure atlap aê i m'ba aê eba golmi Jona, aê Jona m'ba sek lon tebwa mahlo nê ran ngaran nga betêl aê ran lopwas betêl.

Pioneer Bible Translators

https://app.library.bible/content/0f63f6f842ebe8e7