Teeɓ ki16sav_wbt
Ayrukiŋ Kooh
1Ŋ kerhissa hooso meeɓuuɗ puloh Ɗiska Hoolohngaana, wa woyeeɗa malaakaaca yasna-kanak ca ne : « Kaɗaat ɗu yiifa ŋ kehƴi kaas ci yasna-kanak ciŋ ayrukiŋ Kooh. »2Weɗ malaakaani koc kaɗoh, a yiiffa kaasiŋ ɗe ŋ kehƴi, ɓi puus miskiɗ nikka ŋ faan caŋ ɓooɓa raakee mandargaanaŋ ɗoopta, ɓa ñaamkee nataalaŋ ɗe.3Malaakaani kanakɗoh yiiffa kaasiŋ ɗe ŋ cookmi, masmiŋ cookmi nikka ñif, findi ñif ɓo' kaaniɗ ; pesoh ciŋ cookmi jen kaannda.4Malaakaani kaahayɗoh yiiffa kaasiŋ ɗe ŋ kal ci na cul ciŋ masuɓ ci, ca nikka ñif.5Ŋ ineem, ŋ kerahha malaakaani ɓayoh masmi woyiɗ ne :« Fu yurhiɗ,fu yi nik, te yaf nike,fu hooliɗ ;findi fu atte'oh,wa ɗaa.6Laam ɓeɗ aamñif miŋ ɓo'-Kooh cina woosuuɗ cite fu eɗ ɓa ñifne ɓa an ;ɓa yeyyoo ineem. »7Ƴutta ŋ kerahha seeƴkohaana woyiɗ ne :« Ee di', Heɗ ɓoo,Kooh Heɗ-hatil,atteeniŋ ɗa keehte wa yurhiɗ. »8Malaakaani nikiisɗoh yiiffa kaasiŋ ɗe ŋ nohi, nohi onuusa ne wa raaɓee ɓooɓa na yongkaahiŋ wa.9Dohiɗ miskiɗ raaɓpa ɓooɓa. Ɓa ɓaseeɗa Kooh yi amboh naamooceem. Ɓa sannga ɓoƴsoh tumohaaɗ, ɓa yakiɗɗi tiikiŋ Kooh.10Malaakaani yatuusɗoh yiiffa kaasiŋ ɗe ŋ ɓoofoha-buur, waŋ ɗoopta, kur ka a nikohee buur ñuussa. Ɓooɓa ɗoɓeeɗa peɗeem ciŋ ɓa sagu miskiɗa.11Ɓa ɓaseeɗa Koohiŋ Eel ci sagu miskiɗ ca rahsee ɓa na puus ca. Ɓa ɓoƴsohɗi tumohaaɗ.12Malaakaani yasna-yino'ɗoh yiiffa kaasiŋ ɗe ŋ kala yakka, Ewfaraat ; masma ŋiissa ne wa faɗiɗ buur ci joy puloh pulohaaɗ-noh waas.13Ŋ hotta jiini kaahay ye hoolaaɗi'an, puleeɗa ŋ nguɓaŋ iiñ-safaala na waŋ ɗoopta na waŋ woosuuɗa leye. Ca mandee na mboɓ.14Ca jiini-safaal, ca na haɓɗe in feyohiɗ, ca kaɗee ŋ buur ciŋ Adina jen ne ca cohɗoh ɓa wuu hiñohiŋ mbehi yakkiŋ Kooh Heɗ-hatil.15Heɗ ɓoo woo ne : « Sikɗuka, mi yii hay findi rokoh. A neɓɗiɗ, ɓoyi neehɗi, yi ris na kulɓaaciŋ ɗe, a heyɗi tiinde tas-ɓarang po a kee raaka kaci nga ne a hotu ɗah. »16Jiini-safaal ci cohɗoh buur ci ŋ ɗiska na woyse Harmagedoon ŋ peɗeem heber.17Malaakaani yasna-kanakɗoh yiiffa kaasiŋ ɗe ŋ puuɗsi, hooso meeɓuuɗ puloh Ɗiska Hoolohngaana, ŋ ɓoofoha-buura, woosa ne : « Wa mitiɗ ! »18Ŋ ineem wa melñeeɗa, ɓi ɗuuɗ kerhasseeɗa, wa indngeeɗa, kehƴi yoondɗukka keeh-keeh ; yoondɗuk mand ɗaa moosɗi raakoh ina ɓo' nikoh ŋ kehƴi poyi.19Kur-taaha yakka pookka haaƴ kaahay, kur-taah ciŋ cuuɓ ci jen keennda. Weɗ Kooh yurhiɗkoh ŋ ini kaɗ ŋ Babilon kur-taahi yakki, a aniɗtaa biiñiŋ kaasiŋ ɗe, biiñiŋ ayrukiŋ ɗe dohɗi.20Ɗisik ci masuɓ wilee jen cootta, tangooci sooƴca.21Galacaac yakak puloh eel ci keeneeɗa ŋ ɗafuk ɓooɓa findi toɓ. Waa nu nga ɗah reyeen kilo ndaŋkiyaah-nikiis (40). Ɓa ɓaseeɗa Kooh sagu naamooniŋ toɓiŋ galacaaci, laam wa nikee naamo miskiɗ lool.No translations available.