1Mi yii kañiɗ ɗu, mi yi Yuud, ñaamiŋ Yeesu Kiristaa, ŋ nammba nik taambɗoh Saak, mi yii fiis kaytii wuu ɗu, ɗu ɓi Kooh ɓeeɗuk ŋ haf ce, ɗu ɓi Kooh Baabi waaɗ, ɗu ɓi Yeesu Kiristaa na niiɗe.2Miskaat Kooh, a on ɗu jam na waaɗ-waaɗ te in ceem gen ɓaatke !
Tumoh moɗaaɗiici nik ŋ harmban kosiɗ ci
3Ɓaah ciŋ ngo ŋ keeñkoh, ŋ waaɗeen ɗu fiis lool ŋ ini kaɗ ŋ muci ɓoo ɓaah. Waaye ini uup tufuk weɗ ne ŋ ñaah ɗu, ɗu leber wuu kosi Kooh eɗ ɓooɓiŋ ɗe te koseem, findi wa nikohee, wa risan ɗaa.4Laam raakiɗ ɓooɓi ɗemb aassa nga ɗu, ɓi fu inah ne atteeniŋ ɓa fiisuuɗ maañ. Ɓa ɓo' kaañiɗ Kooh. Ini ɓoo yeyyooɗi baahohi Kooh baahoh ɓoo, weɗ ɓa nduuɗ po ɓa taambɗee kiñin ciŋ ɓa, ɓa mbalaye, ɓa taasee Yeesu Kiristaa yi Heɗ ɓoo ; te a yi dong ɓoo kerhiɗ.
Kooh hey atte'e tumoh moɗaaɗiici
5Ɗu inhiɗ in ci maa hee ɗu woye jen po ƴutiɗ waaye mi na naandsee ɗu ca rek. Wa Heɗi muciɗ cuuɓiŋ Israayel ŋ Misra, wa kaɗta po wa raakka ɓi sang kos, a ap ɓa ap.6Naandsukaat malaakaaci topeeɗi ŋ hatili Kooh onee ca, ca faɗta ɗiska ca gene. Kooh ceenɗuk ca ceenɗuk ceeni genan gen, a taƴca ca ŋ ñuus tuɗ po mbeha yakka, mbehaŋ atteena.7Namaat naandsuk ɓi Sodom na Gomor na kur-taah ca nikee ŋ serooca tumee moɗaaɗi findi ɗaa, ɓa nikohee faankoh sangohuuɗ, ɓa jeemeeɗa faankoh faankohi ɗaloh na faankohi Kooh teyɗuk, Kooh attee attee kur ceem, ca nikka firndeeni ɓooɓi jen min hot, te ca ris ŋ ɗooƴ yongkaahi genan gen.8Ɓooɓi ɗemb aassa nga ɗu na name tum ɗaa ; ɓa na heeƴe in ci na ɓekee ɓa ŋ usɓiɗ faan ciŋ ɓa, ɓa sang teyɗuk kikilifaakiŋ Heɗi, ɓa ɓase yakɗuuɗ ciŋ Asamaan.9Mikayel yi ɓaah ŋ kilifaaciŋ malaakaaci sah, a tumɗaa. Wa a lahtohee na Seytaani, a nookoheeɗa na ɗe fiɗaafiŋ Musaa, a kaañeeɗi ɗe atte wala a ɓas ɗe, a woo ɗe ne : « Heɗi ngasaat ɗa ! »10Waaye ɓooɓi mi na woye ɓeem, in nu ɓa inahɗi ɗah, ɓa na ɓasee wa ɓas, te in ci ɓa inah, ɓa inhoh ca findi ɗoopaat na inhohe ; inheem na ɓayee ɓa ŋ ɗumbu.11Mas ɓooɓeem ! Ɓa taambiɗ waasiŋ Kayin. Te sagu waaɗ kopor, ɓa tumiɗ po ɓa muuƴiɗ haf ɓa findi Balaam ; ɓa kaaniɗ laam ɓa na ndengsiɗkohe na Kooh findi Kore.12Ɓooɓeem ɓeɗ na ɓekee ɗu kaci ne ɗu cohha ne ɗu ɓaah kañam ɗah. Ɓa na ñame ñam po ɓa uupiɗ te ɓa supkuu nga, ɓa na liiɓe haf ɓa dong. Ɓa mand na ngaaɓi na toɓeeɗi, wi puuɗsi na coottohe ; ɓa mand na kidig ci na raakeeɗi ali kuɓu ŋ jamanooni ca na rimohe ; kidig ci kaan, kaanissa, ɗofuusa ;13ɓa mand na ginaah ci ayrukiɗ ciŋ cookmi, ci na pulɗe soñiŋ kaciikiŋ ca ; ɓa mand na hor ci tufukɗi ɗisik yino. Kooh kooɗkiɗiɗ ɓa ɗisik ñuusiɗ tuɗ, ɗiski ɓa nikan po faw.14Henok caaciŋ ɓoo yasna-kanakɗoh, camboh ŋ Aadama, a woyeen findi woosuuɗ ŋ ini kaɗ nga ɓa an : « Marka, ŋ hotiɗ Heɗi hayeeɗa huniɗ na malaakaaciŋ ɗe hooliɗ ci junni-junniici !15A hay ne a atte ɓi Adina jen, a mbugal bakaaɗoh ci jen ŋ moɗaaɗiici ɓa tum jen sagu ndengsiɗkohi ɓa ndengsiɗkohee na ɗe. A nam ɓa mbugal ŋ woo ci ɓaseeh ci ɓooɓeem woyee ɗe jen, ɓooɓi fu inah ne ɓa sang ɗe sang. »16Ɓooɓeem genan ayrukiɗ, ɓa lahtukee ŋ ini rahas ɓa te ɓa na taambɗe kiñin ciŋ ɓa. Ɓa minootiɗ woo, ɓa na woye in ci neɓ ɓi ɓa amb ne ɓa miniɗ raak in nga ɓa.
Nakoh wuu kosiɗ ci
17Waaye ɗu ɓi ɓaah ciŋ ngo ŋ keeñkoh, naandsukaat in ci Apootar ciŋ Heɗ ɓoo Yeesu Kiristaa woyee maañiɗ.18Ɓa woyeen ɗu ne : « Ŋ jamanooci mirndohan, wa hey raake ɓi njembtohoh, ɓa kerhiɗanɗi Kooh, ɓa taambɗan kiñin ciŋ ɓa. »19Ɓooɓeem ɓeɗ na saɓsohe kosiɗ ci, Fuuɗsiŋ Kooh nikɗi nga ɓa, ɓa amboh liiɓ ɓo' dong.20Waaye ɗu ɓi ɓaah ciŋ ngo ŋ keeñkoh, yipaat kipes kiŋ ɗu ŋ kosiŋ ɗu hoolohngaani. Kiimaat Kooh taamboh ŋ Fuuɗsi Hoolohngaani,21genaat amb ne Kooh waaɗiɗ ɗu, ɗu sekee na ooluk oni Heɗ ɓoo Yeesu Kiristaa na hee ɗu one, kipes ki heyɗi reehe sagu miski ɗu misik ɗe.22Ɓooɓi na liiɓsiɗohe ŋ kosiŋ ɓa, miskaat ɗu ;23ɓinooɓi ɗu kooɗoh ɓa ŋ yongkaahi, ɗu muciɗ ɓa ; ɓum miskaat ɗu waaye wortukaat, sangaat sah reɓ kulɓaaciŋ ɓa ci tumohaaɗ ciŋ ɓa moɗaaɗiici usɓiɗ.
Yakiɗ Kooh
24Yakɗaat Kooh yi min ɗu amb po ɗu kafndukuu, yi min tum po, mbehi ɗu tufkan ŋ fiki yaki a yak, ɗu raakuu sikka te ɗu hey sume keeh-keeh. Yakɗaat Koohi yino-kongi, a yi Mucɗohiŋ ɓoo taamboh ŋ Yeesu Kiristaa, Heɗ ɓoo. A yi yakɗaah, a yi eɗaah cir, a yi Heɗ hatil na nguur, bala Adina raakan na woti na po faw ! Amiin !