1Mbaa ɓoo cootkaat in ci ɓoo koc jang ŋ Mucɗohi Gapohse te ɓoo tufuk ŋ jangɗohi mitiɗi. Ɓoo kinaat dokuk finho, ɓoo tufkiɗissee jangɗoh ci na ɗeɓgohse, findi : raak inwaaso ŋ tumohaaɗ ci na ɓayohe ŋ kakaan, na kos Kooh,2ini kaɗ ŋ ɓoktuk ci, degohiŋ yaah ci, hultiŋ kaaniɗ ci, na atteeni na hee kaɗe po faw.3Wa neɓ Kooh ɗah, ɓoo na hee yurhiɗkohe ŋ jangɗohi mitiɗi kotii.4Laam, ɓoo rahsiɗ leeriŋ Kooh te ɓoo ƴoohha ini a onoh, ɓoo ɓaahha rahas Fuuɗsi Hoolohngaani, ɓoo ƴoohha baah kiŋ woo kiŋ Kooh na hatili nik ŋ adinaani na haye. Ɓi moos rahas in ceem te ɓa faɗta ca, ɓa minisɗi ɓayu po inwaaso ambis ɓa ŋ bakaaɗ ciŋ ɓa. Ɓak ɓa nga, ɓa na daaƴisse Kuɓkiŋ Kooh ŋ kurwaana te ɓa na wiñee ɗe ne a heefu.7Wa mand na keheƴ ; wa an masmiŋ toɓi na keenee nga te wa eɗoh in raakiɗ njiriñ ŋ ɓooɓi na guurɗukee wa ɗah, Kooh heya barke'ɗe.8Waaye wa eɗoh paangi raakiɗ rup na ñaaɓaaɓ ɗah, wa raakɗi njiriñ ; weɗi ŋ kot alku te wa mirndohan raaɓu.9Ɗu ɓi ɓaah ciŋ ngo ŋ keeñkoh, ɓoo min woyoh ɗaa, waaye wa wooriɗ ɓoo ne ɗiski ɗu nik, weɗ uup baah, te wa hun na muci.10Kooh yurhaaɗiiɗi po a kee alkoha pangkiŋ ɗu na waaɗohi ɗu teeɓoh ŋ tiikiŋ ɗe. Ɗu teeɓohiɗa ŋ taambkohi ɗu taambkohee ɓooɓiŋ ɗe te ɗu ris ɓa wa tumiɗ.11Ini neɓan ɓoo, weɗ ne yaa nu nga ɗu ɗah, ndengɗukoh ɗaa po ŋ reehɗohaana, po mbaɗna in ci ɗu ooluk raakan.12Ŋ ineem ɗu nikuu ɓo' faɗsukiɗ, te ɗu taamb ŋ kot ciŋ ɓooɓi kos te ɓa ambsohhaa na muñ po ɓa rahassa in ci Kooh gapee ɓa.
Giñ na gap
13Wa Kooh na gape Ibrahiima, a giñ giñ. Raakɗi ini uup Kooh, weɗ tah po wa a giñee, a ginnja ŋ haf ce ;14an : « Ŋ giñiɗ ne ŋ hey ɗa barke'ɗe, ŋ laayiɗ ɓi rimkohan nga ɗa. »15Ŋ ineem, Ibrahiima sekeeɗa na muñ, po a rahassa ini Kooh gapee ɗe.16Ɓo' giñeesa ɗah, a na giñe ŋ tiikiŋ yi uup ɗe, wa ndengiɗ woo kiŋ ɗe, jaar taastiɗoh ci jen reeh.17Kooh waaɗee teeɓ wooriɗ ɓooɓi laman in ci a gapoh ne, a dokkanɗi finho nga, weɗ tah a ndengiɗtaa na giñ.18Giñ na gap tahiɗ po wa wooriɗ ɓoo ne Kooh dokkanɗi finho. In ci kanak ceem minɗi ɓoƴsu. Ini a woo nga ca, wa minɗi nik in wiiriis dal keeh. Ineem na ñaahe ɓoo baahiɗ, ɓoo ɓi fu inah ne, ɓoo naafkiɗ nga ɗe. Wa na ñaahe ɓoo ne ɓoo min amb ndengiɗ ini ɓoo taaknu te ɓoo oolukka ne ɓoo hey wa rahse.19Oolkeem, weɗ amb ruuh findi sap seroha gaal, wa wooriɗ te wa ndengiɗ. Wa taamb ŋ ridoona, wa korra ŋ Ɗiska Hoolohngaana ŋ Eel ca.20Weɗ ɗiska a koc ɓoo aas, te a aas nga wuu ɓoo, a yi Yeesu. A aas nga, tufkiɗuuɗ Seeƴkiɗoh yakak po faw findi Melkisedek.