1Kos weɗ ne : wa woor ɓoyi ne in ci yaakaaru raakiɗ, te a ooluk ne in ci hotuuɗi nikiɗ.2Caac ciŋ ɓoo kosohee ɗaa, weɗi tah Kooh seede'iɗ ɓa seede moɗiɗ ŋ Fiis ci Hooliɗ ci.3A kos tah po, ɓoo hotta ne Adina ferohu woo kiŋ Kooh, kon in ci na hotke pulohɗi ŋ ini ɓo' min hot.4A kos tah po, Abel seeƴukka wuu Kooh seeƴki uup baah wiŋ Kayin. A weɗ tah po Fiis ci Hooliɗ ci seede'iɗ ne a ɓo' yurhiɗ, Kooh seede'iɗ ɗe ŋ teyɗuka a teyɗuk seeƴkaŋ ɗe. A kos tah po, ŋ ini a nik ɓo' kaaniɗ jen, a ris woo poyi.5A kos tah po, Henok coottohuusa ne a lahuu ŋ kakaan. A hotissuuɗi, laam a Kooh coottoh ɗe. Waaye bala a coottohsan ɗah, Fiis ci Hooliɗ ci seede'iɗ ne a neɓiɗ Kooh.6Ɗal kos ɗah, ali ɓo' minɗi neɓ Kooh. Laam ɓo' nu waaɗ reɓ Kooh ɗah, fu joyiɗ kos ne a nikiɗ te a na aafe aaf ɓi na waakee ɗe.7A kos tah po, wa Noohin inhiɗu in ci hee raake te ɓo' hotɗi ca paaɗ, a kerhiɗta Kooh, a haɓiɗta gaal yakak ne a muciɗ ɓi kahan ce. A kosa a kosee tah po a ɓurra ɓi Adina, a rahassa kiyurhi kos na eɗohe.8A kos tah po, wa Ibrahiima ɓeeɗku, a teyɗukka kaɗ kur ka a joyee rahas lamaah lamu te a inahɗi ɗiska a kaɗe.9A kosa a kosee tah po, a gennda ŋ kur ka a gapse findi hanhe ; a gennda ngaŋ ɗiip na Isaahha na Yaŋhooɓa ɓi Kooh namee gap ne ɓa hey name lam kur keem.10A sekeeɗa ne a gen ŋ kur-taaha yipu ŋ atoh, wi fu inah ne a Kooh fiisoota, taɓahhaa.11A kos tah, Kooh tummba po Ibrahiima na Saarata minnda raak kuɓu, ali nik ne ɓa yakeen ŋ raak kuɓu, te a yi Saarata sah, a nikee ɓitiɓ minaaɗi raak kuɓu. Wa wooree woor Ibrahiima ne Yi gapoh na dokkeeɗi finho.12Tahha po wa raakangannga, ɓi laayiɗ rimkohha ngaŋ ɓo' yino yi useeɗi kakaan ; ɓa laayya po haa hor ciŋ eel ci, ɓa minaaɗiisa kindu po haa merhey miŋ yaah-cookmi.13Ɓooɓi kosee ɓeem jen kaan na kos. Ɓa rahasɗi in ci Kooh gapohe, waaye ɓa ƴokiɗ ca, ɓa summba nga ca po haa ɓoyi na taambɗukee ɓo' ; ɓa woosa halang ne ɓa hanhe ngaŋ kehƴi, ɓa ɓaaɓoh.14Ɓi na woyohee ɗaa na teeɓohe wooriɗ ne ɓa na waake kur ki ɓa min ɓaahoh.15Nikee ne, a kur ka ɓa pulohee weɗ hel ciŋ ɓa nikohee ɗah, ɓa heen mine dokuk nga.16Waaye ɓa waaɗee wi uup baah, wi nik ŋ Eel ci. Weɗ tah Kooh supukɗi ɓeeɗkohu Koohiŋ ɓa, laam a kooɗkiɗiɗ ɓa kur.17A kos tah po, wa Ibrahiima markiskasse, a teyɗukka ne a seeƴkoh kuɓkiŋ ɗe Isaahha, kuɓkiŋ ɗe yino-kongi. Waam raak ɗe gapuuɗ,18te ŋ in ci a gapse, Kooh woyiɗ ɗe nga ne : « Fu raakohan ɓi rimkohan nga ɗa ŋ Isaahha. »19Ibrahiima markeen po a inahha ne Kooh raakiɗ hatili min hultiɗ kaaniɗ sah. Ŋ ineem, ɓo' miniɗ woo ne a wiku wiku kuɓkiŋ ɗe findi ɓoyi hultiɗu.20A kos tah po, Isaahha nammba barke'iɗ Yaŋhooɓa na Esaaw ŋ in ca haye.21A kos tah po, wa Yaŋhooɓa na kaane, a barke'iɗta yaa nu nga ŋ kuɓuuciŋ Yuusufa, a ambaalukka ŋ hafiŋ ndooɗiŋ ɗe, a ƴekka ne a ñaamuk Kooh.22A kos tah po, wa Yuusufa hee kaane, a woosa ŋ pulaŋ Israayel Misra, a dengkohha ŋ ini kaɗ ŋ ƴoh ciŋ ɗe.23A kos tah po, wa Musaa rimu, yaay ɓa na baab ɓa ɗasiɗta ɗe caɓin kaahay. Laam ɓa hoteen moɗ ŋ kuɓka te ɓa neƴƴoheeɗi nakohaŋ buura.24A kos tah po, wa Musaa yak, a teyɗukɗi kerhis ne a kuɓu ngaŋ kuɓki ɓitɓiŋ Firawnaana.25A tannda ne a mbugalu na cuuɓiŋ Kooh, te raak kipes kiŋ ɗe mineen neɓ ; waaye neɓɗeem heen reehe te wa hee nike neɓiɗ ŋ bakaaɗ.26Teyɗuk heefu findi Kiristaani, weɗ ngisohɗee ɗe raak-raakiŋ Misra jen ; laam a degee has ciŋ ɗe ŋ aafi Kooh aafan ɗe.27A kos tah po, a pulohha Misra te a neƴƴohɗi ayrukaŋ buura. Wa mand haa ne a hotee Yi na hotseeɗi, weɗ tah ɗe muñeeɗa.28A kos tah po, Musaa haɓiɗta seeƴkaŋ Paak, a woosa ɓooɓa ne ɓa reefaat ñif ma ŋ yahndeer ca ne malaakaani na yahrohe hay ɗah, a laaluu saaw ciŋ Israayel ca.29A kos tah po, wa Israayel ca taamb ŋ ɗooƴ Cookma-Ruumnda, wa mannda haa ɓa taamb ŋ merhey suyiɗ ; ɓi Misra jeemmba nam taamb nga, masma onnda ɓa.30A kos tah po, wa Israayel ca taambɗee miira ɗingee Yeriko, ɓa wileeɗaa, po ɓa raakka neeh yasna-kanak na ineem, miira keennda juƴ.31A kos tah po, wa ɓooɓa taambɗeeɗi Kooh apse, Rahab, ɓitɓa toonkoha, mucca, laam a taambkohee taambkoh moɗoɗ espiyoŋ ca Israayel ca tuuƴe.32Ŋ joy ye ɓaatis kotii ? Wa haɓɗi nga ne ŋ woo ŋ ini kaɗ ŋ Gedewon, Barak, Samson, Yefte, Dawuuda, Samuwel na woosuuɗ ci.33E kos tah po, ɓa folla ɓi buur po ɓa degga kur ciŋ ɓa yaah, ɓa tiindɗeeɗa waas, ɓa rahassa in ci Kooh gapohe, ɓa rannga nguɓ gaynde saahiɗ,34ɓa ƴimmba doole yongkaah, ɓa mucca ngaŋ kaañ ndang, ɓa rahassa hatili ɓa raakeeɗi, ɓa nikka jalmba ŋ hiñoh, ɓa ngekka hiñohoh caŋ kur ca cinooca.35Wa haɓɗi nga ne ŋ nam woo ŋ ini kaɗ ŋ ɓitiɓ ca wiksee kaaniɗ ciŋ ɓa hultiɗuuɗ. Na ɓi ɓo' wiiriis, ɓi kaan ŋ mbugal ca ɓa mbugalse, sagu waaɗa ɓa waaɗeeɗi findi ɓa hee pulɗohse nga ; ɓa waaɗee rahas hulti na eɗohe kipes ki ngisoh kipes ki ɓa hee ñake.36Na ɓi wiiriis, ɓi njembtasse, laɓseeɗa ngeer, jatngasseeɗa, ɓekseeɗa ŋ kasooci, te ɓa munnja.37Ɓum tapseeɗa atoh po ɓa kaannda, ɓinooɓi ɓesuusa ŋ leerni, [ɓinooɓi nattu'seeɗa,] ɓum apuusa na ndang, raakka ɓi raakeeɗi ali in, ɓa ɓekkee und mbaal wala und pe', ɓa wileeɗa ɓak nu ɓak, ɓa torhiɗasseeɗa, ɓa mbugalseeɗa.38Adina yeyyoo'eeɗi ɓa ! Ɓa nikee nga, ɓa kaɗeeɗa ɗisik nu ɗisik ŋ bilaf ci na tangooci, na ɗembohaaci nik ŋ hur ciŋ atoh ci na nung ciŋ kehƴi.39Ɓooɓeem jen, a kosiŋ ɓa tah po, ɓa seede'ɗuusa seede moɗiɗ. Moona deey, ɓa rahseeɗi ini Kooh gapohe.40Laam, Kooh kooɗkiɗee ɓoo in wiiriis wi uup baah, a waaɗeeɗi ne ɓa mitɗu te ɓoo ɓaahuu nga.