1Fu dengee yaɓko ɗah, kina woo na ɗe woo ndengiɗ, waaye woya na ɗe woo moɗoɗ po haa a yi baab ɗu. Fu dengee fiir ci po haa ɓa taambɗoh ciŋ ɗa.2Fu amb ɓitif ci findi yaay ciŋ ɗa, na cafaƴ ci findi taambɗoh ciŋ ɗa ɓitiɓ, wa hun na hool keeh-keeh.
Ɓitiɓ ci ƴaar ciŋ ɓa kaan
3Ɓitiɓ ci ƴaar ciŋ ɓa kaan te ɓa raakɗi ɓi ɓaatɗohan ɓa, taambkohaa ɓa, fu eɗ ɓa cir.4Waaye ɓa raak ɓi kuɓu wala set ɗah, ɓeem ɓeɗ joy ɓa taambkoh, ɓa inah ne ɓa joy koc pes kosiŋ ɓa ŋ kahan ɓa. Ɓa tum ineem ɗah, ɓa hey wirnde ɓi rim ɓa ini ɓeem tumiɗ ɓa. Ineem weɗ ini neɓ Kooh.5Ɓitɓi maa woye ndii, a ɓitɓi ƴaar ce kaan, yi nik kiik ce. A raakɗi yi ɓaatɗohan ɗe, a oolkoh Kooh dong te a kiimee ɗe noh na wek ne Kooh ɓaatɗoh ɗe.6Waaye yi na taambɗe ini neɓ kiñin kiŋ ɗe dong, ali nik ne a ris pes sah, a kaaniɗ.7In ceem ceɗ fu joy nakoh ne ɓa woysuu ali in moɗaaɗi.8Ɓo' taambkohɗi ɓaah ciŋ ɗe, ŋ woyisɗi ɗa ɓi kahan ce ɗah, a faɗiɗ kosiŋ ɗe te a yi uup baahaaɗi kosaaɗi.9Ɓitɓi ƴaar ce kaan te a joyya fiisu ne Janguuni amboh ɗe, ƴissuut po ƴissuut, a joyiɗ raak kiis ndaŋkiyaah-yasna-yino (60) te a joy nik ɓitɓi topee ŋ ƴaar ce.10A joyiɗ inhu ŋ in ci baahiɗ ci a tum, findi : Koɗ kuɓuuciŋ ɗe baahiɗ, na daliɗ baahiɗ ɓi na haye kahan ce, na ruhsiɗ haf ce ŋ fiki ɓo'-Kooh ci ne a ɓaatɗoh ɓa, na ɓaatɗoh ɓi nik ŋ miskiɗ, na gen tum in baahiɗ nu wa min nikoh ɗah.11Waaye kina fiis ɓi raakɗi kiis ndaŋkiyaah-yasna-yino (60), laam hel ciŋ ɓa nik ŋ raakis ƴaar ɗah, wa na ɓekee ɓa ŋ faɗ taambkoh in ciŋ Kiristaani.12Ŋ ineem, ɓooɓi raak woyɗaah ɓa ŋ ini ɓa taambiɗɗi gapohi ɓa gapee Kiristaani.13Ɓaatta nga, ini ɓa haɓɗisɗi ali in hey tahe po ɓa genan wiltiɗoh ŋ kahan ci. Ɓa topanɗi ŋ haɓɗisaaɗi ali in, waaye ɓa hey laaye nguɓ, ɓa aasee ŋ in ci waas ɓa nikohɗi, ɓa woyee mbalay.14Ineem weɗ tah po ŋ waaɗ ne ɓi ƴaar ciŋ ɓa kaan te ɓa rissa komaaki, ɓa raakis ƴaar, ɓa raak ɓi kuɓu, ɓa taambkoh kahan ciŋ ɓa baahiɗ po sangiɗi raakuu woyaah.15Raakiɗ ɓi muuƴ nga ɓa po ƴutiɗ, ɓa ɗii taambiɗ Seytaani.16Ɓitiɓ kosiɗ raak ɓaah ɓitiɓ, ɓi ƴaar ciŋ ɓa kaan ɗah, a joyiɗ ɓa ɓaatɗoh. Ineem hey eɗfiɗe pangkiŋ Janguuni po wa min taambkoh baahiɗ ɓi raakɗi ɓi ɓaatɗohan ɓa.
Yakak ciŋ Janguuni
17Yakak ci na tiindɗe Janguuni baahiɗ yeyyoo'iɗ eɗu cir kanak : Ɓa joyiɗ yakɗu, ɓa joyiɗ wirndu, te ɓi ndengɗuk ŋ paysohiŋ Woo ki na jangɗohiŋ wa, ɓeɗ uup yeyyoo cireem.18Laam Fiis ci Hooliɗ ci woyiɗ ne : « Kina hondoh ñam inoh fi na dake ŋ mbong cine a yon ca ! » Ɓaatta nga an : « Pangkoh joyiɗ wirndu ! »19Kina teyɗuk ne ɓo' ŋ yakak ci adgoh Janguuni yambu in, hanaa wa raak seede kanak wala kaahay ɗah.20Ɓi gen bakaaɗee, woytohaa ɓa ŋ fiki ɓooɓi jen, ŋ ineem ɓinooɓi neƴƴoh, tumuu findiiɓa.21Ŋ fiki Kooh, ŋ fiki Kiristaani Yeesu na ŋ fiki malaakaaciŋ Kooh, mi yii nak ɗa ne fu taambiɗ nakoh ceem te wa hunuu na talsoh : Ɓooɓi hendaat hend nga ɗa.22Kina teel deg yaah ciŋ ɗa ŋ ɓo' ne fu tufkiɗ ɗe findi njiit, fu kee ɓaaha na ɗe bakaaɗ ci a tuman. Fu ŋ haf fu, risa ŋ kihool kiŋ ɗa.23Kina topis ŋ an masuɓ ɓarang, ambsohaa wa na biiñ ƴissuut sagu miski rookiŋ ɗa yooɓ misik.24Raakiɗ ɓooɓi nga, bakaaɗ ciŋ ɓa na hotke fang, bala ɓa atte'san. Waaye ɓinooɓi, kaɗ po maañ ɗah, ciŋ ɓa han hotuk.25Wa mand ɗaa na tumohaaɗ ci baahiɗ ci. Cum na hotke fang ; ci hotukɗi ŋ saasi sah, ca minɗi ris ɗasɗukiɗ.