1Mi yii kañiɗ ɗa, Timoote, mi yi Pool, ApootariŋKiristaani Yeesu. Ŋ tumuuɗ Apootar ŋ nakohiŋ Kooh, Mucɗohiŋ ɓoo, na nakohiŋ Kiristaani Yeesu yi ɓoo oolkoh. Mi yii fiis kaytii ne ŋ woo na ɗa Timoote, kuɓki ŋ amb findi kuɓuuso keeh-keeh ngaŋ kos. Kooh yi Baabi baahohaat ɗa, a yirmaat ɗa, a on ɗa jam ; Kiristaani Yeesu Heɗ ɓoo baahohaat ɗa, a yirmaat ɗa, a on ɗa jam.
Wortuk ɓi na jangɗohe in ci raakaaɗiici
3Tuma findi ŋ woyohee ɗa wa, wa ŋ kaɗee kur caŋ Maseduwaan. Tasa ŋ Efes, fu woo ɓi na jangɗohe in ci nikɗi keeh, ɓa faɗ jangɗoheem.4Woyaa ɓa, ɓa faɗ andiin ci ɓa na andiine ɓooɓi, na limiŋ tiik ciŋ caac ci minaaɗi reehi. In ceem na ɓeke taastiɗoh rek. Ca ɓaatɗohɗi ali ɓo' ŋ findi Kooh waaɗoh ne in ci tiindoh ɗaa ŋ ini kaɗ ŋ kos.5Ini tah ŋ woosa ineem, weɗ ne ŋ waaɗ ne ɓooɓi waaɗtiɗoh na keeñ moɗiɗ, ɓa inhisoh baahiɗ na baahaaɗi, ɓa raak kos keeh-keeh.6Raakiɗ ɓi ɗal waaseem, ɓa muuƴca ŋ taastiɗoh ci raakɗi haf na kose.7Ɓa tum haf ɓa jangɗohoh ciŋ waasiŋMusaa te ɓa inahɗi ali in, wa in ci ɓa na woye haa, wa in ci ɓa na ndengɗe haa.8Ɓoo inhiɗ ne waasiŋ Musaa baahiɗ, ne findi wa na taambɗohse degu ŋ waas ɗah.9Inhaat inii : E yurhiɗ ci tah waasi kuruk haa waaye wa wuu tumoh moɗaaɗiici na ɓi sang taambiɗ waas, ɓi sang kerhiɗ Kooh na bakaaɗoh ci. Wa wuu ɓi bugluuɗi ŋ Kooh na ɓi eɗɗi in ciŋ Kooh cir, wa wuu ɓi na ape yaay ciŋ ɓa na baab ciŋ ɓa, wa wuu nguɗoh kiñin ci.10Wa wuu ɓi na faankohe faankoh sangohuuɗ, wa wuu ƴaar-ɓitiɓ ci na toontukoh ñaam ci. Wa wuu leyoh ci na ɓi na giñe mbalay. Wa wuu ɓi na tume in ci ɗaloh na keeh ki jangɗohu.11Jangɗoheem hun hun na Yegɗohiŋ Muci ŋ dengkohu, wi na teeɓohe yakki Kooh yi Heɗ muuɗ yak.
Pool corkiɗiɗ Kooh ŋ baahohi a baahoh ɗe
12Mi yii corkiɗ Heɗ ɓoo Kiristaani Yeesu yi on ndo hatil, a oolukka so po a tufkiɗta so, ne ŋ nik ŋ pangkii.13Mi yi meeɗ ɗe ɓas, ŋ tolfiɗee ɓi kos ɗe, ŋ tumee ɓa in miskiɗ lool. Waaye ŋ miskiɗ Heɗ ɓoo, laam e inhaaɗi ɓekee so nga sagu kosaaɗi.14Heɗ ɓoo baahohiɗ to laayoh na laayoh, a onnda so kos na waaɗ Kooh na ɓooɓi, ŋ niki ŋ nik ŋ Kiristaani Yeesu.15Woo kii wooriɗ te wa oolkaah keeh-keeh : « Kiristaani Yeesu hayiɗ Adina ne a muciɗ bakaaɗoh ci. » Te e ñam uup nik bakaaɗoh.16Waaye ŋ yirmuuɗ ne Kiristaani Yeesu teeɓoh mini a min muñ jen nga so, mi yi uup nik bakaaɗoh. Te ineem misaal ne yaa nu kos ɗe ɗah, hey rahse kipes ki heyɗi reehe.17Kooh yi yino-kongi,Buuri genan gen,yi kaananɗi po faw,yi has minɗi hot,a yi eɗaah cir,a yi yakɗaah po faw !Amiin !
Hiñohi baahiɗi
18Kon Timoote, mi yii dengkoh ɗa inii kuɓu. Wa hun na woo-woosuuɗ ci woysee nga ɗa ɗeɓgaan. Taambɗa woo ceem, fu hiñoh hiñohi baah ;19kaɗa nga na kos na inhisoh baahiɗ na baahaaɗi. Raakiɗ ɓi faɗ in ceem po ɓa yahrohiɗ kosiŋ ɓa findi gaal suuhiɗ.20Ɓooɓeem Himene na Aleksaandar ɓaah nga ; ŋ faɗiɗ ɓa na Seytaani ne ɓa jang, ɓa ɗalissuu Kooh.