1Ɗiski wa nik, ɓaah ci, ɗu jangiɗ nga ɓoo findi ɗu joy pesoh ne ɗu neɓ Kooh, te ɗu ɓii tuma, waaye ɓoo ɓii kiim ɗu te ɓoo ɓii ñaah ɗu ŋ tiikiŋ Yeesu Heɗi, ɓaataat ineem.2Ɗu inhiɗ nakoh ci ɓoo eɗ ɗu ŋ tiikiŋ Yeesu Heɗi.3Waaɗ-waaɗiŋ Kooh, weɗ ne ɗu hool wuu ce, ɗu wortuk faankoh sangohuuɗ,4yaa nu nga ɗu ɗah ambaat cir ciŋ faaniŋ ɗe, wa hun na hool wuu Kooh na eɗoh cir.5Wa hunuu na taambiɗ waaɗ-waaɗiŋ kiñin kiŋ ɗa, findi cuuɓ ci inahɗi Kooh na tumohee wa.6Ŋ inii, ali ɓo' nga ɗu kinaat ñaañoh morom ce wala a njirñiɗkohee ɗe. Inhaat ne Heɗi na atte'e atte in ceem, ɓoo woyiɗ ɗu wa, woyissa ɗu wa.7Kooh ɓeeɗukɗi ɓoo ne ɓoo nik hoolaaɗi, waaye a ɓeeɗuk ɓoo ne ɓoo hool wuu ce.8Ŋ ineem, yi na hee sange teyɗuk woo ceem, a sang ɓo' haa, waaye a sang Kooh, yi eɗ ɗu Fuuɗsiŋ ɗe Hoolohngaani.9Ini kaɗ ŋ waaɗoh ŋ harmban ɗu, ɗu ɓi ɓaah kos, ɗu etohɗi fiisu ŋ ini kaɗ nga, Kooh jangɗiɗ ɗu waaɗtiɗoh ŋ harmban ɗu.10Ɗu na tiindɗohe ɗaa na ɓaah ci nik ŋ Maseduwaan jen. Waaye, ɓoo ɓii ñaah ɗu ɓaah ci, ɓaataat ineem.11Waakaat pes ŋ jam na ɓooɓi, yaa nu nga nik ngaŋ in ciŋ ɗe haf ce, ɗu pangkoote na yaah ciŋ ɗu, ɓoo nakohee ɗu wa ɗaa.12Ŋ ineem, ɗu etohanɗi ali ɓo', te ɓi kosɗi hey ɗu mine eɗ cir ŋ findi ɗu na pesohe.
Kaaniɗ ci na hayisiŋ Heɗi
13Ɓaah ci, ɓoo waaɗɗi ne ɗu nik inhaaɗi ŋ ini kaɗ ŋ ɓi kuruk nga, po ɗu kee raaka tiis findi ɓinooɓi, ɓi raakɗi yaakaar.14Ŋ ineem, findi ɓoo kosoha, Yeesu kaaniɗ te a hultiɗ, ɓi kaan te ɓa kossa ɗe, Kooh ɓayndohohan ɓa ɗaa taamboh ŋ Yeesu, ɓa hun na Yeesu.15Inii weɗ ɓoo na woyee ɗu te wa puloh ŋ Heɗi : Ɓoo ɓi risan pes po ŋ hayisiŋ Heɗi, ɓoo adganɗi ɓi kuruk nga.16Laam nakoh hey leehkasse, hooso kilifa malaaka kerhuk, kuluɓ kiŋ Kooh kerhuk, ŋ ineem, Heɗi ŋ haf ce hey pulohe ŋ Eel ci, ruhse, te kaaniɗ ci nik ŋ Kiristaani hey koce kuruk.17Ƴut ɗah, ɓoo ɓi risan ndii pese, ɓoo hey ambsohse na ɓa, coottohse ŋ ɗooƴ eel, ɓoo kaɗ taambɗuka Heɗi, ngaŋ jawuuni. Ini kooɗoh ndeem, ɓoo nikan na ɗe po faw.18Kon, yaa nu nga ɗu giifɗaat morom ce na woo ceem.