1 Saaŋ2sav_wbt

1Komaakciŋ ngo, mi yii fiis ɗu in ceem ne ɗu bakaaɗuu. Waaye yino nga ɓoo bakaaɗ ɗah, ɓoo raakiɗ Yi ngelɗan ɓoo ŋ fiki Baabi, a Yeesu Kiristaa, Yurhiɗi.2Laam, a yi eɗoh haf ce ne a seeƴkohu wuu bakaaɗ ciŋ ɓoo, te wa wuu ɓoo dong haa waaye wuu ɓi Adina jen.

Nakohi asi

3Ini na teeɓe ɓoo ne ɓoo inhiɗ Heɗi, weɗ ne ɓoo taambiɗ nakoh ciŋ ɗe.4Yi na woye ne a inhiɗ Kooh, te a taambiɗɗi nakoh ciŋ ɗe, yeem leyoh te keeh ki nikɗi nga ɗe.5Waaye ɓoyi na taambɗe woo kiŋ ɗe, waaɗi a waaɗ Kooh na nike mitiɗ sik te wa nik keeh nga ɗe - ŋ ineem ɓoo inah ne ɓoo ɓii ŋ Kooh.6Yaa nu woo ne a yii ŋ Kooh ɗah, a joy pesoh findi Yeesu pesohe.7Ɓaah ciŋ ngo ŋ keeñkoh, wa nakoh as weɗ maa fiisee ɗu haa, wa nakoh maañiɗ te ɗu rahasa wa wa camb, te nakoheem, e woo ki ɗu kerah.8Moona ini maa fiisee ɗu, wa nakoh as keeh-keeh ŋ kipes kiŋ Kiristaani, findi wa nam nikoh as keeh-keeh ŋ kipes kiŋ ɗu, ñuusi wa ɗii coot te siñaari siñaarɗiɗ po ƴutiɗ.9Yi na woye ne a yii ŋ siñaari te a waaɗɗi yi a ɓaah na ɗe kos, a ris ŋ ñuusi poyi.10Ɓi waaɗ ɓaah ciŋ ɓa kosiɗ ci, ɓa gen ŋ siñaari te ali in kafndanɗi ɓa.11Waaye ɓi waaɗɗi ɓaah ciŋ ɓa, ɓa ɗi ŋ ñuusi ; ɓa na tiinde ŋ ɗooƴ ñuusi te ɓa inahɗi ɗiski ɓa na kaɗe, ñuusi fuulɗiɗ has ciŋ ɓa.

Ɓo' nu waaɗ Adina ɗah, waaɗɗi Baabi

12Mi yii fiis ɗu, komaakci :Ɗu ɗaasuuɗ bakaaɗ ciŋ ɗusagu Yeesu Kiristaa.13Mi yii fiis ɗu, baab ci :Ɗu inhiɗ Yi nik ŋ camba poyi.Mi yii fiis ɗu, komaakci fiir ci :Ɗu saahiɗ Seytaani.
14Mi yii fiis ɗu, komaakci :Ɗu inhiɗ Baabi.Mi yii fiis ɗu, baab ci :Ɗu inhiɗ Yi nik ŋ camba poyi.Mi yii fiis ɗu, komaakci fiir ci :Ɗu raakiɗ hatil,woo kiŋ Kooh gen nga ɗute ɗu saahiɗ Seytaani.
15Kinaat waaɗ Adina na in ci nik ŋ ɗooƴ Adina. Ɓo' waaɗ Adina ɗah, waaɗ Baabi nikɗi nga ɗe.16In ci nik ŋ Adina jen, findi taambiɗ kiñin, maɗ in ci has na hote, na yaksiɗuk ŋ raak-raak, ceem jen ca ina Baabi haa, ca ina Adina.17Te kat, Adina na reehe reeh na in ci na maɗse nga, waaye yi na tume ini Kooh waaɗ genan gen po faw.

Sangiɗ ciŋ Kiristaani

18Kuɓuuciŋ ngo, ɓoo ɓii ŋ jamanooci mirndoh. Ɗu kerhiɗ ne sangiɗiŋ Kiristaani yii hay, te woti-woti, sangiɗ ciŋ Kiristaani laayiɗ, tahha po ɓoo inhiɗ ne ɓoo ɓii ŋ jamanooci mirndoh.19Ɓa puliɗ nga ɓoo waaye ɓa ɓaaheeɗi nga ɓoo ; laam ɓa ɓaaheen nga ɓoo ɗah, ɓa heen rise na ɓoo. Waaye ineem teeɓohiɗ ne ali yino nga ɓa ɓaahɗi nga ɓoo.20Ɗu nak, ɗu rahsiɗ Fuuɗsi Hoolohngaani taamboh ŋ Yeesu Kiristaa, tahha po ɗu jen ɗu inhiɗ keeh ki ŋ ini kaɗ ŋ Kooh.21Mi yii fiis ɗu, wa nikɗi haa ne ɗu inahɗi keeh ki, waaye ɗu inhiɗa te ɗu inhiɗ ne ali lee na puloheeɗi ŋ keeh.22Ya ɓa leyohi ? E yi taas ne Yeesu a yi Kiristaani. Yeem, a yi sangiɗiŋ Kiristaani, yi taas Baabi na Kuɓki.23Yaa nu taasuk Kuɓki ɗah, a namɗi raak Baabi. Yaa nu teyɗuk Kuɓki ɗah, a namiɗ raak Baabi.24Ini ɗu kerah ŋ camba poyi, risaat nga ɗu. Ini ɗu kerah ŋ camba poyi ris nga ɗu ɗah, ɗu naman ris ŋ Kuɓki na Baabi.25Te ini a gap ɓoo, weɗ kipes ki heyɗi reehe.26Ineem weɗ ŋ waaɗee ɗu fiis ŋ ini kaɗ ŋ ɓi na muuƴɗee ɗu.27Ini kaɗ nga ɗu, Fuuɗsi Hoolohngaani ɗu rahsoh nga ɗe hey gene nga ɗu, te ɗu etohɗi ɓo' wiiriis jangɗee ɗu ; Fuuɗsi yii jangiɗ ɗu in ci jen, te ini a na jangɗee ɗu wa keeh te wa lee haa, mbaa risaat ŋ Kiristaani, findi Fuuɗsi jangɗoh ɗu.

Kuɓuuciŋ Kooh na bakaaɗeeɗi

28Ɗiski wa nik, kuɓuuciŋ ngo, risaat ŋ Kiristaani, po mbeha a teeɓkohan, wa raak ɓoo riifiɗ na ooluk, ɓoo raakuu kaci ŋ fikiice ne a hay ɗah.29Ɗu inhiɗ ne a yurhiɗ ɗah, ɗu namiɗ inah ne ɓo' nu na pese ŋ yurah ɗah, a rimkoh nga ɗe.
expand_more
Search